Hosea 13

allāh kī taraf se isrāīl kī adālat

¹pahale jab isrāīl ne bāt kī to log kāṁp uṭhe, kyūṅki mulk-e-isrāīl meṅ vah sarfarāz thā. lekin phir vah bāl kī butparastī meṅ mulavvas ho kar halāk huā. ²ab vah apne gunāhoṅ meṅ bahut izāfā kar rahe haiṅ. vah apnī chāṅdī le kar mahārat se but ḍhāl lete haiṅ. phir dastakāroṅ ke hāth se bane in butoṅ ke bāre meṅ kahā jātā hai, “jo bachhṛe ke butoṅ ko chūmnā chāhe vah kisī insān ko qurbān kare!” ³is liye vah subah-savere kī dhund jaise ārizī aur dhūp meṅ jald hī ḵẖatm hone vālī os kī mānind hoṅge. vah gāhate vaqt gandum se alag hone vāle bhūse kī mānind havā meṅ uṛ jāeṅge, ghar meṅ se nikalne vāle dhueṅ kī tarah zāe ho jāeṅge.

⁴“lekin maiṅ, rabb tujhe misr se nikālte vaqt se le kar āj tak terā ḵẖudā hūṅ. tujhe mere sivā kisī aur ko ḵẖudā nahīṅ jānnā hai. mere sivā aur koī najātadihandā nahīṅ hai. ⁵registān meṅ maiṅ ne terī dekh-bhāl kī, vahāṅ jahāṅ taptī garmī thī. ⁶vahāṅ unheṅ acchhī ḵẖurāk milī. lekin jab vah jī bhar kar khā sake aur ser hue to maġrūr ho kar mujhe bhūl gae. ⁷yah dekh kar maiṅ un ke liye sherbabar ban gayā hūṅ. ab maiṅ chīte kī tarah rāste ke kināre un kī tāk meṅ baiṭhūṅgā. ⁸us rīchhnī kī tarah jis ke bacchoṅ ko chhīn liyā gayā ho maiṅ un par jhapaṭṭā mār kar un kī aṅtaṛiyoṅ ko phāṛ nikālūṅgā. maiṅ unheṅ sherbabar kī tarah haṛap kar lūṅgā, aur jaṅglī jānvar unheṅ ṭukṛe ṭukṛe kar deṅge.

⁹ai isrāīl, tū is liye tabāh ho gayā hai ki tū mere ḵẖilāf hai, us ke ḵẖilāf jo terī madad kar saktā hai. ¹⁰ab terā bādshāh kahāṅ hai ki vah tere tamām shaharoṅ meṅ ā kar tujhe chhuṭkārā de? ab tere rāhanumā kidhar haiṅ jin se tū ne kahā thā, ‘mujhe bādshāh aur rāhanumā de de.’ ¹¹maiṅ ne ġusse meṅ tujhe bādshāh de diyā aur ġusse meṅ use tujh se chhīn bhī liyā.

¹²isrāīl kā qusūr lapeṭ kar godām meṅ rakhā gayā hai, us ke gunāh hisāb-kitāb ke liye mahfūz rakhe gae haiṅ. ¹³dard-e-zah shurū ho gayā hai, lekin vah nāsamajh bacchā hai. vah māṅ ke peṭ se nikalnā nahīṅ chāhatā.

¹⁴maiṅ fidyā de kar unheṅ pātāl se kyūṅ rihā karūṅ? maiṅ unheṅ maut kī girift se kyūṅ chhuṛāūṅ? ai maut, tere kāṅṭe kahāṅ rahe? ai pātāl, terā ḍaṅk kahāṅ rahā? use kām meṅ lā, kyūṅki maiṅ taras nahīṅ khāūṅgā. ¹⁵ḵẖwāh vah apne bhāiyoṅ ke darmiyān phaltā phūltā kyūṅ na ho to bhī rabb kī taraf se mashriqī lū us par chalegī. aur jab registān se āegī to isrāīl ke kueṅ aur chashme ḵẖushk ho jāeṅge. har ḵẖazānā, har qīmtī chīz lūṭ kā māl ban jāegī. ¹⁶sāmriyā ke bāshindoṅ ko un ke qusūr kī sazā bhugatnī paṛegī, kyūṅki vah apne ḵẖudā se sarkash ho gae haiṅ. dushman unheṅ talvār se mār kar un ke bacchoṅ ko zamīn par paṭaḵẖ degā aur un kī hāmilā aurtoṅ ke peṭ chīr ḍālegā.”