2 Samūel 22

dāūd kā gīt

¹jis din rabb ne dāūd ko tamām dushmanoṅ aur sāūl ke hāth se bachāyā us din bādshāh ne gīt gāyā,

²“rabb merī chaṭān, merā qil’ā aur merā najātadihandā hai.

³merā ḵẖudā merī chaṭān hai jis meṅ maiṅ panāh letā hūṅ. vah merī ḍhāl, merī najāt kā pahāṛ, merā buland hisār aur merī panāhgāh hai. tū merā najātadihandā hai jo mujhe zulm-o-tashaddud se bachātā hai.

⁴maiṅ rabb ko pukārtā hūṅ, us kī tamjīd ho! tab vah mujhe dushmanoṅ se chhuṭkārā detā hai.

⁵maut kī maujoṅ ne mujhe gher liyā, halākat ke sailāb ne mere dil par dahshat tārī kī.

⁶pātāl ke rassoṅ ne mujhe jakaṛ liyā, maut ne mere rāste meṅ apne phaṅde ḍāl die.

⁷jab maiṅ musībat meṅ phaṅs gayā to maiṅ ne rabb ko pukārā. maiṅ ne madad ke liye apne ḵẖudā se faryād kī to us ne apnī sukūnatgāh se merī āvāz sunī, merī chīḵẖeṅ us ke kān tak pahuṅch gaīṅ.

⁸tab zamīn laraz uṭhī aur thartharāne lagī, āsmān kī bunyādeṅ rabb ke ġazab ke sāmne kāṁpne aur jhūlne lagīṅ.

⁹us kī nāk se dhuāṅ nikal āyā, us ke muṅh se bhasm karne vāle shole aur dahakte koile bhaṛak uṭhe.

¹⁰āsmān ko jhukā kar vah nāzil huā. jab utar āyā to us ke pāoṅ ke nīche aṅdherā hī aṅdherā thā.

¹¹vah karūbī farishte par savār huā aur uṛ kar havā ke paroṅ par maṅḍalāne lagā.

¹²us ne aṅdhere ko apnī chhupne kī jagah banāyā, bārish ke kāle aur ghane bādal ḵẖaime kī tarah apne ird-gird lagāe.

¹³us ke huzūr kī tez raushnī se sholāzan koile phūṭ nikle.

¹⁴rabb āsmān se kaṛakne lagā, allāh t’ālā kī āvāz gūṅj uṭhī.

¹⁵us ne apne tīr chalā die to dushman tittar-bittar ho gae. us kī bijlī idhar udhar girtī gaī to un meṅ halchal mach gaī.

¹⁶rabb ne ḍāṅṭā to samundar kī vādiyāṅ zāhir huīṅ, jab vah ġusse meṅ garjā to us ke dam ke jhoṅkoṅ se zamīn kī bunyādeṅ nazar āīṅ.

¹⁷bulandiyoṅ par se apnā hāth baṛhā kar us ne mujhe pakaṛ liyā, gahare pānī meṅ se khaiṅch kar mujhe nikāl lāyā.

¹⁸us ne mujhe mere zabardast dushman se bachāyā, un se jo mujh se nafrat karte haiṅ, jin par maiṅ ġālib na ā sakā.

¹⁹jis din maiṅ musībat meṅ phaṅs gayā us din unhoṅ ne mujh par hamlā kiyā, lekin rabb merā sahārā banā rahā.

²⁰us ne mujhe taṅg jagah se nikāl kar chhuṭkārā diyā, kyūṅki vah mujh se ḵẖush thā.

²¹rabb mujhe merī rāstbāzī kā ajr detā hai. mere hāth sāf haiṅ, is liye vah mujhe barkat detā hai.

²²kyūṅki maiṅ rabb kī rāhoṅ par chaltā rahā hūṅ, maiṅ badī karne se apne ḵẖudā se dūr nahīṅ huā.

²³us ke tamām ahkām mere sāmne rahe haiṅ, maiṅ us ke farmānoṅ se nahīṅ haṭā.

²⁴us ke sāmne hī maiṅ beilzām rahā, gunāh karne se bāz rahā hūṅ.

²⁵is liye rabb ne mujhe merī rāstbāzī kā ajr diyā, kyūṅki us kī āṅkhoṅ ke sāmne hī maiṅ pāk-sāf sābit huā.

²⁶ai allāh, jo vafādār hai us ke sāth terā sulūk vafādārī kā hai, jo beilzām hai us ke sāth terā sulūk beilzām hai.

