Ayyūb 23

ayyūb : kāsh maiṅ allāh ko kahīṅ pātā

¹ayyūb ne javāb meṅ kahā,

²“beshak āj merī shikāyat sarkashī kā izhār hai, hālāṅki maiṅ apnī āhoṅ par qābū pāne kī koshish kar rahā hūṅ.

³kāsh maiṅ use pāne kā ilm rakhūṅ tāki us kī sukūnatgāh tak pahuṅch sakūṅ. ⁴phir maiṅ apnā muāmalā tartībavār us ke sāmne pesh kartā, maiṅ apnā muṅh dalāil se bhar letā. ⁵tab mujhe us ke javāboṅ kā patā chaltā, maiṅ us ke bayānāt par ġaur kar saktā. ⁶kyā vah apnī azīm quvvat mujh se laṛne par sarf kartā? hargiz nahīṅ! vah yaqīnan mujh par tavajjuh detā. ⁷agar maiṅ vahāṅ us ke huzūr ā saktā to diyānatdār ādmī kī tarah us ke sāth muqaddmā laṛtā. tab maiṅ hameshā ke liye apne munsif se bach nikaltā!

⁸lekin afsos, agar maiṅ mashriq kī taraf jāūṅ to vah vahāṅ nahīṅ hotā, maġrib kī jānib baṛhūṅ to vahāṅ bhī nahīṅ miltā. ⁹shimāl maiṅ use ḍhūṅḍūṅ to vah dikhāī nahīṅ detā, junūb kī taraf ruḵẖ karūṅ to vahāṅ bhī poshīdā rahatā hai. ¹⁰kyūṅki vah merī rāh ko jāntā hai. agar vah merī jāṅch-paṛtāl kartā to maiṅ ḵẖālis sonā sābit hotā. ¹¹mere qadam us kī rāh meṅ rahe haiṅ, maiṅ rāh se na bāīṅ, na dāīṅ taraf haṭā balki sīdhā us par chaltā rahā. ¹²maiṅ us ke hoṅṭoṅ ke farmān se bāz nahīṅ āyā balki apne dil meṅ hī us ke muṅh kī bāteṅ mahfūz rakhī haiṅ.

¹³agar vah faislā kare to kaun use rok saktā hai? jo kuchh bhī vah karnā chāhe use amal meṅ lātā hai. ¹⁴jo bhī mansūbā us ne mere liye bāṅdhā use vah zarūr pūrā karegā. aur us ke zahan meṅ mazīd bahut se aise mansūbe haiṅ. ¹⁵isī liye maiṅ us ke huzūr dahshatzadā hūṅ. jab bhī maiṅ in bātoṅ par dhyān dūṅ to us se ḍartā hūṅ. ¹⁶allāh ne ḵẖud mujhe shikastādil kiyā, qādir-e-mutlaq hī ne mujhe dahshat khilāī hai. ¹⁷kyūṅki na maiṅ tārīkī se tabāh ho rahā hūṅ, na is liye ki ghane aṅdhere ne mere chihare ko ḍhāṁp diyā hai.