Āstar 5

āstar bādshāh aur hāmān ko dāvat detī hai

¹tīsre din āstar malikā apnā shāhī libās pahane hue mahal ke andrūnī sahan meṅ dāḵẖil huī. yah sahan us hāl ke sāmne thā jis meṅ taḵẖt lagā thā. us vaqt bādshāh darvāze ke muqābil apne taḵẖt par baiṭhā thā. ²āstar ko sahan meṅ khaṛī dekh kar vah ḵẖush huā aur sone ke shāhī asā ko us kī taraf baṛhā diyā. tab āstar qarīb āī aur asā ke sire ko chhū diyā. ³bādshāh ne us se pūchhā, “āstar malikā, kyā bāt hai? āp kyā chāhatī haiṅ? maiṅ use dene ke liye tayyār hūṅ, ḵẖwāh saltanat kā ādhā hissā kyūṅ na ho!”

⁴āstar ne javāb diyā, “maiṅ ne āj ke liye ziyāfat kī tayyāriyāṅ kī haiṅ. agar bādshāh ko manzūr ho to vah hāmān ko apne sāth le kar us meṅ shirkat kareṅ.”

⁵bādshāh ne apne mulāzimoṅ ko hukm diyā, “jaldī karo! hāmān ko bulāo tāki ham āstar kī ḵẖwāhish pūrī kar sakeṅ.” chunāṅche bādshāh aur hāmān āstar kī tayyārshudā ziyāfat meṅ sharīk hue. ⁶mai pī pī kar bādshāh ne āstar se pūchhā, “ab mujhe batāeṅ, āp kyā chāhatī haiṅ? vah āp ko diyā jāegā. apnī daraḵẖwāst pesh kareṅ, kyūṅki maiṅ saltanat ke ādhe hisse tak āp ko dene ke liye tayyār hūṅ.”

⁷āstar ne javāb diyā, “merī daraḵẖwāst aur ārzū yah hai, ⁸agar bādshāh mujh se ḵẖush hoṅ aur unheṅ merī guzārish aur daraḵẖwāst pūrī karnā manzūr ho to vah kal ek bār phir hāmān ke sāth ek ziyāfat meṅ shirkat kareṅ jo maiṅ āp ke liye tayyār karūṅ. phir maiṅ bādshāh ko javāb dūṅgī.”

mardkī ko qatl karne ke liye hāmān kī tayyāriyāṅ

⁹us din jab hāmān mahal se niklā to vah baṛā ḵẖush aur zindādil thā. lekin phir us kī nazar mardkī par paṛ gaī jo shāhī sahan ke darvāze ke pās baiṭhā thā. na vah khaṛā huā, na hāmān ko dekh kar kāṁp gayā. hāmān lāl-pīlā ho gayā, ¹⁰lekin apne āp par qābū rakh kar vah chalā gayā.

ghar pahuṅch kar vah apne dostoṅ aur apnī bīvī zarish ko apne pās bulā kar ¹¹un ke sāmne apnī zabardast daulat aur mut’addid beṭoṅ par sheḵẖī mārne lagā. us ne unheṅ un sāre mauqoṅ kī faharist sunāī jin par bādshāh ne us kī izzat kī thī aur faḵẖar kiyā ki bādshāh ne mujhe tamām bāqī shurfā aur afsaroṅ se ziyādā ūṅchā uhdā diyā hai. ¹²hāmān ne kahā, “na sirf yah, balki āj āstar malikā ne aisī ziyāfat kī jis meṅ bādshāh ke ilāvā sirf maiṅ hī sharīk thā. aur mujhe malikā se kal ke liye bhī dāvat milī hai ki bādshāh ke sāth ziyāfat meṅ shirkat karūṅ. ¹³lekin jab tak mardkī yahūdī shāhī mahal ke sahan ke darvāze par baiṭhā nazar ātā hai maiṅ chain kā sāṅs nahīṅ lūṅgā.”

¹⁴us kī bīvī zarish aur bāqī azīzoṅ ne mashvrā diyā, “sūlī banvāeṅ jis kī ūṅchāī 75 fuṭ ho. phir kal subah-savere bādshāh ke pās jā kar guzārish kareṅ ki mardkī ko us se laṭkāyā jāe. is ke bād āp tasallī se bādshāh ke sāth jā kar ziyāfat ke maze le sakte haiṅ.” yah mansūbā hāmān ko acchhā lagā, aur us ne sūlī tayyār karvāī.