Āstar 1
aḵẖasverus jashn manātā hai
1aḵẖasverus bādshāh kī saltanat bhārat se le kar ethopiyā tak 127 sūboṅ par mushtamil thī. 2jin vāqiāt kā zikr hai vah us vaqt hue jab vah sosan shahar ke qilae se hukūmat kartā thā. 3apnī hukūmat ke tīsre sāl meṅ us ne apne tamām buzurgoṅ aur afsaroṅ kī ziyāfat kī. fārs aur mādī ke faujī afsar aur sūboṅ ke shurfā aur raīs sab sharīk hue. 4shahanshāh ne pūre 180 din tak apnī saltanat kī zabardast daulat aur apnī quvvat kī shān-o-shaukat kā muzāharā kiyā.
5is ke bād us ne sosan ke qilae meṅ rahane vāle tamām logoṅ kī chhoṭe se le kar baṛe tak ziyāfat kī. yah jashn sāt din tak shāhī bāġ ke sahan meṅ manāyā gayā. 6marmar [a] lafzī tarjumā : saṅg-e-jarrāhat, alabasater. ke satūnoṅ ke darmiyān katān ke safed aur qirmizī raṅg ke qīmtī parde laṭkāe gae the, aur vah safed aur arġvānī raṅg kī ḍoriyoṅ ke zarīe satūnoṅ meṅ lage chāṅdī ke chhalloṅ ke sāth baṅdhe hue the. mehamānoṅ ke liye sone aur chāṅdī ke sofe pacchīkārī ke aise farsh par rakhe hue the jis meṅ marmar ke ilāvā mazīd tīn qīmtī patthar istemāl hue the. 7mai sone ke piyāloṅ meṅ pilāī gaī. har piyālā farq aur lāsānī thā, aur bādshāh kī fayyāzī ke mutābiq shāhī mai kī kasrat thī. 8har koī jitnī jī chāhe pī saktā thā, kyūṅki bādshāh ne hukm diyā thā ki sāqī mehamānoṅ kī har ḵẖwāhish pūrī kareṅ.
vashtī malikā kī bartarafī
9is daurān vashtī malikā ne mahal ke andar ḵẖavātīn kī ziyāfat kī. 10sātveṅ din jab bādshāh kā dil mai pī pī kar bahal gayā thā to us ne un sāt ḵẖwājāsarāoṅ ko bulāyā jo ḵẖās us kī ḵẖidmat karte the. un ke nām mahūmān, bizzatā, ḵẖarbūnā,bigtā, abagtā, zitār aur karkas the. 11us ne hukm diyā, “vashtī malikā ko shāhī tāj pahanā kar mere huzūr le āo tāki shurfā aur bāqī mehamānoṅ ko us kī ḵẖūbsūrtī mālūm ho jāe.” kyūṅki vashtī nihāyat ḵẖūbsūrat thī. 12lekin jab ḵẖwājāsarā malikā ke pās gae to us ne āne se inkār kar diyā.
yah sun kar bādshāh āg-bagūlā ho gayā 13aur dānāoṅ se bāt kī jo auqāt ke ālim the, kyūṅki dastūr yah thā ki bādshāh qānūnī muāmloṅ meṅ ulmā se mashvrā kare. 14ālimoṅ ke nām kā kārshīnā, sitār, admātā, tarsīs, maras, marsinā aur mamūkān the. fārs aur mādī ke yah sāt shurfā āzādī se bādshāh ke huzūr ā sakte the aur saltanat meṅ sab se ālā uhdā rakhte the.
15aḵẖasverus ne pūchhā, “qānūn ke lihāz se vashtī malikā ke sāth kyā sulūk kiyā jāe? kyūṅki us ne ḵẖwājāsarāoṅ ke hāth bheje hue shāhī hukm ko nahīṅ mānā.”
16mamūkān ne bādshāh aur dīgar shurfā kī maujūdgī meṅ javāb diyā, “vashtī malikā ne is se na sirf bādshāh kā balki us ke tamām shurfā aur saltanat ke tamām sūboṅ meṅ rahane vālī qaumoṅ kā bhī gunāh kiyā hai. 17kyūṅki jo kuchh us ne kiyā hai vah tamām ḵẖavātīn ko mālūm ho jāegā. phir vah apne shauharoṅ ko haqīr jān kar kaheṅgī, ‘go bādshāh ne vashtī malikā ko apne huzūr āne kā hukm diyā to bhī us ne us ke huzūr āne se inkār kiyā.’ 18āj hī fārs aur mādī ke shurfā kī bīviyāṅ malikā kī yah bāt sun kar apne shauharoṅ se aisā hī sulūk kareṅgī. tab ham zillat aur ġusse ke jāl meṅ ulajh jāeṅge. 19agar bādshāh ko manzūr ho to vah elān kareṅ ki vashtī malikā ko phir kabhī aḵẖasverus bādshāh ke huzūr āne kī ijāzat nahīṅ. aur lāzim hai ki yah elān fārs aur mādī ke qavānīn meṅ darj kiyā jāe tāki use mansūḵẖ na kiyā jā sake. phir bādshāh kisī aur ko malikā kā uhdā deṅ, aisī aurat ko jo ziyādā lāiq ho. 20jab elān pūrī saltanat meṅ kiyā jāegā to tamām aurteṅ apne shauharoṅ kī izzat kareṅgī, ḵẖwāh vah chhoṭe hoṅ yā baṛe.”
21yah bāt bādshāh aur us ke shurfā ko pasand āī. mamūkān ke mashvre ke mutābiq 22aḵẖasverus ne saltanat ke tamām sūboṅ meṅ ḵẖat bheje. har sūbe ko us ke apne tarz-e-taharīr meṅ aur har qaum ko us kī apnī zabān meṅ ḵẖat mil gayā ki har mard apne ghar kā sarparast hai aur ki har ḵẖāndān meṅ shauhar kī zabān bolī jāe.