Ayyūb 21
ayyūb : bahut dafā bedīnoṅ ko sazā nahīṅ miltī
1phir ayyūb ne javāb meṅ kahā,
2“dhyān se mere alfāz suno! yahī karne se mujhe tasallī do! 3jab tak maiṅ apnī bāt pesh na karūṅ mujhe bardāsht karo, is ke bād agar chāho to merā mazāq uṛāo. 4kyā maiṅ kisī insān se ehatijāj kar rahā hūṅ? hargiz nahīṅ! to phir kyā ajab ki merī rūh itnī taṅg ā gaī hai. 5mujh par nazar ḍālo to tumhāre roṅgṭe khaṛe ho jāeṅge aur tum hairānī se apnā hāth muṅh par rakhoge.
6jab kabhī mujhe vah ḵẖayāl yād ātā hai jo maiṅ pesh karnā chāhatā hūṅ to maiṅ dahshatzadā ho jātā hūṅ, mere jism par tharatharāhaṭ tārī ho jātī hai. 7ḵẖayāl yah hai ki bedīn kyūṅ jīte rahate haiṅ? na sirf vah umrrasīdā ho jāte balki un kī tāqat baṛhtī rahatī hai.
8un ke bacche un ke sāmne qāim ho jāte, un kī aulād un kī āṅkhoṅ ke sāmne mazbūt ho jātī hai. 9un ke ghar mahfūz haiṅ. na koī chīz unheṅ ḍarātī, na allāh kī sazā un par nāzil hotī hai. 10un kā sāṅḍ nasal baṛhāne meṅ kabhī nākām nahīṅ hotā, un kī gāy vaqt par janm detī, aur us ke bacche kabhī zāe nahīṅ hote.
11vah apne bacchoṅ ko bāhar khelne ke liye bhejte haiṅ to vah bheṛ-bakriyoṅ ke revaṛ kī tarah ghar se nikalte haiṅ. un ke laṛke kūdte phāṅdte nazar āte haiṅ. 12vah daf aur sarod bajā kar gīt gāte aur bāṅsrī kī surīlī āvāz nikāl kar apnā dil bahalāte haiṅ. 13un kī zindagī ḵẖushhāl rahatī hai, vah har din se pūrā lutf uṭhāte aur āḵẖirkār baṛe sukūn se pātāl meṅ utar jāte haiṅ.
14aur yah vah log haiṅ jo allāh se kahate haiṅ, ‘ham se dūr ho jā, ham terī rāhoṅ ko jānnā nahīṅ chāhate. 15qādir-e-mutlaq kaun hai ki ham us kī ḵẖidmat kareṅ? us se duā karne se hameṅ kyā fāidā hogā?’ 16kyā un kī ḵẖushhālī un ke apne hāth meṅ nahīṅ hotī? kyā bedīnoṅ ke mansūbe allāh se dūr nahīṅ rahate?
17aisā lagtā hai ki bedīnoṅ kā charāġ kabhī nahīṅ bujhtā. kyā un par kabhī musībat ātī hai? kyā allāh kabhī qahar meṅ ā kar un par vah tabāhī nāzil kartā hai jo un kā munāsib hissā hai? 18kyā havā ke jhoṅke kabhī unheṅ bhūse kī tarah aur āṅdhī kabhī unheṅ tūṛī kī tarah uṛā le jātī hai? afsos, aisā nahīṅ hotā. 19shāyad tum kaho, ‘allāh unheṅ sazā dene ke bajāy un ke bacchoṅ ko sazā degā.’ lekin maiṅ kahatā hūṅ ki use bāp ko hī sazā denī chāhie tāki vah apne gunāhoṅ kā natījā ḵẖūb jān le. 20us kī apnī hī āṅkheṅ us kī tabāhī dekheṅ, vah ḵẖud qādir-e-mutlaq ke ġazab kā piyālā pī le. 21kyūṅki jab us kī zindagī ke muqarrarā din iḵẖtitām tak pahuṅcheṅ to use kyā parvā hogī ki mere bād ghar vāloṅ ke sāth kyā hogā.
22lekin kaun allāh ko ilm sikhā saktā hai? vah to bulandiyoṅ par rahane vāloṅ kī bhī adālat kartā hai. 23ek shaḵẖs vafāt pāte vaqt ḵẖūb tandurust hotā hai. jīte jī vah baṛe sukūn aur itmīnān se zindagī guzār sakā. 24us ke bartan dūdh se bhare rahe, us kī haḍḍiyoṅ kā gūdā tar-o-tāzā rahā. 25dūsrā shaḵẖs shikastā hālat meṅ mar jātā hai aur use kabhī ḵẖushhālī kā lutf nasīb nahīṅ huā. 26ab donoṅ mil kar ḵẖāk meṅ paṛe rahate haiṅ, donoṅ kīṛe-makoṛoṅ se ḍhāṁpe rahate haiṅ.
27suno, maiṅ tumhāre ḵẖayālāt aur un sāzishoṅ se vāqif hūṅ jin se tum mujh par zulm karnā chāhate ho. 28kyūṅki tum kahate ho, ‘raīs kā ghar kahāṅ hai? vah ḵẖaimā kidhar gayā jis meṅ bedīn baste the? vah apne gunāhoṅ ke sabab se hī tabāh ho gae haiṅ.’ 29lekin un se pūchh lo jo idhar udhar safar karte rahate haiṅ. tumheṅ un kī gavāhī taslīm karnī chāhie 30ki āfat ke din sharīr ko sahīh-salāmat chhoṛā jātā hai, ki ġazab ke din use rihāī miltī hai.
31kaun us ke rū-ba-rū us ke chāl-chalan kī malāmat kartā, kaun use us ke ġalat kām kā munāsib ajr detā hai? 32log us ke janāze meṅ sharīk ho kar use qabr tak le jāte haiṅ. us kī qabr par chaukīdār lagāyā jātā hai. 33vādī kī miṭṭī ke ḍhele use mīṭhe lagte haiṅ. janāze ke pīchhe pīchhe tamām duniyā, us ke āge āge anaginat hujūm chaltā hai. 34chunāṅche tum mujhe abas bātoṅ se kyūṅ tasallī de rahe ho? tumhāre javāboṅ meṅ tumhārī bevafāī hī nazar ātī hai.”