2 Samūel 4

ishbosat ko qatl kiyā jātā hai

¹jab sāūl ke beṭe ishbosat ko ittilā milī ki abinair ko habrūn meṅ qatl kiyā gayā hai to vah himmat hār gayā, aur tamām isrāīl saḵẖt ghabrā gayā. ²ishbosat ke do ādmī the jin ke nām bānā aur raikāb the. jab kabhī ishbosat ke faujī chhāpā mārne ke liye nikalte to yah do bhāī un par muqarrar the. un kā bāp rimmon binyamīn ke qabāilī ilāqe ke shahar bairot kā rahane vālā thā. bairot bhī binyamīn meṅ shumār kiyā jātā hai, ³agarchi us ke bāshindoṅ ko hijrat karke jittaim meṅ basnā paṛā jahāṅ vah āj tak pardesī kī haisiyat se rahate haiṅ.

⁴yūntan kā ek beṭā zindā rah gayā thā jis kā nām mifībosat thā. pāṅch sāl kī umr meṅ yazrael se ḵẖabar āī thī ki sāūl aur yūntan māre gae haiṅ. tab us kī āyā use le kar kahīṅ panāh lene ke liye bhāg gaī thī. lekin jaldī kī vajah se mifībosat gir kar laṅgṛā ho gayā thā. us vaqt se us kī donoṅ ṭāṅgeṅ maflūj thīṅ.

⁵ek din rimmon bairotī ke beṭe raikāb aur bānā dopahar ke vaqt ishbosat ke ghar gae. garmī urūj par thī, is liye ishbosat ārām kar rahā thā. ^6-7 donoṅ ādmī yah bahānā pesh karke ghar ke andrūnī kamre meṅ gae ki ham kuchh anāj le jāne ke liye āe haiṅ. jab ishbosat ke kamre meṅ pahuṅche to vah chārpāī par leṭā so rahā thā. yah dekh kar unhoṅ ne us ke peṭ meṅ talvār ghoṁp dī aur phir us kā sar kāṭ kar vahāṅ se salāmatī se nikal āe.

pūrī rāt safar karte karte vah daryā-e-yardan kī vādī meṅ se guzar kar ⁸habrūn pahuṅch gae. vahāṅ unhoṅ ne dāūd ko ishbosat kā sar dikhā kar kahā, “yah dekheṅ, sāūl ke beṭe ishbosat kā sar. āp kā dushman sāūl bār bār āp ko mār dene kī koshish kartā rahā, lekin āj rabb ne us se aur us kī aulād se āp kā badlā liyā hai.”

dāūd qātiloṅ ko sazā detā hai

⁹lekin dāūd ne javāb diyā, “rabb kī hayāt kī qasam jis ne fidyā de kar mujhe har musībat se bachāyā hai, ¹⁰jis ādmī ne mujhe us vaqt siqlāj meṅ sāūl kī maut kī ittilā dī vah bhī samajhtā thā ki maiṅ dāūd ko acchhī ḵẖabar pahuṅchā rahā hūṅ. lekin maiṅ ne use pakaṛ kar sazā-e-maut de dī. yahī thā vah ajr jo use aisī ḵẖabar pahuṅchāne ke ivz milā! ¹¹ab tum sharīr logoṅ ne is se baṛh kar kiyā. tum ne bequsūr ādmī ko us ke apne ghar meṅ us kī apnī chārpāī par qatl kar diyā hai. to kyā merā farz nahīṅ ki tum ko is qatl kī sazā de kar tumheṅ mulk meṅ se miṭā dūṅ?”

¹²dāūd ne donoṅ ko mār dene kā hukm diyā. us ke mulāzimoṅ ne unheṅ mār kar un ke hāthoṅ aur pairoṅ ko kāṭ ḍālā aur un kī lāshoṅ ko habrūn ke tālāb ke qarīb kahīṅ laṭkā diyā. ishbosat ke sar ko unhoṅ ne abinair kī qabr meṅ dafnāyā.