Azrā 5

rabb ke ghar kī tāmīr dubārā shurū hotī hai

¹ek din do nabī banām hajjī aur zakariyāh bin iddū uṭh kar isrāīl ke ḵẖudā ke nām meṅ jo un ke ūpar thā yahūdāh aur yarūshalam ke yahūdiyoṅ ke sāmne nubuvvat karne lage. ²un ke hausalāafzā alfāz sun kar zarubbābal bin siyāltīel aur yashūa bin yūsdaq ne faislā kiyā ki ham dubārā yarūshalam meṅ allāh ke ghar kī tāmīr shurū kareṅge. donoṅ nabī is meṅ un ke sāth the aur un kī madad karte rahe.

³lekin jūṅ hī kām shurū huā to daryā-e-furāt ke maġribī ilāqe ke gavarnar tattnī aur shatar-boznī apne hamḵẖidmat afsaroṅ samet yarūshalam pahuṅche. unhoṅ ne pūchhā, “kis ne āp ko yah ghar banāne aur is kā ḍhāṅchā takmīl tak pahuṅchāne kī ijāzat dī? ⁴is kām ke liye zimmādār ādmiyoṅ ke nām hameṅ batāeṅ!” ⁵lekin un kā ḵẖudā yahūdāh ke buzurgoṅ kī nigrānī kar rahā thā, is liye unheṅ rokā na gayā. kyūṅki logoṅ ne sochā ki pahale dārā bādshāh ko ittilā dī jāe. jab tak vah faislā na kare us vaqt tak kām rokā na jāe.

⁶phir daryā-e-furāt ke maġribī ilāqe ke gavarnar tattnī, shatar-boznī aur un ke hamḵẖidmat afsaroṅ ne dārā bādshāh ko zail kā ḵẖat bhejā,

⁷“dārā bādshāh ko dil kī gaharāiyoṅ se salām kahate haiṅ! ⁸shahanshāh ko ilm ho ki sūbā yahūdāh meṅ jā kar ham ne dekhā ki vahāṅ azīm ḵẖudā kā ghar banāyā jā rahā hai. us ke liye baṛe tarāshe hue patthar istemāl ho rahe haiṅ aur dīvāroṅ meṅ shahatīr lagāe jā rahe haiṅ. log baṛī jāṅfishānī se kām kar rahe haiṅ, aur makān un kī mehanat ke bāis tezī se ban rahā hai. ⁹ham ne buzurgoṅ se pūchhā, ‘kis ne āp ko yah ghar banāne aur is kā ḍhāṅchā takmīl tak pahuṅchāne kī ijāzat dī hai?’ ¹⁰ham ne un ke nām bhī mālūm kie tāki likh kar āp ko bhej sakeṅ. ¹¹unhoṅ ne hameṅ javāb diyā,

‘ham āsmān-o-zamīn ke ḵẖudā ke ḵẖādim haiṅ, aur ham us ghar ko az sar-e-nau tāmīr kar rahe haiṅ jo bahut sāl pahale yahāṅ qāim thā. isrāīl ke ek azīm bādshāh ne use qadīm zamāne meṅ banā kar takmīl tak pahuṅchāyā thā. ¹²lekin hamāre bāpdādā ne āsmān ke ḵẖudā ko taish dilāyā, aur natīje meṅ us ne unheṅ bābal ke bādshāh nabūkadnazzar ke havāle kar diyā jis ne rabb ke ghar ko tabāh kar diyā aur qaum ko qaid karke bābal meṅ basā diyā. ¹³lekin bād meṅ jab ḵẖoras bādshāh ban gayā to us ne apnī hukūmat ke pahale sāl meṅ hukm diyā ki allāh ke is ghar ko dubārā tāmīr kiyā jāe. ¹⁴sāth sāth us ne sone-chāṅdī kī vah chīzeṅ vāpas kar dīṅ jo nabūkadnazzar ne yarūshalam meṅ allāh ke ghar se lūṭ kar bābal ke mandir meṅ rakh dī thīṅ. ḵẖoras ne yah chīzeṅ ek ādmī ke sapurd kar dīṅ jis kā nām shesbazzar thā aur jise us ne yahūdāh kā gavarnar muqarrar kiyā thā. ¹⁵us ne use hukm diyā ki sāmān ko yarūshalam le jāo aur rabb ke ghar ko purānī jagah par az sar-e-nau tāmīr karke yah chīzeṅ us meṅ mahfūz rakho. ¹⁶tab shesbazzar ne yarūshalam ā kar allāh ke ghar kī bunyād rakhī. usī vaqt se yah imārat zer-e-tāmīr hai, agarchi yah āj tak mukammal nahīṅ huī.’

¹⁷chunāṅche agar shahanshāh ko manzūr ho to vah taftīsh kareṅ ki kyā bābal ke shāhī daftar meṅ koī aisī dastāvez maujūd hai jo is bāt kī tasdīq kare ki ḵẖoras bādshāh ne yarūshalam meṅ rabb ke ghar ko az sar-e-nau tāmīr karne kā hukm diyā. guzārish hai ki shahanshāh hameṅ apnā faislā pahuṅchā deṅ.”