2 Samūel 2

dāūd yahūdāh kā bādshāh ban jātā hai

¹is ke bād dāūd ne rabb se darayāft kiyā, “kyā maiṅ yahūdāh ke kisī shahar meṅ vāpas chalā jāūṅ?” rabb ne javāb diyā, “hāṅ, vāpas jā.” dāūd ne savāl kiyā, “maiṅ kis shahar meṅ jāūṅ?” rabb ne javāb diyā, “habrūn meṅ.” ²chunāṅche dāūd apnī do bīviyoṅ aḵẖīnūam yazraelī aur nābāl kī bevā abījel karmilī ke sāth habrūn meṅ jā basā.

³dāūd ne apne ādmiyoṅ ko bhī un ke ḵẖāndānoṅ samet habrūn aur gird-o-navāh kī ābādiyoṅ meṅ muntaqil kar diyā. ⁴ek din yahūdāh ke ādmī habrūn meṅ āe aur dāūd ko masah karke apnā bādshāh banā liyā.

jab dāūd ko ḵẖabar mil gaī ki yabīs-jiliād ke mardoṅ ne sāūl ko dafnā diyā hai ⁵to us ne unheṅ paiġām bhejā, “rabb āp ko is ke liye barkat de ki āp ne apne mālik sāūl ko dafan karke us par meharbānī kī hai. ⁶javāb meṅ rabb āp par apnī meharbānī aur vafādārī kā izhār kare. maiṅ bhī is nek amal kā ajr dūṅgā. ⁷ab mazbūt aur diler hoṅ. āp kā āqā sāūl to faut huā hai, lekin yahūdāh ke qabīle ne mujhe us kī jagah chun liyā hai.”

ishbosat isrāīl kā bādshāh ban jātā hai

⁸itne meṅ sāūl kī fauj ke kamāṅḍar abinair bin nair ne sāūl ke beṭe ishbosat ko mahanāim shahar meṅ le jā kar ⁹bādshāh muqarrar kar diyā. jiliād, yazrael, āshar, ifrāīm, binyamīn aur tamām isrāīl us ke qabze meṅ rahe. ¹⁰sirf yahūdāh kā qabīlā dāūd ke sāth rahā. ishbosat 40 sāl kī umr meṅ bādshāh banā, aur us kī hukūmat do sāl qāim rahī. ¹¹dāūd habrūn meṅ yahūdāh par sāḍhe sāt sāl hukūmat kartā rahā.

isrāīl aur yahūdāh ke darmiyān jaṅg

¹²ek din abinair ishbosat bin sāūl ke mulāzimoṅ ke sāth mahanāim se nikal kar jibaūn āyā. ¹³yah dekh kar dāūd kī fauj yoāb bin zarūyāh kī rāhanumāī meṅ un se laṛne ke liye niklī. donoṅ faujoṅ kī mulāqāt jibaūn ke tālāb par huī. abinair kī fauj tālāb kī urlī taraf ruk gaī aur yoāb kī fauj parlī taraf. ¹⁴abinair ne yoāb se kahā, “āo, hamāre chand javān hamāre sāmne ek dūsre kā muqāblā kareṅ.” yoāb bolā, “ṭhīk hai.” ¹⁵chunāṅche har fauj ne bārah javānoṅ ko chun kar muqāble ke liye pesh kiyā. ishbosat aur binyamīn ke qabīle ke bārah javān dāūd ke bārah javānoṅ ke muqāble meṅ khaṛe ho gae. ¹⁶jab muqāblā shurū huā to har ek ne ek hāth se apne muḵẖālif ke bāloṅ ko pakaṛ kar dūsre hāth se apnī talvār us ke peṭ meṅ ghoṁp dī. sab ke sab ek sāth mar gae. bād meṅ jibaūn kī is jagah kā nām ḵẖilqat-hazzūrīm paṛ gayā.

