Āstar 6

bādshāh mardkī kī izzat kartā hai

¹us rāt bādshāh ko nīṅd na āī, is liye us ne hukm diyā ki vah kitāb lāī jāe jis meṅ rozānā hukūmat ke aham vāqiāt likhe jāte haiṅ. us meṅ se paṛhā gayā ²to is kā bhī zikr huā ki mardkī ne kis tarah bādshāh ko donoṅ ḵẖwājāsarāoṅ bigtānā aur tarash ke hāth se bachāyā thā, ki jab shāhī kamroṅ ke in paharedāroṅ ne aḵẖasverus ko qatl karne kī sāzish kī to mardkī ne bādshāh ko ittilā dī thī. ³jab yah vāqiā paṛhā gayā to bādshāh ne pūchhā, “is ke ivz mardkī ko kyā ezāz diyā gayā?” mulāzimoṅ ne javāb diyā, “kuchh bhī nahīṅ diyā gayā.”

⁴usī lamhe hāmān mahal ke bairūnī sahan meṅ ā pahuṅchā thā tāki bādshāh se mardkī ko us sūlī se laṭkāne kī ijāzat māṅge jo us ne us ke liye banvāī thī. bādshāh ne savāl kiyā, “bāhar sahan meṅ kaun hai?” ⁵mulāzimoṅ ne javāb diyā, “hāmān hai.” bādshāh ne hukm diyā, “use andar āne do.”

⁶hāmān dāḵẖil huā to bādshāh ne us se pūchhā, “us ādmī ke liye kyā kiyā jāe jis kī bādshāh ḵẖās izzat karnā chāhe?” hāmān ne sochā, “vah merī hī bāt kar rahā hai! kyūṅki merī nisbat kaun hai jis kī bādshāh ziyādā izzat karnā chāhatā hai?” ⁷chunāṅche us ne javāb diyā, “jis ādmī kī bādshāh ḵẖās izzat karnā chāheṅ ⁸us ke liye shāhī libās chunā jāe jo bādshāh ḵẖud pahan chuke hoṅ. ek ghoṛā bhī lāyā jāe jis kā sar shāhī sajāvaṭ se sajā huā ho aur jis par bādshāh ḵẖud savār ho chuke hoṅ. ⁹yah libās aur ghoṛā bādshāh ke ālātrīn afsaroṅ meṅ se ek ke sapurd kiyā jāe. vahī us shaḵẖs ko jis kī bādshāh ḵẖās izzat karnā chāhate haiṅ kapṛe pahanāe aur use ghoṛe par biṭhā kar shahar ke chauk meṅ se guzāre. sāth sāth vah us ke āge āge chal kar elān kare, ‘yahī us ke sāth kiyā jātā hai jis kī izzat bādshāh karnā chāhate haiṅ’.”

¹⁰aḵẖasverus ne hāmān se kahā, “phir jaldī kareṅ, mardkī yahūdī shāhī sahan ke darvāze ke pās baiṭhā hai. shāhī libās aur ghoṛā maṅgvā kar us ke sāth aisā hī sulūk kareṅ. jo bhī karne kā mashvrā āp ne diyā vahī kuchh kareṅ, aur dhyān deṅ ki is meṅ kisī bhī chīz kī kamī na ho!”

¹¹hāmān ko aisā hī karnā paṛā. shāhī libās ko chun kar us ne use mardkī ko pahanā diyā. phir use bādshāh ke apne ghoṛe par biṭhā kar us ne use shahar ke chauk meṅ se guzārā. sāth sāth vah us ke āge āge chal kar elān kartā rahā, “yahī us shaḵẖs ke sāth kiyā jātā hai jis kī izzat bādshāh karnā chāhatā hai.” ¹²phir mardkī shāhī sahan ke darvāze ke pās vāpas āyā.

lekin hāmān udās ho kar jaldī se apne ghar chalā gayā. sharm ke māre us ne muṅh par kapṛā ḍāl liyā thā. ¹³us ne apnī bīvī zarish aur apne dostoṅ ko sab kuchh sunāyā jo us ke sāth huā thā. tab us ke mushīroṅ aur bīvī ne us se kahā, “āp kā beṛā ġarq ho gayā hai, kyūṅki mardkī yahūdī hai aur āp us ke sāmne shikast khāne lage haiṅ. āp us kā muqāblā nahīṅ kar sakeṅge.”

¹⁴vah abhī us se bāt kar hī rahe the ki bādshāh ke ḵẖwājāsarā pahuṅch gae aur use le kar jaldī jaldī āstar ke pās pahuṅchāyā. ziyāfat tayyār thī.