Ayyūb 12

ayyūb kā javāb : maiṅ mazāq kā nishānā ban gayā hūṅ

¹ayyūb ne javāb de kar kahā,

²“lagtā hai ki tum hī vāhid dānishmand ho, ki hikmat tumhāre sāth hī mar jāegī. ³lekin mujhe samajh hai, is nāte se maiṅ tum se adnā nahīṅ hūṅ. vaise bhī kaun aisī bāteṅ nahīṅ jāntā? ⁴maiṅ to apne dostoṅ ke liye mazāq kā nishānā ban gayā hūṅ, maiṅ jis kī duāeṅ allāh suntā thā. hāṅ, maiṅ jo begunāh aur beilzām hūṅ dūsroṅ ke liye mazāq kā nishānā ban gayā hūṅ! ⁵jo sukūn se zindagī guzārtā hai vah musībatzadā ko haqīr jāntā hai. vah kahatā hai, ‘āo, ham use ṭhokar māreṅ jis ke pāoṅ ḍagmagāne lage hai.’ ⁶ġāratagaroṅ ke ḵẖaimoṅ meṅ ārām-o-sukūn hai, aur allāh ko taish dilāne vāle hifāzat se rahate haiṅ, go vah allāh ke hāth meṅ haiṅ.

⁷tāham tum kahate ho ki jānvaroṅ se pūchh le to vah tujhe sahīh bāt sikhāeṅge. parindoṅ se patā kar to vah tujhe durust javāb deṅge. ⁸zamīn se bāt kar to vah tujhe tālīm degī, balki samundar kī machhliyāṅ bhī tujhe is kā mafhūm sunāeṅgī. ⁹in meṅ se ek bhī nahīṅ jo na jāntā ho ki rabb ke hāth ne yah sab kuchh kiyā hai. ¹⁰usī ke hāth meṅ har jāndār kī jān, tamām insānoṅ kā dam hai. ¹¹kān to alfāz kī yūṅ jāṅch-paṛtāl kartā hai jis tarah zabān khānoṅ meṅ imtiyāz kartī hai. ¹²aur hikmat un meṅ pāī jātī hai jo umrrasīdā haiṅ, samajh mut’addid din guzarne ke bād hī ātī hai.

¹³hikmat aur qudrat allāh kī hai, vahī maslahat aur samajh kā mālik hai. ¹⁴jo kuchh vah ḍhā de vah dubārā tāmīr nahīṅ hogā, jise vah giriftār kare use āzād nahīṅ kiyā jāegā. ¹⁵jab vah pānī roke to kāl paṛtā hai, jab use khulā chhoṛe to vah mulk meṅ tabāhī machā detā hai.

¹⁶us ke pās quvvat aur dānāī hai. bhaṭakne aur bhaṭkāne vālā donoṅ hī us ke hāth meṅ haiṅ. ¹⁷mushīroṅ ko vah naṅge pāoṅ apne sāth le jātā hai, qāziyoṅ ko ahamaq sābit kartā hai. ¹⁸vah bādshāhoṅ kā paṭkā khol kar un kī kamroṅ meṅ rassā bāṅdhtā hai. ¹⁹imāmoṅ ko vah naṅge pāoṅ apne sāth le jātā hai, mazbūtī se khaṛe ādmiyoṅ ko tabāh kartā hai. ²⁰qābil-e-etimād afrād se vah bolne kī qābiliyat aur buzurgoṅ se imtiyāz karne kī liyāqat chhīn letā hai. ²¹vah shurfā par apnī hiqārat kā izhār karke zorāvaroṅ kā paṭkā khol detā hai.

²²vah aṅdhere ke poshīdā bhed khol detā aur gaharī tārīkī ko raushnī meṅ lātā hai. ²³vah qaumoṅ ko baṛā bhī banātā aur tabāh bhī kartā hai, ummatoṅ ko muntashir bhī kartā aur un kī qiyādat bhī kartā hai. ²⁴vah mulk ke rāhanumāoṅ ko aqal se maharūm karke unheṅ aise biyābān meṅ āvārā phirne detā hai jahāṅ rāstā hī nahīṅ. ²⁵tab vah aṅdhere meṅ raushnī ke baġair ṭaṭol ṭaṭol kar ghūmte haiṅ. allāh hī unheṅ nashe meṅ dhut sharābiyoṅ kī tarah bhaṭakne detā hai.