Ayyūb 20

zūfar : ġalat kām kī munsifānā sazā dī jāegī

¹tab zūfar nāmātī ne javāb de kar kahā,

²“yaqīnan mere muztarib ḵẖayālāt aur vah ihsāsāt jo mere andar se ubhar rahe haiṅ mujhe javāb dene par majbūr kar rahe haiṅ. ³mujhe aisī nasīhat sunnī paṛī jo merī beizzatī kā bāis thī, lekin merī samajh mujhe javāb dene kī taharīk de rahī hai.

⁴kyā tujhe mālūm nahīṅ ki qadīm zamāne se yānī jab se insān ko zamīn par rakhā gayā ⁵sharīr kā fatahmand nārā ārizī aur bedīn kī ḵẖushī pal bhar kī sābit huī hai? ⁶go us kā qad-o-qāmat āsmān tak pahuṅche aur us kā sar bādloṅ ko chhue ⁷tāham vah apne fuzle kī tarah abad tak tabāh ho jāegā. jinhoṅ ne use pahale dekhā thā vah pūchheṅge, ‘ab vah kahāṅ hai?’

⁸vah ḵẖwāb kī tarah uṛ jātā aur āindā kahīṅ nahīṅ pāyā jāegā, use rāt kī royā kī tarah bhulā diyā jātā hai. ⁹jis āṅkh ne use dekhā vah use āindā kabhī nahīṅ dekhegī. us kā ghar dubārā us kā mushāhadā nahīṅ karegā. ¹⁰us kī aulād ko ġarīboṅ se bhīk māṅgnī paṛegī, us ke apne hāthoṅ ko daulat vāpas denī paṛegī. ¹¹javānī kī jis tāqat se us kī haḍḍiyāṅ bharī haiṅ vah us ke sāth hī ḵẖāk meṅ mil jāegī.

¹²burāī bedīn ke muṅh meṅ mīṭhī hai. vah use apnī zabān tale chhupāe rakhtā, ¹³use mahfūz rakh kar jāne nahīṅ detā. ¹⁴lekin us kī ḵẖurāk peṭ meṅ ā kar ḵẖarāb ho jātī balki sāṁp kā zahar ban jātī hai. ¹⁵jo daulat us ne nigal lī use vah ugal degā, allāh hī yah chīzeṅ us ke peṭ se ḵẖārij karegā. ¹⁶us ne sāṁp kā zahar chūs liyā, aur sāṁp hī kī zabān use mār ḍālegī. ¹⁷vah nadiyoṅ se lutf’andoz nahīṅ hogā, shahad aur bālāī kī naharoṅ se mazā nahīṅ legā. ¹⁸jo kuchh us ne hāsil kiyā use vah hazam nahīṅ karegā balki sab kuchh vāpas karegā. jo daulat us ne apne kārobār se kamāī us se vah lutf nahīṅ uṭhāegā. ¹⁹kyūṅki us ne pastahāloṅ par zulm karke unheṅ tark kiyā hai, us ne aise gharoṅ ko chhīn liyā hai jinheṅ us ne tāmīr nahīṅ kiyā thā. ²⁰us ne peṭ meṅ kabhī sukūn mahsūs nahīṅ kiyā balki jo kuchh bhī chāhatā thā use bachne nahīṅ diyā. ²¹jab vah khānā khātā hai to kuchh nahīṅ bachtā, is liye us kī ḵẖushhālī qāim nahīṅ rahegī. ²²jūṅ hī use kasrat kī chīzeṅ hāsil hoṅgī vah musībat meṅ phaṅs jāegā. tab dukh-dard kā pūrā zor us par āegā. ²³kāsh allāh bedīn kā peṭ bhar kar apnā bhaṛaktā qahar us par nāzil kare, kāsh vah apnā ġazab us par barsāe.

²⁴go vah lohe ke hathiyār se bhāg jāe, lekin pītal kā tīr use chīr ḍālegā. ²⁵jab vah use apnī pīṭh se nikāle to tīr kī nok us ke kaleje meṅ se niklegī. use dahshatanāk vāqiāt pesh āeṅge. ²⁶gaharī tārīkī us ke ḵẖazānoṅ kī tāk meṅ baiṭhī rahegī. aisī āg jo insānoṅ ne nahīṅ lagāī use bhasm karegī. us ke ḵẖaime ke jitne log bach nikle unheṅ vah khā jāegī. ²⁷āsmān use mujrim ṭhaharāegā, zamīn us ke ḵẖilāf gavāhī dene ke liye khaṛī ho jāegī. ²⁸sailāb us kā ghar uṛā le jāegā, ġazab ke din shiddat se bahatā huā pānī us par se guzregā. ²⁹yah hai vah ajr jo allāh bedīnoṅ ko degā, vah virāsat jise allāh ne un ke liye muqarrar kī hai.”