Āstar 4
mardkī āstar se madad māṅgtā hai
1jab mardkī ko mālūm huā ki kyā huā hai to us ne raṅjish se apne kapṛoṅ ko phāṛ kar ṭāṭ kā libās pahan liyā aur sar par rākh ḍāl lī. phir vah nikal kar buland āvāz se giryā-o-zārī karte karte shahar meṅ se guzrā. 2vah shāhī sahan ke darvāze tak pahuṅch gayā lekin dāḵẖil na huā, kyūṅki mātmī kapṛe pahan kar dāḵẖil hone kī ijāzat nahīṅ thī. 3saltanat ke tamām sūboṅ meṅ jahāṅ jahāṅ bādshāh kā elān pahuṅchā vahāṅ yahūdī ḵẖūb mātam karne aur rozā rakh kar rone aur giryā-o-zārī karne lage. bahut se log ṭāṭ kā libās pahan kar rākh meṅ leṭ gae.
4jab āstar kī naukrāniyoṅ aur ḵẖwājāsarāoṅ ne ā kar use ittilā dī to vah saḵẖt ghabrā gaī. us ne mardkī ko kapṛe bhej die jo vah apne mātmī kapṛoṅ ke badle pahan le, lekin us ne unheṅ qabūl na kiyā. 5tab āstar ne hatāk ḵẖwājāsarā ko mardkī ke pās bhejā tāki vah mālūm kare ki kyā huā hai, mardkī aisī harkateṅ kyūṅ kar rahā hai. (bādshāh ne hatāk ko āstar kī ḵẖidmat karne kī zimmādārī dī thī.)
6hatāk shāhī sahan ke darvāze se nikal kar mardkī ke pās āyā jo ab tak sāth vāle chauk meṅ thā. 7mardkī ne use hāmān kā pūrā mansūbā sunā kar yah bhī batāyā ki hāmān ne yahūdiyoṅ ko halāk karne ke liye shāhī ḵẖazāne ko kitne paise dene kā vādā kiyā hai. 8is ke ilāvā mardkī ne ḵẖwājāsarā ko us shāhī farmān kī kāpī dī jo sosan meṅ sādir huā thā aur jis meṅ yahūdiyoṅ ko nest-o-nābūd karne kā elān kiyā gayā thā. us ne guzārish kī, “yah elān āstar ko dikhā kar unheṅ tamām hālāt se bāḵẖabar kar deṅ. unheṅ hidāyat deṅ ki bādshāh ke huzūr jāeṅ aur us se iltijā karke apnī qaum kī sifārish kareṅ.”
9hatāk vāpas āyā aur mardkī kī bātoṅ kī ḵẖabar dī. 10yah sun kar āstar ne use dubārā mardkī ke pās bhejā tāki use batāe, 11“bādshāh ke tamām mulāzim balki sūboṅ ke tamām bāshinde jānte haiṅ ki jo bhī bulāe baġair mahal ke andrūnī sahan meṅ bādshāh ke pās āe use sazā-e-maut dī jāegī, ḵẖwāh vah mard ho yā aurat. vah sirf is sūrat meṅ bach jāegā ki bādshāh sone kā apnā asā us kī taraf baṛhāe. bāt yah bhī hai ki bādshāh ko mujhe bulāe 30 din ho gae haiṅ.”
12āstar kā paiġām sun kar 13mardkī ne javāb vāpas bhejā, “yah na sochnā ki maiṅ shāhī mahal meṅ rahatī hūṅ, is liye go dīgar tamām yahūdī halāk ho jāeṅ maiṅ bach jāūṅgī. 14agar āp is vaqt ḵẖāmosh raheṅgī to yahūdī kahīṅ aur se rihāī aur chhuṭkārā pā leṅge jabki āp aur āp ke bāp kā gharānā halāk ho jāeṅge. kyā patā hai, shāyad āp isī liye malikā ban gaī haiṅ ki aise mauqe par yahūdiyoṅ kī madad kareṅ.”
15āstar ne mardkī ko javāb bhejā, 16“ṭhīk hai, phir jāeṅ aur sosan meṅ rahane vāle tamām yahūdiyoṅ ko jamā kareṅ. mere liye rozā rakh kar tīn din aur tīn rāt na kuchh khāeṅ, na pieṅ. maiṅ bhī apnī naukrāniyoṅ ke sāth mil kar rozā rakhūṅgī. is ke bād bādshāh ke pās jāūṅgī, go yah qānūn ke ḵẖilāf hai. agar marnā hai to mar hī jāūṅgī.”
17tab mardkī chalā gayā aur vaisā hī kiyā jaisā āstar ne use hidāyat kī thī.