Paidāish 24

ishāq aur ribqā

¹ibrāhīm ab bahut būṛhā ho gayā thā. rabb ne use har lihāz se barkat dī thī. ²ek din us ne apne ghar ke sab se buzurg naukar se jo us kī jāydād kā pūrā intizām chalātā thā bāt kī. “qasam ke liye apnā hāth merī rān ke nīche rakho. ³rabb kī qasam khāo jo āsmān-o-zamīn kā ḵẖudā hai ki tum in kan’āniyoṅ meṅ se jin ke darmiyān maiṅ rahatā hūṅ mere beṭe ke liye bīvī nahīṅ lāoge ⁴balki mere vatan meṅ mere rishtedāroṅ ke pās jāoge aur un hī meṅ se mere beṭe ke liye bīvī lāoge.” ⁵us ke naukar ne kahā, “shāyad vah aurat mere sāth yahāṅ ānā na chāhe. kyā maiṅ is sūrat meṅ āp ke beṭe ko us vatan meṅ vāpas le jāūṅ jis se āp nikle haiṅ?” ⁶ibrāhīm ne kahā, “ḵẖabardār! use hargiz vāpas na le jānā. ⁷rabb jo āsmān kā ḵẖudā hai apnā farishtā tumhāre āge bhejegā, is liye tum vahāṅ mere beṭe ke liye bīvī chunne meṅ zarūr kāmyāb hoge. kyūṅki vahī mujhe mere bāp ke ghar aur mere vatan se yahāṅ le āyā hai, aur usī ne qasam khā kar mujh se vādā kiyā hai ki maiṅ kan’ān kā yah mulk terī aulād ko dūṅgā. ⁸agar vahāṅ kī aurat yahāṅ ānā na chāhe to phir tum apnī qasam se āzād hoge. lekin kisī sūrat meṅ bhī mere beṭe ko vahāṅ vāpas na le jānā.”

⁹ibrāhīm ke naukar ne apnā hāth us kī rān ke nīche rakh kar qasam khāī ki maiṅ sab kuchh aisā hī karūṅgā. ¹⁰phir vah apne āqā ke das ūṅṭoṅ par qīmtī tuhfe lād kar masoputāmiyā kī taraf ravānā huā. chalte chalte vah nahūr ke shahar pahuṅch gayā.

¹¹us ne ūṅṭoṅ ko shahar ke bāhar kueṅ ke pās biṭhāyā. shām kā vaqt thā jab aurteṅ kueṅ ke pās ā kar pānī bhartī thīṅ. ¹²phir us ne duā kī, “ai rabb mere āqā ibrāhīm ke ḵẖudā, mujhe āj kāmyābī baḵẖsh aur mere āqā ibrāhīm par meharbānī kar. ¹³ab maiṅ is chashme par khaṛā hūṅ, aur shahar kī beṭiyāṅ pānī bharne ke liye ā rahī haiṅ. ¹⁴maiṅ un meṅ se kisī se kahūṅgā, ‘zarā apnā ghaṛā nīche karke mujhe pānī pilāeṅ.’ agar vah javāb de, ‘pī leṅ, maiṅ āp ke ūṅṭoṅ ko bhī pānī pilā detī hūṅ,’ to vah vahī hogī jise tū ne apne ḵẖādim ishāq ke liye chun rakhā hai. agar aisā huā to maiṅ jān lūṅgā ki tū ne mere āqā par meharbānī kī hai.”

¹⁵vah abhī duā kar hī rahā thā ki ribqā shahar se nikal āī. us ke kaṅdhe par ghaṛā thā. vah batūel kī beṭī thī (batūel ibrāhīm ke bhāī nahūr kī bīvī milkāh kā beṭā thā). ¹⁶ribqā nihāyat ḵẖūbsūrat javān laṛkī thī, aur vah kuṅvārī bhī thī. vah chashme tak utrī, apnā ghaṛā bharā aur phir vāpas ūpar āī.

