Ayyūb 2
ayyūb par bīmārī kā hamlā
1ek din farishte [a] lafzī tarjumā : allāh ke farzand. dubārā apne āp ko rabb ke huzūr pesh karne āe. iblīs bhī un ke darmiyān maujūd thā. 2rabb ne iblīs se pūchhā, “tū kahāṅ se āyā hai?” iblīs ne javāb diyā, “maiṅ duniyā meṅ idhar udhar ghūmtā phirtā rahā.” 3rabb bolā, “kyā tū ne mere bande ayyūb par tavajjuh dī? zamīn par us jaisā koī aur nahīṅ. vah beilzām hai, vah sīdhī rāh par chaltā, allāh kā ḵẖauf māntā aur har burāī se dūr rahatā hai. abhī tak vah apne beilzām kirdār par qāim hai hālāṅki tū ne mujhe use bilāvajah tabāh karne par uksāyā.”
4iblīs ne javāb diyā, “khāl kā badlā khāl hī hotā hai! insān apnī jān ko bachāne ke liye apnā sab kuchh de detā hai. 5lekin vah kyā karegā agar tū apnā hāth zarā baṛhā kar us kā jism [b] lafzī tarjumā : gosht-post aur haḍḍiyāṅ. chhū de? tab vah tere muṅh par hī tujh par lānat karegā.”
6rabb ne iblīs se kahā, “ṭhīk hai, vah tere hāth meṅ hai. lekin us kī jān ko mat chheṛnā.” 7iblīs rabb ke huzūr se chalā gayā aur ayyūb ko satāne lagā. chāṅd se le kar talve tak ayyūb ke pūre jism par badtarīn qism ke phoṛe nikal āe. 8tab ayyūb rākh meṅ baiṭh gayā aur ṭhīkre se apnī jild ko khurachne lagā.
9us kī bīvī bolī, “kyā tū ab tak apne beilzām kirdār par qāim hai? allāh par lānat karke dam chhoṛ de!” 10lekin us ne javāb diyā, “tū ahamaq aurat kī sī bāteṅ kar rahī hai. allāh kī taraf se bhalāī to ham qabūl karte haiṅ, to kyā munāsib nahīṅ ki us ke hāth se musībat bhī qabūl kareṅ?” is sāre muāmale meṅ ayyūb ne apne muṅh se gunāh na kiyā.
ayyūb ke tīn dost
11ayyūb ke tīn dost the. un ke nām ilīfaz temānī, bildad sūḵẖī aur zūfar nāmātī the. jab unheṅ ittilā milī ki ayyūb par yah tamām āfat ā gaī hai to har ek apne ghar se ravānā huā. unhoṅ ne mil kar faislā kiyā ki ikaṭṭhe afsos karne aur ayyūb ko tasallī dene jāeṅge. 12jab unhoṅ ne dūr se apnī nazar uṭhā kar ayyūb ko dekhā to us kī itnī burī hālat thī ki vah pahachānā nahīṅ jātā thā. tab vah zār-o-qatār rone lage. apne kapṛe phāṛ kar unhoṅ ne apne saroṅ par ḵẖāk ḍālī. 13phir vah us ke sāth zamīn par baiṭh gae. sāt din aur sāt rāt vah isī hālat meṅ rahe. is pūre arse meṅ unhoṅ ne ayyūb se ek bhī bāt na kī, kyūṅki unhoṅ ne dekhā ki vah shadīd dard kā shikār hai.