2 Samūel 21

sāūl ke jurm kā kaffārā

¹dāūd kī hukūmat ke daurān kāl paṛ gayā jo tīn sāl tak jārī rahā. jab dāūd ne is kī vajah darayāft kī to rabb ne javāb diyā, “kāl is liye ḵẖatm nahīṅ ho rahā ki sāūl ne jibaūniyoṅ ko qatl kiyā thā.”

²tab bādshāh ne jibaūniyoṅ ko bulā liyā tāki un se bāt kare. asal meṅ vah isrāīlī nahīṅ balki amoriyoṅ kā bachā khachā hissā the. mulk-e-kan’ān par qabzā karte vaqt isrāīliyoṅ ne qasam khā kar vādā kiyā thā ki ham āp ko halāk nahīṅ kareṅge. lekin sāūl ne isrāīl aur yahūdāh ke liye josh meṅ ā kar unheṅ halāk karne kī koshish kī thī.

³dāūd ne jibaūniyoṅ se pūchhā, “maiṅ us ziyādtī kā kaffārā kis tarah de saktā hūṅ jo āp se huī hai? maiṅ āp ke liye kyā karūṅ tāki āp dubārā us zamīn ko barkat deṅ jo rabb ne hameṅ mīrās meṅ dī hai?” ⁴unhoṅ ne javāb diyā, “jo sāūl ne hamāre aur hamāre ḵẖāndānoṅ ke sāth kiyā hai us kā izālā sone-chāṅdī se nahīṅ kiyā jā saktā. yah bhī munāsib nahīṅ ki ham is ke ivz kisī isrāīlī ko mār deṅ.” dāūd ne savāl kiyā, “to phir maiṅ āp ke liye kyā karūṅ?” ⁵jibaūniyoṅ ne kahā, “sāūl hī ne hameṅ halāk karne kā mansūbā banāyā thā, vahī hameṅ tabāh karnā chāhatā thā tāki ham isrāīl kī kisī bhī jagah qāim na rah sakeṅ. ⁶is liye sāūl kī aulād meṅ se sāt mardoṅ ko hamāre havāle kar deṅ. ham unheṅ rabb ke chune hue bādshāh sāūl ke vatnī shahar jibiā meṅ rabb ke pahāṛ par maut ke ghāṭ utār kar us ke huzūr laṭkā deṅ.”

bādshāh ne javāb diyā, “maiṅ unheṅ āp ke havāle kar dūṅgā.” ⁷yūntan kā beṭā mifībosat sāūl kā potā to thā, lekin bādshāh ne use na chheṛā, kyūṅki us ne rabb kī qasam khā kar yūntan se vādā kiyā thā ki maiṅ āp kī aulād ko kabhī nuqsān nahīṅ pahuṅchāūṅgā. ⁸chunāṅche us ne sāūl kī dāshtā risfā bint ayyāh ke do beṭoṅ armonī aur mifībosat ko aur is ke ilāvā sāūl kī beṭī mīrab ke pāṅch beṭoṅ ko chun liyā. mīrab barzillī mahūlātī ke beṭe adrīel kī bīvī thī. ⁹in sāt ādmiyoṅ ko dāūd ne jibaūniyoṅ ke havāle kar diyā.

sātoṅ ādmiyoṅ ko mazkūrā pahāṛ par lāyā gayā. vahāṅ jibaūniyoṅ ne unheṅ qatl karke rabb ke huzūr laṭkā diyā. vah sab ek hī din mar gae. us vaqt jau kī fasal kī kaṭāī shurū huī thī.

¹⁰tab risfā bint ayyāh sātoṅ lāshoṅ ke pās gaī aur patthar par apne liye ṭāṭ kā kapṛā bichhā kar lāshoṅ kī hifāzat karne lagī. din ke vaqt vah parindoṅ ko bhagātī aur rāt ke vaqt jaṅglī jānvaroṅ ko lāshoṅ se dūr rakhtī rahī. vah bahār ke mausam meṅ fasal kī kaṭāī ke pahale dinoṅ se le kar us vaqt tak vahāṅ ṭhaharī rahī jab tak bārish na huī.

¹¹jab dāūd ko mālūm huā ki sāūl kī dāshtā risfā ne kyā kiyā hai ^12-14 to vah yabīs-jiliād ke bāshindoṅ ke pās gayā aur un se sāūl aur us ke beṭe yūntan kī haḍḍiyoṅ ko le kar sāūl ke bāp qīs kī qabr meṅ dafnāyā. (jab filistiyoṅ ne jilbūa ke pahāṛī ilāqe meṅ isrāīliyoṅ ko shikast dī thī to unhoṅ ne sāūl aur yūntan kī lāshoṅ ko bait-shān ke chauk meṅ laṭkā diyā thā. tab yabīs-jiliād ke ādmī chorī chorī vahāṅ ā kar lāshoṅ ko apne pās le gae the.) dāūd ne jibiā meṅ ab tak laṭkī sāt lāshoṅ ko bhī utār kar zilā meṅ qīs kī qabr meṅ dafnāyā. zilā binyamīn ke qabīle kī ābādī hai.

jab sab kuchh dāūd ke hukm ke mutābiq kiyā gayā thā to rabb ne mulk ke liye duāeṅ sun līṅ.

filistiyoṅ se jaṅgeṅ

¹⁵ek aur bār filistiyoṅ aur isrāīliyoṅ ke darmiyān jaṅg chhiṛ gaī. dāūd apnī fauj samet filistiyoṅ se laṛne ke liye niklā. jab vah laṛtā laṛtā niḍhāl ho gayā thā ¹⁶to ek filistī ne us par hamlā kiyā jis kā nām ishbī-banob thā. yah ādmī rafā deo kī nasal se thā. us ke pās naī talvār aur itnā lambā nezā thā ki sirf us kī pītal kī nok kā vazan taqrīban sāḍhe 3 kilogrām thā. ¹⁷lekin abīshai bin zarūyāh dauṛ kar dāūd kī madad karne āyā aur deo ko mār ḍālā. is ke bād dāūd ke faujiyoṅ ne qasam khāī, “āindā āp laṛne ke liye hamāre sāth nahīṅ nikaleṅge. aisā na ho ki isrāīl kā charāġ bujh jāe.”

¹⁸is ke bād isrāīliyoṅ ko jūb ke qarīb bhī filistiyoṅ se laṛnā paṛā. vahāṅ sibbakī hūsātī ne rafā deo kī aulād meṅ se ek ādmī ko mār ḍālā jis kā nām saf thā.

¹⁹jūb ke qarīb ek aur laṛāī chhiṛ gaī. is ke daurān bait-laham ke ilhanān bin yāre-urjīm ne jātī jālūt ko maut ke ghāṭ utār diyā. jālūt kā nezā khaḍḍī ke shahatīr jaisā baṛā thā. ²⁰ek aur dafā jāt ke pās laṛāī huī. filistiyoṅ kā ek faujī jo rafā kī nasal kā thā bahut lambā thā. us ke hāthoṅ aur pairoṅ kī chhah chhah uṅgaliyāṅ yānī mil kar 24 uṅgaliyāṅ thīṅ. ²¹jab vah isrāīliyoṅ kā mazāq uṛāne lagā to dāūd ke bhāī sim’ā ke beṭe yūntan ne use mār ḍālā. ²²jāt ke yah deo rafā kī aulād the, aur vah dāūd aur us ke faujiyoṅ ke hāthoṅ halāk hue.