¹⁷ibrāhīm kā naukar dauṛ kar us se milā. us ne kahā, “zarā mujhe apne ghaṛe se thoṛā sā pānī pilāeṅ.” ¹⁸ribqā ne kahā, “janāb, pī leṅ.” jaldī se us ne apne ghaṛe ko kaṅdhe par se utār kar hāth meṅ pakṛā tāki vah pī sake. ¹⁹jab vah pīne se fāriġ huā to ribqā ne kahā, “maiṅ āp ke ūṅṭoṅ ke liye bhī pānī le ātī hūṅ. vah bhī pūre taur par apnī piyās bujhāeṅ.” ²⁰jaldī se us ne apne ghaṛe kā pānī hauz meṅ uṅḍel diyā aur phir bhāg kar kueṅ se itnā pānī lātī rahī ki tamām ūṅṭoṅ kī piyās bujh gaī.

²¹itne meṅ ibrāhīm kā ādmī ḵẖāmoshī se use dekhtā rahā, kyūṅki vah jānnā chāhatā thā ki kyā rabb mujhe safar kī kāmyābī baḵẖshegā yā nahīṅ. ²²ūṅṭ pānī pīne se fāriġ hue to us ne ribqā ko sone kī ek nath aur do kaṅgan die. nath kā vazan taqrīban 6 grām thā aur kaṅganoṅ kā 120 grām.

²³us ne pūchhā, “āp kis kī beṭī haiṅ? kyā us ke hāṅ itnī jagah hai ki ham vahāṅ rāt guzār sakeṅ?”

²⁴ribqā ne javāb diyā, “merā bāp batūel hai. vah nahūr aur milkāh kā beṭā hai. ²⁵hamāre pās bhūsā aur chārā hai. rāt guzārne ke liye bhī kāfī jagah hai.” ²⁶yah sun kar ibrāhīm ke naukar ne rabb ko sijdā kiyā. ²⁷us ne kahā, “mere āqā ibrāhīm ke ḵẖudā kī tamjīd ho jis ke karam aur vafādārī ne mere āqā ko nahīṅ chhoṛā. rabb ne mujhe sīdhā mere mālik ke rishtedāroṅ tak pahuṅchāyā hai.”

²⁸laṛkī bhāg kar apnī māṅ ke ghar chalī gaī. vahāṅ us ne sab kuchh batā diyā jo huā thā. ^29-30 jab ribqā ke bhāī lāban ne nath aur bahan kī kalāiyoṅ meṅ kaṅganoṅ ko dekhā aur vah sab kuchh sunā jo ibrāhīm ke naukar ne ribqā ko batāyā thā to vah fauran kueṅ kī taraf dauṛā.

ibrāhīm kā naukar ab tak ūṅṭoṅ samet vahāṅ khaṛā thā. ³¹lāban ne kahā, “rabb ke mubārak bande, mere sāth āeṅ. āp yahāṅ shahar ke bāhar kyūṅ khaṛe haiṅ? maiṅ ne apne ghar meṅ āp ke liye sab kuchh tayyār kiyā hai. āp ke ūṅṭoṅ ke liye bhī kāfī jagah hai.” ³²vah naukar ko le kar ghar pahuṅchā. ūṅṭoṅ se sāmān utārā gayā, aur un ko bhūsā aur chārā diyā gayā. pānī bhī lāyā gayā tāki ibrāhīm kā naukar aur us ke ādmī apne pāoṅ dhoeṅ.

