Paidāish 25

ibrāhīm kī mazīd aulād

¹ibrāhīm ne ek aur shādī kī. naī bīvī kā nām qatūrā thā. ²qatūrā ke chhah beṭe paidā hue, zimrān, yuqsān, midān, midiyān, isbāq aur sūḵẖ. ³yuqsān ke do beṭe the, sabā aur dadān. asūrī, latūsī aur lūmī dadān kī aulād haiṅ. ⁴midiyān ke beṭe aifā, ifar, hanūk, abīdā aur ild’ā the. yah sab qatūrā kī aulād the.

⁵ibrāhīm ne apnī sārī milkiyat ishāq ko de dī. ⁶apnī maut se pahale us ne apnī dūsrī bīviyoṅ ke beṭoṅ ko tuhfe de kar apne beṭe se dūr mashriq kī taraf bhej diyā.

ibrāhīm kī vafāt

^7-8 ibrāhīm 175 sāl kī umr meṅ faut huā. ġaraz vah bahut umrrasīdā aur zindagī se āsūdā ho kar intiqāl karke apne bāpdādā se jā milā. ^9-10 us ke beṭoṅ ishāq aur ismāīl ne use makfīlā ke ġār meṅ dafan kiyā jo mamre ke mashriq meṅ hai. yah vahī ġār thā jise khet samet hittī ādmī ifron bin suhar se ḵẖarīdā gayā thā. ibrāhīm aur us kī bīvī sārā donoṅ ko us meṅ dafan kiyā gayā.

¹¹ibrāhīm kī vafāt ke bād allāh ne ishāq ko barkat dī. us vaqt ishāq bair-lahī-roī ke qarīb ābād thā.

ismāīl kī aulād

¹²ibrāhīm kā beṭā ismāīl jo sārā kī misrī lauṅḍī hājirā ke hāṅ paidā huā us kā nasabnāmā yah hai. ¹³ismāīl ke beṭe baṛe se le kar chhoṭe tak yah haiṅ : nabāyot, qīdār, adabiel, mibsām, ¹⁴mishmā, dūmā, massā, ¹⁵hadad, taimā, yatūr, nafīs aur qidmā.

¹⁶yah beṭe bārah qabīloṅ ke bānī ban gae, aur jahāṅ jahāṅ vah ābād hue un jagahoṅ kā vahī nām paṛ gayā. ¹⁷ismāīl 137 sāl kā thā jab vah kūch karke apne bāpdādā se jā milā. ¹⁸us kī aulād us ilāqe meṅ ābād thī jo havīlā aur shūr ke darmiyān hai aur jo misr ke mashriq meṅ asūr kī taraf hai. yūṅ ismāīl apne tamām bhāiyoṅ ke sāmne hī ābād huā.

esau aur yāqūb kī paidāish

¹⁹yah ibrāhīm ke beṭe ishāq kā bayān hai.

²⁰ishāq 40 sāl kā thā jab us kī ribqā se shādī huī. ribqā lāban kī bahan aur arāmī mard batūel kī beṭī thī (batūel masoputāmiyā kā thā). ²¹ribqā ke bacche paidā na hue. lekin ishāq ne apnī bīvī ke liye duā kī to rabb ne us kī sunī, aur ribqā ummīd se huī. ²²us ke peṭ meṅ bacche ek dūsre se zor’āzmāī karne lage to vah rabb se pūchhne gaī, “agar yah merī hālat rahegī to phir maiṅ yahāṅ tak kyūṅ pahuṅch gaī hūṅ?” ²³rabb ne us se kahā, “tere andar do qaumeṅ haiṅ. vah tujh se nikal kar ek dūsrī se alag alag ho jāeṅgī. un meṅ se ek ziyādā tāqatvar hogī, aur baṛā chhoṭe kī ḵẖidmat karegā.”

²⁴paidāish kā vaqt ā gayā to juṛvāṅ beṭe paidā hue. ²⁵pahalā bacchā niklā to surḵẖ sā thā, aur aisā lag rahā thā ki vah ghane bāloṅ kā koṭ hī pahane hue hai. is liye us kā nām esau yānī ‘bāloṅ vālā’ rakhā gayā. ²⁶is ke bād dūsrā bacchā paidā huā. vah esau kī eṛī pakṛe hue niklā, is liye us kā nām yāqūb yānī ‘eṛī pakaṛne vālā’ rakhā gayā. us vaqt ishāq 60 sāl kā thā.

²⁷laṛke javān hue. esau māhir shikārī ban gayā aur khule maidān meṅ ḵẖush rahatā thā. us ke muqāble meṅ yāqūb shāistā thā aur ḍere meṅ rahanā pasand kartā thā. ²⁸ishāq esau ko piyār kartā thā, kyūṅki vah shikār kā gosht pasand kartā thā. lekin ribqā yāqūb ko piyār kartī thī.

²⁹ek din yāqūb sālan pakā rahā thā ki esau thakāhārā jaṅgal se āyā. ³⁰us ne kahā, “mujhe jaldī se lāl sālan, hāṅ isī lāl sālan se kuchh khāne ko do. maiṅ to bedam ho rahā hūṅ.” (isī liye bād meṅ us kā nām adom yānī surḵẖ paṛ gayā.) ³¹yāqūb ne kahā, “pahale mujhe pahalauṭhe kā haq bech do.” ³²esau ne kahā, “maiṅ to bhūk se mar rahā hūṅ, pahalauṭhe kā haq mere kis kām kā?” ³³yāqūb ne kahā, “pahale qasam khā kar mujhe yah haq bech do.” esau ne qasam khā kar use pahalauṭhe kā haq muntaqil kar diyā.

³⁴tab yāqūb ne use kuchh roṭī aur dāl de dī, aur esau ne khāyā aur piyā. phir vah uṭh kar chalā gayā. yūṅ us ne pahalauṭhe ke haq ko haqīr jānā.