2 Samūel 8

dāūd kī jaṅgeṅ

¹phir aisā vaqt āyā ki dāūd ne filistiyoṅ ko shikast de kar unheṅ apne tābe kar liyā aur hukūmat kī bāgḍor un ke hāthoṅ se chhīn lī.

²us ne moābiyoṅ par bhī fatah pāī. moābī qaidiyoṅ kī qatār banā kar us ne unheṅ zamīn par liṭā diyā. phir rassī kā ṭukṛā le kar us ne qatār kā nāp liyā. jitne log rassī kī lambāī meṅ ā gae vah ek guroh ban gae. yūṅ dāūd ne logoṅ ko gurohoṅ meṅ taqsīm kiyā. phir us ne gurohoṅ ke tīn hisse banā kar do hissoṅ ke sar qalam kie aur ek hisse ko zindā chhoṛ diyā. lekin jitne qaidī chhūṭ gae vah dāūd ke tābe rah kar use ḵẖarāj dete rahe.

³dāūd ne shimālī shām ke shahar zobāh ke bādshāh hadad’azar bin rahob ko bhī harā diyā jab hadad’azar daryā-e-furāt par dubārā qābū pāne ke liye nikal āyā thā. ⁴dāūd ne 1,700 ghuṛasavāroṅ aur 20,000 piyādā sipāhiyoṅ ko giriftār kar liyā. rathoṅ ke 100 ghoṛoṅ ko us ne apne liye mahfūz rakhā, jabki bāqiyoṅ kī us ne koṅcheṅ kāṭ dīṅ tāki vah āindā jaṅg ke liye istemāl na ho sakeṅ.

⁵jab damishq ke arāmī bāshinde zobāh ke bādshāh hadad’azar kī madad karne āe to dāūd ne un ke 22,000 afrād halāk kar die. ⁶phir us ne damishq ke ilāqe meṅ apnī faujī chaukiyāṅ qāim kīṅ. arāmī us ke tābe ho gae aur use ḵẖarāj dete rahe. jahāṅ bhī dāūd gayā vahāṅ rabb ne use kāmyābī baḵẖshī. ⁷sone kī jo ḍhāleṅ hadad’azar ke afsaroṅ ke pās thīṅ unheṅ dāūd yarūshalam le gayā. ⁸hadad’azar ke do shaharoṅ batāh aur berotī se us ne kasrat kā pītal chhīn liyā.

⁹jab hamāt ke bādshāh tūī ko ittilā milī ki dāūd ne hadad’azar kī pūrī fauj par fatah pāī hai ¹⁰to us ne apne beṭe yūrām ko dāūd ke pās bhejā tāki use salām kahe. yūrām ne dāūd ko hadad’azar par fatah ke liye mubārakabād dī, kyūṅki hadad’azar tūī kā dushman thā, aur un ke darmiyān jaṅg rahī thī. yūrām ne dāūd ko sone, chāṅdī aur pītal ke tuhfe bhī pesh kie. ¹¹dāūd ne yah chīzeṅ rabb ke liye maḵẖsūs kar dīṅ. jahāṅ bhī vah dūsrī qaumoṅ par ġālib āyā vahāṅ kī sonā-chāṅdī us ne rabb ke liye maḵẖsūs kar dī. ¹²yūṅ adom, moāb, ammon, philistiyā, amālīq aur zobāh ke bādshāh hadad’azar bin rahob kī sonā-chāṅdī rabb ko pesh kī gaī.

¹³jab dāūd ne namak kī vādī meṅ adomiyoṅ par fatah pāī to us kī shuharat mazīd phail gaī. us jaṅg meṅ dushman ke 18,000 afrād halāk hue. ¹⁴dāūd ne adom ke pūre mulk meṅ apnī faujī chaukiyāṅ qāim kīṅ, aur tamām adomī dāūd ke tābe ho gae. dāūd jahāṅ bhī jātā rabb us kī madad karke use fatah baḵẖshtā.

dāūd ke ālā afsar

¹⁵jitnī der dāūd pūre isrāīl par hukūmat kartā rahā utnī der tak us ne dhyān diyā ki qaum ke har ek shaḵẖs ko insāf mil jāe. ¹⁶yoāb bin zarūyāh fauj par muqarrar thā. yahūsafat bin aḵẖīlūd bādshāh kā mushīr-e-ḵẖās thā. ¹⁷sadoq bin aḵẖītūb aur aḵẖīmlik bin abiyātar imām the. sirāyāh mīramunshī thā. ¹⁸bināyāh bin yahoyadā dāūd ke ḵẖās daste banām karetī-o-faletī kā kaptān thā. dāūd ke beṭe imām the.