²⁷jo pāk hai us ke sāth terā sulūk pāk hai. lekin jo kajrau hai us ke sāth terā sulūk bhī kajarvī kā hai.

²⁸tū pastahāloṅ ko najāt detā hai, aur terī āṅkheṅ maġrūroṅ par lagī rahatī haiṅ tāki unheṅ past kareṅ.

²⁹ai rabb, tū hī merā charāġ hai, rabb hī mere aṅdhere ko raushan kartā hai.

³⁰kyūṅki tere sāth maiṅ faujī daste par hamlā kar saktā, apne ḵẖudā ke sāth dīvār ko phalāṅg saktā hūṅ.

³¹allāh kī rāh kāmil hai, rabb kā farmān ḵẖālis hai. jo bhī us meṅ panāh le us kī vah ḍhāl hai.

³²kyūṅki rabb ke sivā kaun ḵẖudā hai? hamāre ḵẖudā ke sivā kaun chaṭān hai?

³³allāh mujhe quvvat se kamarbastā kartā, vah merī rāh ko kāmil kar detā hai.

³⁴vah mere pāoṅ ko hiran kī sī phurtī atā kartā, mujhe mazbūtī se merī bulandiyoṅ par khaṛā kartā hai.

³⁵vah mere hāthoṅ ko jaṅg karne kī tarbiyat detā hai. ab mere bāzū pītal kī kamān ko bhī tān lete haiṅ.

³⁶ai rabb, tū ne mujhe apnī najāt kī ḍhāl baḵẖsh dī hai, terī narmī ne mujhe baṛā banā diyā hai.

³⁷tū mere qadmoṅ ke liye rāstā banā detā hai, is liye mere ṭaḵẖne nahīṅ ḍagmagāte.

³⁸maiṅ ne apne dushmanoṅ kā tāqqub karke unheṅ kuchal diyā, maiṅ bāz na āyā jab tak vah ḵẖatm na ho gae.

³⁹maiṅ ne unheṅ tabāh karke yūṅ pāsh pāsh kar diyā ki dubārā uṭh na sake balki gir kar mere pāoṅ tale paṛe rahe.

⁴⁰kyūṅki tū ne mujhe jaṅg karne ke liye quvvat se kamarbastā kar diyā, tū ne mere muḵẖālifoṅ ko mere sāmne jhukā diyā.

⁴¹tū ne mere dushmanoṅ ko mere sāmne se bhagā diyā, aur maiṅ ne nafrat karne vāloṅ ko tabāh kar diyā.

⁴²vah madad ke liye chīḵẖte chillāte rahe, lekin bachāne vālā koī nahīṅ thā. vah rabb ko pukārte rahe, lekin us ne javāb na diyā.

⁴³maiṅ ne unheṅ chūr chūr karke gard kī tarah havā meṅ uṛā diyā. maiṅ ne unheṅ galī meṅ miṭṭī kī tarah pāoṅ tale rauṅd kar rezā rezā kar diyā.

⁴⁴tū ne mujhe merī qaum ke jhagṛoṅ se bachā kar aqvām par merī hukūmat qāim rakhī hai. jis qaum se maiṅ nāvāqif thā vah merī ḵẖidmat kartī hai.

⁴⁵pardesī dabak kar merī ḵẖushāmad karte haiṅ. jūṅ hī maiṅ bāt kartā hūṅ to vah merī sunte haiṅ.

⁴⁶vah himmat hār kar kāṁpte hue apne qilaoṅ se nikal āte haiṅ.

⁴⁷rabb zindā hai! merī chaṭān kī tamjīd ho! mere ḵẖudā kī tāzīm ho jo merī najāt kī chaṭān hai.

⁴⁸vahī ḵẖudā hai jo merā intiqām letā, aqvām ko mere tābe kar detā

⁴⁹aur mujhe mere dushmanoṅ se chhuṭkārā detā hai. yaqīnan tū mujhe mere muḵẖālifoṅ par sarfarāz kartā, mujhe zālimoṅ se bachāe rakhtā hai.

⁵⁰ai rabb, is liye maiṅ aqvām meṅ terī hamd-o-sanā karūṅgā, tere nām kī tārīf meṅ gīt gāūṅgā.

⁵¹kyūṅki rabb apne bādshāh ko baṛī najāt detā hai, vah apne masah kie hue bādshāh dāūd aur us kī aulād par hameshā tak meharbān rahegā.”