Paidāish 3

gunāh kā āġāz

¹sāṁp zamīn par chalne phirne vāle un tamām jānvaroṅ se ziyādā chālāk thā jin ko rabb ḵẖudā ne banāyā thā. us ne aurat se pūchhā, “kyā allāh ne vāqaī kahā ki bāġ ke kisī bhī daraḵẖt kā phal na khānā?” ²aurat ne javāb diyā, “hargiz nahīṅ. ham bāġ kā har phal khā sakte haiṅ, ³sirf us daraḵẖt ke phal se gurez karnā hai jo bāġ ke bīch meṅ hai. allāh ne kahā ki us kā phal na khāo balki use chhūnā bhī nahīṅ, varnā tum yaqīnan mar jāoge.” ⁴sāṁp ne aurat se kahā, “tum hargiz na maroge, ⁵balki allāh jāntā hai ki jab tum us kā phal khāoge to tumhārī āṅkheṅ khul jāeṅgī aur tum allāh kī mānind ho jāoge, tum jo bhī acchhā aur burā hai use jān loge.”

⁶aurat ne daraḵẖt par ġaur kiyā ki khāne ke liye acchhā aur dekhne meṅ bhī dilkash hai. sab se dilfareb bāt yah ki us se samajh hāsil ho saktī hai! yah soch kar us ne us kā phal le kar use khāyā. phir us ne apne shauhar ko bhī de diyā, kyūṅki vah us ke sāth thā. us ne bhī khā liyā. ⁷lekin khāte hī un kī āṅkheṅ khul gaīṅ aur un ko mālūm huā ki ham naṅge haiṅ. chunāṅche unhoṅ ne anjīr ke patte sī kar luṅgiyāṅ banā līṅ.

⁸shām ke vaqt jab ṭhaṅḍī havā chalne lagī to unhoṅ ne rabb ḵẖudā ko bāġ meṅ chalte phirte sunā. vah ḍar ke māre daraḵẖtoṅ ke pīchhe chhup gae. ⁹rabb ḵẖudā ne pukār kar kahā, “ādam, tū kahāṅ hai?” ¹⁰ādam ne javāb diyā, “maiṅ ne tujhe bāġ meṅ chalte hue sunā to ḍar gayā, kyūṅki maiṅ naṅgā hūṅ. is liye maiṅ chhup gayā.” ¹¹us ne pūchhā, “kis ne tujhe batāyā ki tū naṅgā hai? kyā tū ne us daraḵẖt kā phal khāyā hai jise khāne se maiṅ ne manā kiyā thā?” ¹²ādam ne kahā, “jo aurat tū ne mere sāth rahane ke liye dī hai us ne mujhe phal diyā. is liye maiṅ ne khā liyā.” ¹³ab rabb ḵẖudā aurat se muḵẖātib huā, “tū ne yah kyūṅ kiyā?” aurat ne javāb diyā, “sāṁp ne mujhe bahakāyā to maiṅ ne khāyā.”

¹⁴rabb ḵẖudā ne sāṁp se kahā, “chūṅki tū ne yah kiyā, is liye tū tamām maveshiyoṅ aur jaṅglī jānvaroṅ meṅ lāntī hai. tū umr bhar peṭ ke bal reṅgegā aur ḵẖāk chāṭegā. ¹⁵maiṅ tere aur aurat ke darmiyān dushmanī paidā karūṅgā. us kī aulād terī aulād kī dushman hogī. vah tere sar ko kuchal ḍālegī jabki tū us kī eṛī par kāṭegā.”

¹⁶phir rabb ḵẖudā aurat se muḵẖātib huā aur kahā, “jab tū ummīd se hogī to maiṅ terī taklīf ko bahut baṛhāūṅgā. jab tere bacche hoṅge to tū shadīd dard kā shikār hogī. tū apne shauhar kī tamannā karegī lekin vah tujh par hukūmat karegā.” ¹⁷ādam se us ne kahā, “tū ne apnī bīvī kī bāt mānī aur us daraḵẖt kā phal khāyā jise khāne se maiṅ ne manā kiyā thā. is liye tere sabab se zamīn par lānat hai. us se ḵẖurāk hāsil karne ke liye tujhe umr bhar mehanat-mashaqqat karnī paṛegī. ¹⁸tere liye vah ḵẖārdār paude aur ūṅṭkaṭāre paidā karegī, hālāṅki tū us se apnī ḵẖurāk bhī hāsil karegā. ¹⁹pasīnā bahā bahā kar tujhe roṭī kamāne ke liye bhāg-dauṛ karnī paṛegī. aur yah silsilā maut tak jārī rahegā. tū mehanat karte karte dubārā zamīn meṅ lauṭ jāegā, kyūṅki tū usī se liyā gayā hai. tū ḵẖāk hai aur dubārā ḵẖāk meṅ mil jāegā.”

²⁰ādam ne apnī bīvī kā nām havvā yānī zindagī rakhā, kyūṅki bād meṅ vah tamām zindoṅ kī māṅ ban gaī. ²¹rabb ḵẖudā ne ādam aur us kī bīvī ke liye khāloṅ se libās banā kar unheṅ pahanāyā. ²²us ne kahā, “insān hamārī mānind ho gayā hai, vah acchhe aur bure kā ilm rakhtā hai. ab aisā na ho ki vah hāth baṛhā kar zindagī baḵẖshne vāle daraḵẖt ke phal se le aur us se khā kar hameshā tak zindā rahe.” ²³is liye rabb ḵẖudā ne use bāġ-e-adan se nikāl kar us zamīn kī khetībāṛī karne kī zimmādārī dī jis meṅ se use liyā gayā thā. ²⁴insān ko ḵẖārij karne ke bād us ne bāġ-e-adan ke mashriq meṅ karūbī farishte khaṛe kie aur sāth sāth ek ātishī talvār rakhī jo idhar udhar ghūmtī thī tāki us rāste kī hifāzat kare jo zindagī baḵẖshne vāle daraḵẖt tak pahuṅchātā thā.