Ayyūb 15

ilīfaz kā javāb : ayyūb kufr bak rahā hai

¹tab ilīfaz temānī ne javāb de kar kahā,

²“kyā dānishmand ko javāb meṅ behūdā ḵẖayālāt pesh karne chāhieṅ? kyā use apnā peṭ taptī mashriqī havā se bharnā chāhie? ³kyā munāsib hai ki vah fuzūl bahs-mubāhasā kare, aisī bāteṅ kare jo befāidā haiṅ? hargiz nahīṅ!

⁴lekin terā ravayyā is se kahīṅ burā hai. tū allāh kā ḵẖauf chhoṛ kar us ke huzūr ġaur-o-ḵẖauz karne kā farz haqīr jāntā hai. ⁵terā qusūr hī tere muṅh ko aisī bāteṅ karne kī taharīk de rahā hai, isī liye tū ne chālākoṅ kī zabān apnā lī hai. ⁶mujhe tujhe qusūrvār ṭhaharāne kī zarūrat hī nahīṅ, kyūṅki terā apnā hī muṅh tujhe mujrim ṭhaharātā hai, tere apne hī hoṅṭ tere ḵẖilāf gavāhī dete haiṅ.

⁷kyā tū sab se pahale paidā huā insān hai? kyā tū ne pahāṛoṅ se pahale hī janm liyā? ⁸jab allāh kī majlis mun’aqid ho jāe to kyā tū bhī un kī bāteṅ suntā hai? kyā sirf tujhe hī hikmat hāsil hai? ⁹tū kyā jāntā hai jo ham nahīṅ jānte? tujhe kis bāt kī samajh āī hai jis kā ilm ham nahīṅ rakhte? ¹⁰hamāre darmiyān bhī umrrasīdā buzurg haiṅ, aise ādmī jo tere vālid se bhī būṛhe haiṅ.

¹¹ai ayyūb, kyā terī nazar meṅ allāh kī tasallī dene vālī bātoṅ kī koī ahamiyat nahīṅ? kyā tū is kī qadar nahīṅ kar saktā ki narmī se tujh se bāt kī jā rahī hai? ¹²tere dil ke jazbāt tujhe yūṅ uṛā kar kyūṅ le jāeṅ, terī āṅkheṅ kyūṅ itnī chamak uṭheṅ ¹³ki āḵẖirkār tū apnā ġussā allāh par utār kar aisī bāteṅ apne muṅh se ugal de?

¹⁴bhalā insān kyā hai ki pāk-sāf ṭhahare? aurat se paidā huī maḵẖlūq kyā hai ki rāstbāz sābit ho? kuchh bhī nahīṅ! ¹⁵allāh to apne muqaddas ḵẖādimoṅ par bhī bharosā nahīṅ rakhtā, balki āsmān bhī us kī nazar meṅ pāk nahīṅ hai. ¹⁶to phir vah insān par bharosā kyūṅ rakhe jo qābil-e-ghin aur bigṛā huā hai, jo burāī ko pānī kī tarah pī letā hai.

¹⁷merī bāt sun, maiṅ tujhe kuchh sunānā chāhatā hūṅ. maiṅ tujhe vah kuchh bayān karūṅgā jo mujh par zāhir huā hai, ¹⁸vah kuchh jo dānishmandoṅ ne pesh kiyā aur jo unheṅ apne bāpdādā se milā thā. un se kuchh chhupāyā nahīṅ gayā thā. ¹⁹(bāpdādā se murād vah vāhid log haiṅ jinheṅ us vaqt mulk diyā gayā jab koī bhī pardesī un meṅ nahīṅ phirtā thā).

²⁰vah kahate the, bedīn apne tamām din ḍar ke māre taṛaptā rahatā, aur jitne bhī sāl zālim ke liye mahfūz rakhe gae haiṅ utne hī sāl vah pech-o-tāb khātā rahatā hai. ²¹dahshatanāk āvāzeṅ us ke kānoṅ meṅ gūṅjtī rahatī haiṅ, aur amn-o-amān ke vaqt hī tabāhī machāne vālā us par ṭūṭ paṛtā hai. ²²use aṅdhere se bachne kī ummīd hī nahīṅ, kyūṅki use talvār ke liye tayyār rakhā gayā hai.

²³vah mārā mārā phirtā hai, āḵẖirkār vah giddhoṅ kī ḵẖorak banegā. use ḵẖud ilm hai ki tārīkī kā din qarīb hī hai. ²⁴taṅgī aur musībat use dahshat khilātī, hamlāāvar bādshāh kī tarah us par ġālib ātī haiṅ. ²⁵aur vajah kyā hai? yah ki us ne apnā hāth allāh ke ḵẖilāf uṭhāyā, qādir-e-mutlaq ke sāmne takabbur dikhāyā hai. ²⁶apnī moṭī aur mazbūt ḍhāl kī panāh meṅ akaṛ kar vah tezī se allāh par hamlā kartā hai.

²⁷go is vaqt us kā chiharā charbī se chamaktā aur us kī kamar moṭī hai, ²⁸lekin āindā vah tabāhashudā shaharoṅ meṅ basegā, aise makānoṅ meṅ jo sab ke chhoṛe hue haiṅ aur jo jald hī patthar ke ḍher ban jāeṅge. ²⁹vah amīr nahīṅ hogā, us kī daulat qāim nahīṅ rahegī, us kī jāydād mulk meṅ phailī nahīṅ rahegī.

³⁰vah tārīkī se nahīṅ bachegā. sholā us kī koṁploṅ ko murjhāne degā, aur allāh use apne muṅh kī ek phūṅk se uṛā kar tabāh kar degā. ³¹vah dhoke par bharosā na kare, varnā vah bhaṭak jāegā aur us kā ajr dhokā hī hogā. ³²vaqt se pahale hī use is kā pūrā muāvazā milegā, us kī koṁpal kabhī nahīṅ phale phūlegī.

³³vah aṅgūr kī us bel kī mānind hogā jis kā phal kacchī hālat meṅ hī gir jāe, zaitūn ke us daraḵẖt kī mānind jis ke tamām phūl jhaṛ jāeṅ. ³⁴kyūṅki bedīnoṅ kā jathā baṅjar rahegā, aur āg rishvataḵẖoroṅ ke ḵẖaimoṅ ko bhasm karegī. ³⁵un ke pāoṅ dukh-dard se bhārī ho jāte, aur vah burāī ko janm dete haiṅ. un kā peṭ dhokā hī paidā kartā hai.”