Āmūs 8

pake phal se bharī ṭokrī

¹ek bār phir rabb qādir-e-mutlaq ne mujhe royā dikhāī. maiṅ ne pake hue phal se bharī huī ṭokrī dekhī. ²rabb ne pūchhā, “ai āmūs, tujhe kyā nazar ātā hai?” maiṅ ne javāb diyā, “pake hue phal se bharī huī ṭokrī.” tab rabb ne mujh se farmāyā, “merī qaum kā anjām pak gayā hai. ab se maiṅ unheṅ sazā die baġair nahīṅ chhoṛūṅgā. ³rabb qādir-e-mutlaq farmātā hai ki us din mahal meṅ gīt nahīṅ sunāī deṅge balki āh-o-zārī. chāroṅ taraf nāsheṅ nazar āeṅgī, kyūṅki dushman unheṅ har jagah phaiṅkegā. ḵẖāmosh!”

avām kā istihsāl

⁴ai ġarīboṅ ko kuchalne vālo, ai zarūratmandoṅ ko tabāh karne vālo, suno! ^5-6 tum kahate ho, “nae chāṅd kī īd kab guzar jāegī, sabat kā din kab ḵẖatm hai tāki ham anāj ke godām khol kar ġallā bech sakeṅ? tab ham paimāish karne ke bartan chhoṭe aur tarāzū ke bāṭ halke banāeṅge, sāth sāth saude kā bhāo baṛhāeṅge. ham faroḵẖt karte vaqt anāj ke sāth us kā bhūsā bhī milāeṅge.” apne nājāiz tarīqoṅ se tum thoṛe paisoṅ meṅ balki ek joṛī jūtoṅ ke ivz ġarīboṅ ko ḵẖarīdte ho.

⁷rabb ne yāqūb ke faḵẖar kī qasam khā kar vādā kiyā hai, “jo kuchh un se sarzad huā hai use maiṅ kabhī nahīṅ bhūlūṅgā. ⁸un hī kī vajah se zamīn laraz uṭhegī aur us ke tamām bāshinde mātam kareṅge. jis tarah misr meṅ daryā-e-nīl barsāt ke mausam meṅ sailābī sūrat iḵẖtiyār kar letā hai usī tarah pūrī zamīn uṭhegī. vah nīl kī tarah josh meṅ āegī, phir dubārā utar jāegī.”

⁹rabb qādir-e-mutlaq farmātā hai, “us din maiṅ hone dūṅgā ki sūraj dopahar ke vaqt ġurūb ho jāe. din urūj par hī hogā to zamīn par aṅdherā chhā jāegā. ¹⁰maiṅ tumhāre tahavāroṅ ko mātam meṅ aur tumhāre gītoṅ ko āh-o-bukā meṅ badal dūṅgā. maiṅ sab ko ṭāṭ ke mātmī libās pahanā kar har ek kā sar muṅḍavāūṅgā. log yūṅ mātam kareṅge jaisā un kā vāhid beṭā kūch kar gayā ho. anjām kā vah din kitnā talḵẖ hogā.”

allāh āindā javāb nahīṅ degā

¹¹qādir-e-mutlaq farmātā hai, “aise din āne vāle haiṅ jab maiṅ mulk meṅ kāl bhejūṅgā. lekin log na roṭī aur na pānī se balki allāh kā kalām sunne se maharūm raheṅge. ¹²log laṛkhaṛāte hue ek samundar se dūsre tak aur shimāl se mashriq tak phireṅge tāki rabb kā kalām mil jāe, lekin besūd.

¹³us din ḵẖūbsūrat kuṅvāriyāṅ aur javān mard piyās ke māre behosh ho jāeṅge. ¹⁴jo is vaqt sāmriyā ke makrūh but kī qasam khāte aur kahate haiṅ, ‘ai dān, tere devtā kī hayāt kī qasam’ yā ‘ai bair-sabā, tere devtā kī qasam!’ vah us vaqt gir jāeṅge aur dubārā kabhī nahīṅ uṭheṅge.”