2 Samūel 9
dāūd yūntan ke beṭe par meharbānī kartā hai
1ek din dāūd pūchhne lagā, “kyā sāūl ke ḵẖāndān kā koī fard bach gayā hai? maiṅ yūntan kī ḵẖātir us par apnī meharbānī kā izhār karnā chāhatā hūṅ.”
2ek ādmī ko bulāyā gayā jo sāūl ke gharāne kā mulāzim thā. us kā nām zībā thā. dāūd ne savāl kiyā, “kyā āp zībā haiṅ?” zībā ne javāb diyā, “jī, āp kā ḵẖādim hāzir hai.” 3bādshāh ne darayāft kiyā, “kyā sāūl ke ḵẖāndān kā koī fard zindā rah gayā hai? maiṅ us par allāh kī meharbānī kā izhār karnā chāhatā hūṅ.” zībā ne kahā, “yūntan kā ek beṭā ab tak zindā hai. vah donoṅ ṭāṅgoṅ se maflūj hai.” 4dāūd ne pūchhā, “vah kahāṅ hai?” zībā ne javāb diyā, “vah lo-dibār meṅ makīr bin ammīel ke hāṅ rahatā hai.” 5dāūd ne use fauran darbār meṅ bulā liyā.
6yūntan ke jis beṭe kā zikr zībā ne kiyā vah mifībosat thā. jab use dāūd ke sāmne lāyā gayā to us ne muṅh ke bal jhuk kar us kī izzat kī. dāūd ne kahā, “mifībosat!” us ne javāb diyā, “jī, āp kā ḵẖādim hāzir hai.” 7dāūd bolā, “ḍareṅ mat. āj maiṅ āp ke bāp yūntan ke sāth kiyā huā vādā pūrā karke āp par apnī meharbānī kā izhār karnā chāhatā hūṅ. ab suneṅ! maiṅ āp ko āp ke dādā sāūl kī tamām zamīneṅ vāpas kar detā hūṅ. is ke ilāvā maiṅ chāhatā hūṅ ki āp rozānā mere sāth khānā khāyā kareṅ.”
8mifībosat ne dubārā jhuk kar bādshāh kī tāzīm kī, “maiṅ kaun hūṅ ki āp mujh jaise murdā kutte par dhyān de kar aisī meharbānī farmāeṅ!” 9dāūd ne sāūl ke purāne mulāzim zībā ko bulā kar use hidāyat dī, “maiṅ ne āp ke mālik ke pote ko sāūl aur us ke ḵẖāndān kī tamām milkiyat de dī hai. 10ab āp kī zimmādārī yah hai ki āp apne beṭoṅ aur naukroṅ ke sāth us ke khetoṅ ko saṁbhāleṅ tāki us kā ḵẖāndān zamīnoṅ kī paidāvār se guzārā kar sake. lekin mifībosat ḵẖud yahāṅ rah kar mere beṭoṅ kī tarah mere sāth khānā khāyā karegā.” (zībā ke 15 beṭe aur 20 naukar the).
11zībā ne javāb diyā, “maiṅ āp kī ḵẖidmat meṅ hāzir hūṅ. jo bhī hukm āp deṅge maiṅ karne ke liye tayyār hūṅ.” 12-13 us din se zībā ke gharāne ke tamām afrād mifībosat ke mulāzim ho gae. mifībosat ḵẖud jo donoṅ ṭāṅgoṅ se maflūj thā yarūshalam meṅ rihāishpazīr huā aur rozānā dāūd bādshāh ke sāth khānā khātā rahā. us kā ek chhoṭā beṭā thā jis kā nām mīkā thā.