¹⁷phir donoṅ faujoṅ ke darmiyān nihāyat saḵẖt laṛāī chhiṛ gaī. laṛte laṛte abinair aur us ke mard hār gae. ¹⁸yoāb ke do bhāī abīshai aur asāhel bhī laṛāī meṅ hissā le rahe the. asāhel ġazāl kī tarah tez dauṛ saktā thā. ¹⁹jab abinair shikast khā kar bhāgne lagā to asāhel sīdhā us ke pīchhe paṛ gayā aur na dāīṅ, na bāīṅ taraf haṭā. ²⁰abinair ne pīchhe dekh kar pūchhā, “kyā āp hī haiṅ, asāhel?” us ne javāb diyā, “jī, maiṅ hī hūṅ.” ²¹abinair bolā, “dāīṅ yā bāīṅ taraf haṭ kar kisī aur ko pakṛeṅ! javānoṅ meṅ se kisī se laṛ kar us ke hathiyār aur zirābaktar utāreṅ.”

lekin asāhel us kā tāqqub karne se bāz na āyā. ²²abinair ne use āgāh kiyā, “ḵẖabardār. mere pīchhe se haṭ jāeṅ, varnā āp ko mār dene par majbūr ho jāūṅgā. phir āp ke bhāī yoāb ko kis tarah muṅh dikhāūṅgā?” ²³to bhī asāhel ne pīchhā na chhoṛā. yah dekh kar abinair ne apne neze kā dastā itne zor se us ke peṭ meṅ ghoṁp diyā ki us kā sirā dūsrī taraf nikal gayā. asāhel vahīṅ gir kar jāṅ-ba-haq ho gayā. jis ne bhī vahāṅ se guzar kar yah dekhā vah vahīṅ ruk gayā.

²⁴lekin yoāb aur abīshai abinair kā tāqqub karte rahe. jab sūraj ġurūb hone lagā to vah ek pahāṛī ke pās pahuṅch gae jis kā nām ammā thā. yah jiyāh ke muqābil us rāste ke pās hai jo musāfir ko jibaūn se registān meṅ pahuṅchātā hai. ²⁵binyamīn ke qabīle ke log vahāṅ pahāṛī par abinair ke pīchhe jamā ho kar dubārā laṛne ke liye tayyār ho gae. ²⁶abinair ne yoāb ko āvāz dī, “kyā yah zarūrī hai ki ham hameshā tak ek dūsre ko maut ke ghāṭ utārte jāeṅ? kyā āp ko samajh nahīṅ āī ki aisī harkateṅ sirf talḵẖī paidā kartī haiṅ? āp kab apne mardoṅ ko hukm deṅge ki vah apne isrāīlī bhāiyoṅ kā tāqqub karne se bāz āeṅ?”

²⁷yoāb ne javāb diyā, “rabb kī hayāt kī qasam, agar āp laṛne kā hukm na dete to mere log āj subah hī apne bhāiyoṅ kā tāqqub karne se bāz ā jāte.” ²⁸us ne narsiṅgā bajā diyā, aur us ke ādmī ruk kar dūsroṅ kā tāqqub karne se bāz āe. yūṅ laṛāī ḵẖatm ho gaī.

²⁹us pūrī rāt ke daurān abinair aur us ke ādmī chalte gae. daryā-e-yardan kī vādī meṅ se guzar kar unhoṅ ne daryā ko pār kiyā aur phir gaharī ghāṭī meṅ se ho kar mahanāim pahuṅch gae.

³⁰yoāb bhī abinair aur us ke logoṅ ko chhoṛ kar vāpas chalā gayā. jab us ne apne ādmiyoṅ ko jamā karke ginā to mālūm huā ki asāhel ke ilāvā dāūd ke 19 ādmī māre gae haiṅ. ³¹is ke muqāble meṅ abinair ke 360 ādmī halāk hue the. sab binyamīn ke qabīle ke the. ³²yoāb aur us ke sāthiyoṅ ne asāhel kī lāsh uṭhā kar use bait-laham meṅ us ke bāp kī qabr meṅ dafan kiyā. phir usī rāt apnā safar jārī rakh kar vah pau phaṭte vaqt habrūn pahuṅch gae.