³³lekin jab khānā ā gayā to ibrāhīm ke naukar ne kahā, “is se pahale ki maiṅ khānā khāūṅ lāzim hai ki apnā muāmalā pesh karūṅ.” lāban ne kahā, “batāeṅ apnī bāt.” ³⁴us ne kahā, “maiṅ ibrāhīm kā naukar hūṅ. ³⁵rabb ne mere āqā ko bahut barkat dī hai. vah bahut amīr ban gayā hai. rabb ne use kasrat se bheṛ-bakriyāṅ, gāy-bail, sonā-chāṅdī, ġulām aur lauṅḍiyāṅ, ūṅṭ aur gadhe die haiṅ. ³⁶jab mere mālik kī bīvī būṛhī ho gaī thī to us ke beṭā paidā huā thā. ibrāhīm ne use apnī pūrī milkiyat de dī hai. ³⁷lekin mere āqā ne mujh se kahā, ‘qasam khāo ki tum in kan’āniyoṅ meṅ se jin ke darmiyān maiṅ rahatā hūṅ mere beṭe ke liye bīvī nahīṅ lāoge ³⁸balki mere bāp ke gharāne aur mere rishtedāroṅ ke pās jā kar us ke liye bīvī lāoge.’ ³⁹maiṅ ne apne mālik se kahā, ‘shāyad vah aurat mere sāth ānā na chāhe.’ ⁴⁰us ne kahā, ‘rabb jis ke sāmne maiṅ chaltā rahā hūṅ apne farishte ko tumhāre sāth bhejegā aur tumheṅ kāmyābī baḵẖshegā. tumheṅ zarūr mere rishtedāroṅ aur mere bāp ke gharāne se mere beṭe ke liye bīvī milegī. ⁴¹lekin agar tum mere rishtedāroṅ ke pās jāo aur vah inkār kareṅ to phir tum apnī qasam se āzād hoge.’ ⁴²āj jab maiṅ kueṅ ke pās āyā to maiṅ ne duā kī, ‘ai rabb, mere āqā ke ḵẖudā, agar terī marzī ho to mujhe is mishan meṅ kāmyābī baḵẖsh jis ke liye maiṅ yahāṅ āyā hūṅ. ⁴³ab maiṅ is kueṅ ke pās khaṛā hūṅ. jab koī javān aurat shahar se nikal kar yahāṅ āe to maiṅ us se kahūṅgā, “zarā mujhe apne ghaṛe se thoṛā sā pānī pilāeṅ.” ⁴⁴agar vah kahe, “pī leṅ, maiṅ āp ke ūṅṭoṅ ke liye bhī pānī le āūṅgī” to is kā matlab yah ho ki tū ne use mere āqā ke beṭe ke liye chun liyā hai ki us kī bīvī ban jāe ‪’

⁴⁵maiṅ abhī dil meṅ yah duā kar rahā thā ki ribqā shahar se nikal āī. us ke kaṅdhe par ghaṛā thā. vah chashme tak utrī aur apnā ghaṛā bhar liyā. maiṅ ne us se kahā, ‘zarā mujhe pānī pilāeṅ.’ ⁴⁶javāb meṅ us ne jaldī se apne ghaṛe ko kaṅdhe par se utār kar kahā, ‘pī leṅ, maiṅ āp ke ūṅṭoṅ ko bhī pānī pilātī hūṅ.’ maiṅ ne pānī piyā, aur us ne ūṅṭoṅ ko bhī pānī pilāyā. ⁴⁷phir maiṅ ne us se pūchhā, ‘āp kis kī beṭī haiṅ?’ us ne javāb diyā, ‘merā bāp batūel hai. vah nahūr aur milkāh kā beṭā hai.’ phir maiṅ ne us kī nāk meṅ nath aur us kī kalāiyoṅ meṅ kaṅgan pahanā die. ⁴⁸tab maiṅ ne rabb ko sijdā karke apne āqā ibrāhīm ke ḵẖudā kī tamjīd kī jis ne mujhe sīdhā mere mālik kī bhatījī tak pahuṅchāyā tāki vah ishāq kī bīvī ban jāe

⁴⁹ab mujhe batāeṅ, kyā āp mere āqā par apnī meharbānī aur vafādārī kā izhār karnā chāhate haiṅ? agar aisā hai to ribqā kī ishāq ke sāth shādī qabūl kareṅ. agar āp muttafiq nahīṅ haiṅ to mujhe batāeṅ tāki maiṅ koī aur qadam uṭhā sakūṅ.”

