Ḵẖurūj 15

mūsā kā gīt

¹tab mūsā aur isrāīliyoṅ ne rabb ke liye yah gīt gāyā,

“maiṅ rabb kī tamjīd meṅ gīt gāūṅgā, kyūṅki vah nihāyat azīm hai. ghoṛe aur us ke savār ko us ne samundar meṅ paṭaḵẖ diyā hai.

²rabb merī quvvat aur merā gīt hai, vah merī najāt ban gayā hai. vahī merā ḵẖudā hai, aur maiṅ us kī tārīf karūṅgā. vahī mere bāp kā ḵẖudā hai, aur maiṅ us kī tāzīm karūṅgā.

³rabb sūrmā hai, rabb us kā nām hai.

⁴firaaun ke rathoṅ aur fauj ko us ne samundar meṅ paṭaḵẖ diyā to bādshāh ke behtarīn afsarān bahar-e-qulzum meṅ ḍūb gae.

⁵gahare pānī ne unheṅ ḍhāṅk liyā, aur vah patthar kī tarah samundar kī tah tak utar gae.

⁶ai rabb, tere dahane hāth kā jalāl baṛī qudrat se zāhir hotā hai. ai rabb, terā dahanā hāth dushman ko chiknā-chūr kar detā hai.

⁷jo tere ḵẖilāf uṭh khaṛe hote haiṅ unheṅ tū apnī azmat kā izhār karke zamīn par paṭaḵẖ detā hai. terā ġazab un par ān paṛtā hai to vah āg meṅ bhūse kī tarah jal jāte haiṅ.

⁸tū ne ġusse meṅ ā kar phūṅk mārī to pānī ḍher kī sūrat meṅ jamā ho gayā. bahatā pānī ṭhos dīvār ban gayā, samundar gaharāī tak jam gayā.

⁹dushman ne ḍīṅg mār kar kahā, ‘maiṅ un kā pīchhā karke unheṅ pakaṛ lūṅgā, maiṅ un kā lūṭā huā māl taqsīm karūṅgā. merī lālchī jān un se ser ho jāegī, maiṅ apnī talvār khaiṅch kar unheṅ halāk karūṅgā.’

¹⁰lekin tū ne un par phūṅk mārī to samundar ne unheṅ ḍhāṅk liyā, aur vah sīse kī tarah zordār maujoṅ meṅ ḍūb gae.

¹¹ai rabb, kaun sā mābūd terī mānind hai? kaun terī tarah jalālī aur quddūs hai? kaun terī tarah hairat’aṅgez kām kartā aur azīm mojize dikhātā hai? koī bhī nahīṅ.

¹²tū ne apnā dahanā hāth uṭhāyā to zamīn hamāre dushmanoṅ ko nigal gaī.

¹³apnī shafqat se tū ne ivzānā de kar apnī qaum ko chhuṭkārā diyā aur us kī rāhanumāī kī hai, apnī qudrat se tū ne use apnī muqaddas sukūnatgāh tak pahuṅchāyā hai.

¹⁴yah sun kar dīgar qaumeṅ kāṁp uṭheṅ, filistī ḍar ke māre pech-o-tāb khāne lage.

¹⁵adom ke raīs saham gae, moāb ke rāhanumā par kapkapī tārī ho gaī, aur kan’ān ke tamām bāshinde himmat hār gae.

¹⁶dahshat aur ḵẖauf un par chhā gayā. terī azīm qudrat ke bāis vah patthar kī tarah jam gae. ai rabb, vah na hile jab tak terī qaum guzar na gaī. vah behiss-o-harkat rahe jab tak terī ḵẖarīdī huī qaum guzar na gaī.

¹⁷ai rabb, tū apne logoṅ ko le kar paudoṅ kī tarah apne maurūsī pahāṛ par lagāegā, us jagah par jo tū ne apnī sukūnat ke liye chun lī hai, jahāṅ tū ne apne hāthoṅ se apnā maqdis tayyār kiyā hai.

¹⁸rabb abad tak bādshāh hai!”

¹⁹jab firaaun ke ghoṛe, rath aur ghuṛsavār samundar meṅ chale gae to rabb ne unheṅ samundar ke pānī se ḍhāṅk liyā. lekin isrāīlī ḵẖushk zamīn par samundar meṅ se guzar gae. ²⁰tab hārūn kī bahan mariyam jo nabiyā thī ne daf liyā, aur bāqī tamām aurteṅ bhī daf le kar us ke pīchhe ho līṅ. sab gāne aur nāchne lagīṅ. mariyam ne yah gā kar un kī rāhanumāī kī,

²¹“rabb kī tamjīd meṅ gīt gāo, kyūṅki vah nihāyat azīm hai. ghoṛe aur us ke savār ko us ne samundar meṅ paṭaḵẖ diyā hai.”

mārā aur elīm ke chashme

²²mūsā ke kahane par isrāīlī bahar-e-qulzum se ravānā ho kar dasht-e-shūr meṅ chale gae. vahāṅ vah tīn din tak safar karte rahe. is daurān unheṅ pānī na milā. ²³āḵẖirkār vah mārā pahuṅche jahāṅ pānī dastayāb thā. lekin vah kaṛvā thā, is liye maqām kā nām mārā yānī kaṛavāhaṭ paṛ gayā. ²⁴yah dekh kar log mūsā ke ḵẖilāf buṛbuṛā kar kahane lage, “ham kyā pieṅ?” ²⁵mūsā ne madad ke liye rabb se iltijā kī to us ne use lakṛī kā ek ṭukṛā dikhāyā. jab mūsā ne yah lakṛī pānī meṅ ḍālī to pānī kī kaṛavāhaṭ ḵẖatm ho gaī.

mārā meṅ rabb ne apnī qaum ko qavānīn die. vahāṅ us ne unheṅ āzmāyā bhī. ²⁶us ne kahā, “ġaur se rabb apne ḵẖudā kī āvāz suno! jo kuchh us kī nazar meṅ durust hai vahī karo. us ke ahkām par dhyān do aur us kī tamām hidāyāt par amal karo. phir maiṅ tum par vah bīmāriyāṅ nahīṅ lāūṅgā jo misriyoṅ par lāyā thā, kyūṅki maiṅ rabb hūṅ jo tujhe shifā detā hūṅ.” ²⁷phir isrāīlī ravānā ho kar elīm pahuṅche jahāṅ 12 chashme aur khajūr ke 70 daraḵẖt the. vahāṅ unhoṅ ne pānī ke qarīb apne ḵẖaime lagāe.