Ayyūb 16
ayyūb kā javāb : maiṅ begunāh hūṅ
1ayyūb ne javāb de kar kahā,
2“is tarah kī maiṅ ne bahut sī bāteṅ sunī haiṅ, tumhārī tasallī sirf dukh-dard kā bāis hai. 3kyā tumhārī laffāzī kabhī ḵẖatm nahīṅ hogī? tujhe kyā chīz bechain kar rahī hai ki tū mujhe javāb dene par majbūr hai? 4agar maiṅ tumhārī jagah hotā to maiṅ bhī tumhārī jaisī bāteṅ kar saktā. phir maiṅ bhī tumhāre ḵẖilāf pur’alfāz taqrīreṅ pesh karke taubā taubā kah saktā. 5lekin maiṅ aisā na kartā. maiṅ tumheṅ apnī bātoṅ se taqviyat detā, afsos ke izhār se tumheṅ taskīn detā. 6lekin mere sāth aisā sulūk nahīṅ ho rahā. agar maiṅ bolūṅ to mujhe sukūn nahīṅ miltā, agar chup rahūṅ to merā dard dūr nahīṅ hotā.
7lekin ab allāh ne mujhe thakā diyā hai, us ne mere pūre gharāne ko tabāh kar diyā hai. 8us ne mujhe sukaṛne diyā hai, aur yah bāt mere ḵẖilāf gavāh ban gaī hai. merī dublī-patlī hālat khaṛī ho kar mere ḵẖilāf gavāhī detī hai. 9allāh kā ġazab mujhe phāṛ rahā hai, vah merā dushman aur merā muḵẖālif ban gayā hai jo mere ḵẖilāf dāṅt pīs pīs kar mujhe apnī āṅkhoṅ se chhed rahā hai. [a] lafzī tarjumā : apnī āṅkheṅ mere ḵẖilāf tez kartā hai. 10log galā phāṛ kar merā mazāq uṛāte, mere gāl par thappaṛ mār kar merī beizzatī karte haiṅ. sab ke sab mere ḵẖilāf muttahid ho gae haiṅ. 11allāh ne mujhe sharīroṅ ke havāle kar diyā, mujhe bedīnoṅ ke chaṅgul meṅ phaṅsā diyā hai. 12maiṅ sukūn se zindagī guzār rahā thā ki us ne mujhe pāsh pāsh kar diyā, mujhe gale se pakaṛ kar zamīn par paṭaḵẖ diyā. us ne mujhe apnā nishānā banā liyā, 13phir us ke tīr’andāzoṅ ne mujhe gher liyā. us ne berahamī se mere gurdoṅ ko chīr ḍālā, merā pit zamīn par uṅḍel diyā. 14bār bār vah merī qil’ābandī meṅ raḵẖnā ḍāltā rahā, pahalavān kī tarah mujh par hamlā kartā rahā.
15maiṅ ne ṭāṅke lagā kar apnī jild ke sāth ṭāṭ kā libās joṛ liyā hai, apnī shān-o-shaukat ḵẖāk meṅ milāī hai. 16ro ro kar merā chiharā sūj gayā hai, merī palkoṅ par ghanā aṅdherā chhā gayā hai. 17lekin vajah kyā hai? mere hāth to zulm se barī rahe, merī duā pāk-sāf rahī hai. 18ai zamīn, mere ḵẖūn ko mat ḍhāṁpnā! merī āh-o-zārī kabhī ārām kī jagah na pāe balki gūṅjtī rahe. 19ab bhī merā gavāh āsmān par hai, mere haq meṅ gavāhī dene vālā bulandiyoṅ par hai. 20merī āh-o-zārī merā tarjumān hai, maiṅ beḵẖwābī se allāh ke intizār meṅ rahatā hūṅ. 21merī āheṅ allāh ke sāmne fānī insān ke haq meṅ bāt kareṅgī, us tarah jis tarah koī apne dost ke haq meṅ bāt kare. 22kyūṅki thoṛe hī sāloṅ ke bād maiṅ us rāste par ravānā ho jāūṅgā jis se vāpas nahīṅ āūṅgā.