Paidāish 22

ibrāhīm kī āzmāish

¹kuchh arse ke bād allāh ne ibrāhīm ko āzmāyā. us ne us se kahā, “ibrāhīm!” us ne javāb diyā, “jī, maiṅ hāzir hūṅ.” ²allāh ne kahā, “apne iklaute beṭe ishāq ko jise tū piyār kartā hai sāth le kar moriyāh ke ilāqe meṅ chalā jā. vahāṅ maiṅ tujhe ek pahāṛ dikhāūṅgā. us par apne beṭe ko qurbān kar de. use zabah karke qurbāngāh par jalā denā.”

³subah-savere ibrāhīm uṭhā aur apne gadhe par zīn kasā. us ne apne sāth do naukroṅ aur apne beṭe ishāq ko liyā. phir vah qurbānī ko jalāne ke liye lakṛī kāṭ kar us jagah kī taraf ravānā huā jo allāh ne use batāī thī. ⁴safar karte karte tīsre din qurbānī kī jagah ibrāhīm ko dūr se nazar āī. ⁵us ne naukroṅ se kahā, “yahāṅ gadhe ke pās ṭhaharo. maiṅ laṛke ke sāth vahāṅ jā kar parastish karūṅgā. phir ham tumhāre pās vāpas ā jāeṅge.”

⁶ibrāhīm ne qurbānī ko jalāne ke liye lakṛiyāṅ ishāq ke kaṅdhoṅ par rakh dīṅ aur ḵẖud chhurī aur āg jalāne ke liye aṅgāroṅ kā bartan uṭhāyā. donoṅ chal die. ⁷ishāq bolā, “abbū!” ibrāhīm ne kahā, “jī beṭā.” “abbū, āg aur lakṛiyāṅ to hamāre pās haiṅ, lekin qurbānī ke liye bheṛ yā bakrī kahāṅ hai?” ⁸ibrāhīm ne javāb diyā, “allāh ḵẖud qurbānī ke liye jānvar muhayyā karegā, beṭā.” vah āge baṛh gae.

⁹chalte chalte vah us maqām par pahuṅche jo allāh ne us par zāhir kiyā thā. ibrāhīm ne vahāṅ qurbāngāh banāī aur us par lakṛiyāṅ tartīb se rakh dīṅ. phir us ne ishāq ko bāṅdh kar lakṛiyoṅ par rakh diyā ¹⁰aur chhurī pakaṛ lī tāki apne beṭe ko zabah kare. ¹¹ain usī vaqt rabb ke farishte ne āsmān par se use āvāz dī, “ibrāhīm, ibrāhīm!” ibrāhīm ne kahā, “jī, maiṅ hāzir hūṅ.” ¹²farishte ne kahā, “apne beṭe par hāth na chalā, na us ke sāth kuchh kar. ab maiṅ ne jān liyā hai ki tū allāh kā ḵẖauf rakhtā hai, kyūṅki tū apne iklaute beṭe ko bhī mujhe dene ke liye tayyār hai.”

¹³achānak ibrāhīm ko ek meṅḍhā nazar āyā jis ke sīṅg guṅjān jhāṛiyoṅ meṅ phaṅse hue the. ibrāhīm ne use zabah karke apne beṭe kī jagah qurbānī ke taur par jalā diyā. ¹⁴us ne us maqām kā nām “rabb muhayyā kartā hai” rakhā. is liye āj tak kahā jātā hai, “rabb ke pahāṛ par muhayyā kiyā jātā hai.”

¹⁵rabb ke farishte ne ek bār phir āsmān par se pukār kar us se bāt kī. ¹⁶“rabb kā farmān hai, merī zāt kī qasam, chūṅki tū ne yah kiyā aur apne iklaute beṭe ko mujhe pesh karne ke liye tayyār thā ¹⁷is liye maiṅ tujhe barkat dūṅgā aur terī aulād ko āsmān ke sitāroṅ aur sāhil kī ret kī tarah beshumār hone dūṅgā. terī aulād apne dushmanoṅ ke shaharoṅ ke darvāzoṅ par qabzā karegī. ¹⁸chūṅki tū ne merī sunī is liye terī aulād se duniyā kī tamām qaumeṅ barkat pāeṅgī.”

¹⁹is ke bād ibrāhīm apne naukroṅ ke pās vāpas āyā, aur vah mil kar bair-sabā lauṭe. vahāṅ ibrāhīm ābād rahā.

²⁰in vāqiāt ke bād ibrāhīm ko ittilā milī, “āp ke bhāī nahūr kī bīvī milkāh ke hāṅ bhī beṭe paidā hue haiṅ. ²¹us ke pahalauṭhe ūz ke bād būz, qamūel (arām kā bāp), ²²kasad, hazū, fildās, idlāf aur batūel paidā hue haiṅ.” ²³milkāh aur nahūr ke hāṅ yah āṭh beṭe paidā hue. (batūel ribqā kā bāp thā). ²⁴nahūr kī haram kā nām rūmā thā. us ke hāṅ bhī beṭe paidā hue jin ke nām tibaḵẖ, jāham, taḵẖas aur mākā haiṅ.