Hosea 14

rabb ke pās vāpas āo!

¹ai isrāīl, taubā karke rabb apne ḵẖudā ke pās vāpas ā! kyūṅki terā qusūr tere zavāl kā sabab ban gayā hai. ²apne gunāhoṅ kā iqrār karte hue rabb ke pās vāpas āo. us se kaho, “hamāre tamām gunāhoṅ ko muāf karke hameṅ meharbānī se qabūl farmā tāki ham apne hoṅṭoṅ se terī tārīf karke tujhe munāsib qurbānī adā kar sakeṅ. ³asūr hameṅ na bachāe. āindā na ham ghoṛoṅ par savār ho jāeṅge, na kaheṅge ki hamāre hāthoṅ kī chīzeṅ hamārā ḵẖudā haiṅ. kyūṅki tū hī yatīm par raham kartā hai.”

⁴tab rabb faramāegā, “maiṅ un kī bevafāī ke asrāt ḵẖatm karke unheṅ shifā dūṅgā, hāṅ maiṅ unheṅ khule dil se piyār karūṅgā, kyūṅki merā un par ġazab ṭhaṅḍā ho gayā hai. ⁵isrāīl ke liye maiṅ shabnam kī mānind hūṅgā. tab vah sosan kī mānind phūl nikālegā, lubnān ke deodār ke daraḵẖt kī tarah jaṛ pakṛegā, ⁶us kī koṁpleṅ phūṭ nikaleṅgī, aur shāḵẖeṅ ban kar phailtī jāeṅgī. us kī shān zaitūn ke daraḵẖt kī mānind hogī, us kī ḵẖushbū lubnān ke deodār ke daraḵẖt kī ḵẖushbū kī tarah phail jāegī.

⁷log dubārā us ke sāy meṅ jā baseṅge. vahāṅ vah anāj kī tarah phaleṅ phūleṅge, aṅgūr ke se phūl nikāleṅge. dūsre un kī yūṅ tārīf kareṅge jis tarah lubnān kī umdā mai kī. ⁸tab isrāīl kahegā, ‘merā butoṅ se kyā vāstā?’ maiṅ hī terī sun kar terī dekh-bhāl karūṅgā. maiṅ jūnīpar kā sāyādār daraḵẖt hūṅ, aur tū mujh se hī phal pāegā.”

⁹kaun dānishmand hai? vah samajh le. kaun sāhib-e-faham hai? vah matlab jān le. kyūṅki rabb kī rāheṅ durust haiṅ. rāstbāz un par chalte raheṅge, lekin sarkash un par chalte vaqt ṭhokar khā kar gir jāeṅge.