⁵⁰lāban aur batūel ne javāb diyā, “yah bāt rabb kī taraf se hai, is liye ham kisī tarah bhī inkār nahīṅ kar sakte. ⁵¹ribqā āp ke sāmne hai. use le jāeṅ. vah āp ke mālik ke beṭe kī bīvī ban jāe jis tarah rabb ne farmāyā hai.” ⁵²yah sun kar ibrāhīm ke naukar ne rabb ko sijdā kiyā. ⁵³phir us ne sone aur chāṅdī ke zevrāt aur mahaṅge malbūsāt apne sāmān meṅ se nikāl kar ribqā ko die. ribqā ke bhāī aur māṅ ko bhī qīmtī tuhfe mile.

⁵⁴is ke bād us ne apne hamsafroṅ ke sāth shām kā khānā khāyā. vah rāt ko vahīṅ ṭhahare. agle din jab uṭhe to naukar ne kahā, “ab hameṅ ijāzat deṅ tāki apne āqā ke pās lauṭ jāeṅ.” ⁵⁵ribqā ke bhāī aur māṅ ne kahā, “ribqā kuchh din aur hamāre hāṅ ṭhahare. phir āp jāeṅ.” ⁵⁶lekin us ne un se kahā, “ab der na kareṅ, kyūṅki rabb ne mujhe mere mishan meṅ kāmyābī baḵẖshī hai. mujhe ijāzat deṅ tāki apne mālik ke pās vāpas jāūṅ.” ⁵⁷unhoṅ ne kahā, “chaleṅ, ham laṛkī ko bulā kar usī se pūchh lete haiṅ.”

⁵⁸unhoṅ ne ribqā ko bulā kar us se pūchhā, “kyā tū abhī is ādmī ke sāth jānā chāhatī hai?” us ne kahā, “jī, maiṅ jānā chāhatī hūṅ.” ⁵⁹chunāṅche unhoṅ ne apnī bahan ribqā, us kī dāyā, ibrāhīm ke naukar aur us ke hamsafroṅ ko ruḵẖsat kar diyā. ⁶⁰pahale unhoṅ ne ribqā ko barkat de kar kahā, “hamārī bahan, allāh kare ki tū karoṛoṅ kī māṅ bane. terī aulād apne dushmanoṅ ke shaharoṅ ke darvāzoṅ par qabzā kare.” ⁶¹phir ribqā aur us kī naukrāniyāṅ uṭh kar ūṅṭoṅ par savār huīṅ aur ibrāhīm ke naukar ke pīchhe ho līṅ. chunāṅche naukar unheṅ sāth le kar ravānā ho gayā.

⁶²us vaqt ishāq mulk ke junūbī hisse, dasht-e-najab meṅ rahatā thā. vah bair-lahī-roī se āyā thā. ⁶³ek shām vah nikal kar khule maidān meṅ apnī sochoṅ meṅ magan ṭahal rahā thā ki achānak ūṅṭ us kī taraf āte hue nazar āe. ⁶⁴jab ribqā ne apnī nazar uṭhā kar ishāq ko dekhā to us ne ūṅṭ se utar kar ⁶⁵naukar se pūchhā, “vah ādmī kaun hai jo maidān meṅ ham se milne ā rahā hai?” naukar ne kahā, “merā mālik hai.” yah sun kar ribqā ne chādar le kar apne chihare ko ḍhāṁp liyā.

⁶⁶naukar ne ishāq ko sab kuchh batā diyā jo us ne kiyā thā. ⁶⁷phir ishāq ribqā ko apnī māṅ sārā ke ḍere meṅ le gayā. us ne us se shādī kī, aur vah us kī bīvī ban gaī. ishāq ke dil meṅ us ke liye bahut muhabbat paidā huī. yūṅ use apnī māṅ kī maut ke bād sukūn milā.