Ayyūb 1
ayyūb kī dīndārī
1mulk-e-ūz meṅ ek beilzām ādmī rahatā thā jis kā nām ayyūb thā. vah sīdhī rāh par chaltā, allāh kā ḵẖauf māntā aur har burāī se dūr rahatā thā. 2us ke sāt beṭe aur tīn beṭiyāṅ paidā huīṅ. 3sāth sāth us ke bahut māl-maveshī the : 7,000 bheṛ-bakriyāṅ, 3,000 ūṅṭ, bailoṅ kī 500 joṛiyāṅ aur 500 gadhiyāṅ. us ke beshumār naukar-naukrāniyāṅ bhī the. ġaraz mashriq ke tamām bāshindoṅ meṅ is ādmī kī haisiyat sab se baṛī thī.
4us ke beṭoṅ kā dastūr thā ki bārī bārī apne gharoṅ meṅ ziyāfat kareṅ. is ke liye vah apnī tīn bahanoṅ ko bhī apne sāth khāne aur pīne kī dāvat dete the. 5har dafā jab ziyāfat ke din iḵẖtitām tak pahuṅchte to ayyūb apne bacchoṅ ko bulā kar unheṅ pāk-sāf kar detā aur subah-savere uṭh kar har ek ke liye bhasm hone vālī ek ek qurbānī pesh kartā. kyūṅki vah kahatā thā, “ho saktā hai mere bacchoṅ ne gunāh karke dil meṅ allāh par lānat kī ho.” chunāṅche ayyūb har ziyāfat ke bād aisā hī kartā thā.
ayyūb ke kirdār par ilzām
6ek din farishte [a] lafzī tarjumā : allāh ke farzand. apne āp ko rabb ke huzūr pesh karne āe. iblīs bhī un ke darmiyān maujūd thā. 7rabb ne iblīs se pūchhā, “tū kahāṅ se āyā hai?” iblīs ne javāb diyā, “maiṅ duniyā meṅ idhar udhar ghūmtā phirtā rahā.”
8rabb bolā, “kyā tū ne mere bandā ayyūb par tavajjuh dī? duniyā meṅ us jaisā koī aur nahīṅ. kyūṅki vah beilzām hai, vah sīdhī rāh par chaltā, allāh kā ḵẖauf māntā aur har burāī se dūr rahatā hai.”
9iblīs ne rabb ko javāb diyā, “beshak, lekin kyā ayyūb yūṅ hī allāh kā ḵẖauf māntā hai? 10tū ne to us ke, us ke gharāne ke aur us kī tamām milkiyat ke ird-gird hifāztī bāṛ lagāī hai. aur jo kuchh us ke hāth ne kiyā us par tū ne barkat dī, natīje meṅ us kī bheṛ-bakriyāṅ aur gāy-bail pūre mulk meṅ phail gae haiṅ. 11lekin vah kyā karegā agar tū apnā hāth zarā baṛhā kar sab kuchh tabāh kare jo use hāsil hai. tab vah tere muṅh par hī tujh par lānat karegā.”
12rabb ne iblīs se kahā, “ṭhīk hai, jo kuchh bhī us kā hai vah tere hāth meṅ hai. lekin us ke badan ko hāth na lagānā.” iblīs rabb ke huzūr se chalā gayā.
13ek din ayyūb ke beṭe-beṭiyāṅ māmūl ke mutābiq ziyāfat kar rahe the. vah baṛe bhāī ke ghar meṅ khānā khā rahe aur mai pī rahe the. 14achānak ek qāsid ayyūb ke pās pahuṅch kar kahane lagā, “bail khet meṅ hal chalā rahe the aur gadhiyāṅ sāth vālī zamīn par char rahī thīṅ 15ki sabā ke logoṅ ne ham par hamlā karke sab kuchh chhīn liyā. unhoṅ ne tamām mulāzimoṅ ko talvār se mār ḍālā, sirf maiṅ hī āp ko yah batāne ke liye bach niklā hūṅ.”
16vah abhī bāt kar hī rahā thā ki ek aur qāsid pahuṅchā jis ne ittilā dī, “allāh kī āg ne āsmān se gir kar āp kī tamām bheṛ-bakriyoṅ aur mulāzimoṅ ko bhasm kar diyā. sirf maiṅ hī āp ko yah batāne ke liye bach niklā hūṅ.”
17vah abhī bāt kar hī rahā thā ki tīsrā qāsid pahuṅchā. vah bolā, “bābal ke kasdiyoṅ ne tīn gurohoṅ meṅ taqsīm ho kar hamāre ūṅṭoṅ par hamlā kiyā aur sab kuchh chhīn liyā. tamām mulāzimoṅ ko unhoṅ ne talvār se mār ḍālā, sirf maiṅ hī āp ko yah batāne ke liye bach niklā hūṅ.”
18vah abhī bāt kar hī rahā thā ki chauthā qāsid pahuṅchā. us ne kahā, “āp ke beṭe-beṭiyāṅ apne baṛe bhāī ke ghar meṅ khānā khā rahe aur mai pī rahe the 19ki achānak registān kī jānib se ek zordār āṅdhī āī jo ghar ke chāroṅ konoṅ se yūṅ ṭakrāī ki vah javānoṅ par gir paṛā. sab ke sab halāk ho gae. sirf maiṅ hī āp ko yah batāne ke liye bach niklā hūṅ.”
20yah sab kuchh sun kar ayyūb uṭhā. apnā libās phāṛ kar us ne apne sar ke bāl muṅḍavāe. phir us ne zamīn par gir kar auṅdhe muṅh rabb ko sijdā kiyā. 21vah bolā, “maiṅ naṅgī hālat meṅ māṅ ke peṭ se niklā aur naṅgī hālat meṅ kūch kar jāūṅgā. rabb ne diyā, rabb ne liyā, rabb kā nām mubārak ho!”
22is sāre muāmale meṅ ayyūb ne na gunāh kiyā, na allāh ke bāre meṅ kufr bakā.