Ayyūb 10

mujhe apnī jān se ghin ātī hai

¹mujhe apnī jān se ghin ātī hai. maiṅ āzādī se āh-o-zārī karūṅgā, khule taur par apnā dilī ġam bayān karūṅgā. ²maiṅ allāh se kahūṅgā ki mujhe mujrim na ṭhaharā balki batā ki terā mujh par kyā ilzām hai. ³kyā tū zulm karke mujhe radd karne meṅ ḵẖushī mahsūs kartā hai hālāṅki tere apne hī hāthoṅ ne mujhe banāyā? sāth sāth tū bedīnoṅ ke mansūboṅ par apnī manzūrī kā nūr chamkātā hai. kyā yah tujhe acchhā lagtā hai? ⁴kyā terī āṅkheṅ insānī haiṅ? kyā tū sirf insān kī sī nazar se dekhtā hai? ⁵kyā tere din aur sāl fānī insān jaise mahdūd haiṅ? hargiz nahīṅ! ⁶to phir kyā zarūrat hai ki tū mere qusūr kī talāsh aur mere gunāh kī tahqīq kartā rahe? ⁷tū to jāntā hai ki maiṅ bequsūr hūṅ aur ki tere hāth se koī bachā nahīṅ saktā.

⁸tere apne hāthoṅ ne mujhe tashkīl de kar banāyā. aur ab tū ne muṛ kar mujhe tabāh kar diyā hai. ⁹zarā is kā ḵẖayāl rakh ki tū ne mujhe miṭṭī se banāyā. ab tū mujhe dubārā ḵẖāk meṅ tabdīl kar rahā hai. ¹⁰tū ne ḵẖud mujhe dūdh kī tarah uṅḍel kar panīr kī tarah jamne diyā. ¹¹tū hī ne mujhe jild aur gosht-post se mulabbas kiyā, haḍḍiyoṅ aur nasoṅ se tayyār kiyā. ¹²tū hī ne mujhe zindagī aur apnī meharbānī se navāzā, aur terī dekh-bhāl ne merī rūh ko mahfūz rakhā.

¹³lekin ek bāt tū ne apne dil meṅ chhupāe rakhī, hāṅ mujhe terā irādā mālūm ho gayā hai. ¹⁴vah yah hai ki ‘agar ayyūb gunāh kare to maiṅ us kī paharādārī karūṅgā. maiṅ use us ke qusūr se barī nahīṅ karūṅgā.’

¹⁵agar maiṅ qusūrvār hūṅ to mujh par afsos! aur agar maiṅ begunāh bhī hūṅ tāham maiṅ apnā sar uṭhāne kī jur’at nahīṅ kartā, kyūṅki maiṅ sharm khā khā kar ser ho gayā hūṅ. mujhe ḵẖūb musībat pilāī gaī hai. ¹⁶aur agar maiṅ khaṛā bhī ho jāūṅ to tū sherbabar kī tarah merā shikār kartā aur mujh par dubārā apnī mojizānā qudrat kā izhār kartā hai. ¹⁷tū mere ḵẖilāf nae gavāhoṅ ko khaṛā kartā aur mujh par apne ġazab meṅ izāfā kartā hai, tere lashkar saf-dar-saf mujh par hamlā karte haiṅ. ¹⁸tū mujhe merī māṅ ke peṭ se kyūṅ nikāl lāyā? behatar hotā ki maiṅ usī vaqt mar jātā aur kisī ko nazar na ātā. ¹⁹yūṅ hotā jaisā maiṅ kabhī zindā hī na thā, mujhe sīdhā māṅ ke peṭ se qabr meṅ pahuṅchāyā jātā. ²⁰kyā mere din thoṛe nahīṅ haiṅ? mujhe tanhā chhoṛ! mujh se apnā muṅh pher le tāki maiṅ chand ek lamhoṅ ke liye ḵẖush ho sakūṅ, ²¹kyūṅki jald hī mujhe kūch karke vahāṅ jānā hai jahāṅ se koī vāpas nahīṅ ātā, us mulk meṅ jis meṅ tārīkī aur ghane sāy rahate haiṅ. ²²vah mulk aṅdherā hī aṅdherā aur kālā hī kālā hai, us meṅ ghane sāy aur betartībī hai. vahāṅ raushnī bhī aṅdherā hī hai.”