Ayyūb 22

ilīfaz : ayyūb sharīr hai

¹phir ilīfaz temānī ne javāb de kar kahā,

²“kyā allāh insān se fāidā uṭhā saktā hai? hargiz nahīṅ! us ke liye dānishmand bhī fāide kā bāis nahīṅ. ³agar tū rāstbāz ho bhī to kyā vah is se apne liye nafā uṭhā saktā hai? hargiz nahīṅ! agar tū beilzām zindagī guzāre to kyā use kuchh hāsil hotā hai? ⁴allāh tujhe terī ḵẖudātaras zindagī ke sabab se malāmat nahīṅ kar rahā. yah na soch ki vah isī liye adālat meṅ tujh se javāb talab kar rahā hai. ⁵nahīṅ, vajah terī baṛī badkārī, tere lā-mahdūd gunāh haiṅ.

⁶jab tere bhāiyoṅ ne tujh se qarz liyā to tū ne bilāvajah vah chīzeṅ apnā lī hoṅgī jo unhoṅ ne tujhe zamānat ke taur par dī thīṅ, tū ne unheṅ un ke kapṛoṅ se maharūm kar diyā hogā. ⁷tū ne thakemāndoṅ ko pānī pilāne se aur bhūke marne vāloṅ ko khānā khilāne se inkār kiyā hogā. ⁸beshak terā ravayyā is ḵẖayāl par mabnī thā ki pūrā mulk tāqatavaroṅ kī milkiyat hai, ki sirf baṛe log us meṅ rah sakte haiṅ. ⁹tū ne bevāoṅ ko ḵẖālī hāth moṛ diyā hogā, yatīmoṅ kī tāqat pāsh pāsh kī hogī. ¹⁰isī liye tū phaṅdoṅ se ghirā rahatā hai, achānak hī tujhe dahshatanāk vāqiāt ḍarāte haiṅ. ¹¹yahī vajah hai ki tujh par aisā aṅdherā chhā gayā hai ki tū dekh nahīṅ saktā, ki sailāb ne tujhe ḍubo diyā hai.

¹²kyā allāh āsmān kī bulandiyoṅ par nahīṅ hotā? vah to sitāroṅ par nazar ḍāltā hai, ḵẖwāh vah kitne hī ūṅche kyūṅ na hoṅ. ¹³to bhī tū kahatā hai, ‘allāh kyā jāntā hai? kyā vah kāle bādloṅ meṅ se dekh kar adālat kar saktā hai? ¹⁴vah ghane bādloṅ meṅ chhupā rahatā hai, is liye jab vah āsmān ke gumbad par chaltā hai to use kuchh nazar nahīṅ ātā.’ ¹⁵kyā tū us qadīm rāh se bāz nahīṅ āegā jis par badkār chalte rahe haiṅ? ¹⁶vah to apne muqarrarā vaqt se pahale hī sukaṛ gae, un kī bunyādeṅ sailāb se hī uṛā lī gaīṅ. ¹⁷unhoṅ ne allāh se kahā, ‘ham se dūr ho jā,’ aur ‘qādir-e-mutlaq hamāre liye kyā kuchh kar saktā hai?’ ¹⁸lekin allāh hī ne un ke gharoṅ ko bharpūr ḵẖushhālī se navāzā, go bedīnoṅ ke bure mansūbe us se dūr hī dūr rahate haiṅ. ¹⁹rāstbāz un kī tabāhī dekh kar ḵẖush hue, bequsūroṅ ne un kī haṅsī uṛā kar kahā, ²⁰‘lo, yah dekho, un kī jāydād kis tarah miṭ gaī, un kī daulat kis tarah bhasm ho gaī hai!’

²¹ai ayyūb, allāh se sulah karke salāmatī hāsil kar, tab hī tū ḵẖushhālī pāegā. ²²allāh ke muṅh kī hidāyat apnā le, us ke farmān apne dil meṅ mahfūz rakh. ²³agar tū qādir-e-mutlaq ke pās vāpas āe to bahāl ho jāegā, aur tere ḵẖaime se badī dūr hī rahegī. ²⁴sone ko ḵẖāk ke barābar, ofīr kā ḵẖālis sonā vādī ke patthar ke barābar samajh le ²⁵to qādir-e-mutlaq ḵẖud terā sonā hogā, vahī tere liye chāṅdī kā ḍher hogā. ²⁶tab tū qādir-e-mutlaq se lutf’andoz hogā aur allāh ke huzūr apnā sar uṭhā sakegā. ²⁷tū us se iltijā karegā to vah terī sunegā aur tū apnī mannateṅ baṛhā sakegā. ²⁸jo kuchh bhī tū karne kā irādā rakhe us meṅ tujhe kāmyābī hogī, terī rāhoṅ par raushnī chamkegī. ²⁹kyūṅki jo sheḵẖī bhagārtā hai use allāh past kartā jabki jo pastahāl hai use vah najāt detā hai. ³⁰vah bequsūr ko chhuṛātā hai, chunāṅche agar tere hāth pāk hoṅ to vah tujhe chhuṛāegā.”