Ayyūb 26
ayyūb : tū ne mujhe kitne acchhe mashvre die haiṅ!
1ayyūb ne javāb de kar kahā,
2“vāh jī vāh! tū ne kyā ḵẖūb use sahārā diyā jo bebas hai, kyā ḵẖūb us bāzū ko mazbūt kar diyā jo betāqat hai! 3tū ne use kitne acchhe mashvre die jo hikmat se maharūm hai, apnī samajh kī kitnī gaharī bāteṅ us par zāhir kī haiṅ. 4tū ne kis kī madad se yah kuchh pesh kiyā hai? kis ne terī rūh meṅ vah bāteṅ ḍālīṅ jo tere muṅh se nikal āī haiṅ?
kaun allāh kī azmat kā andāzā lagā saktā hai?
5allāh ke sāmne vah tamām murdā arvāh jo pānī aur us meṅ rahane vāloṅ ke nīche bastī haiṅ ḍar ke māre taṛap uṭhtī haiṅ. 6hāṅ, us ke sāmne pātāl barahanā aur us kī gaharāiyāṅ beniqāb haiṅ.
7allāh hī ne shimāl ko vīrān-o-sunsān jagah ke ūpar tān liyā, usī ne zamīn ko yūṅ lagā diyā ki vah kisī bhī chīz se nahīṅ laṭaktī. 8us ne apne bādloṅ meṅ pānī lapeṭ liyā, lekin vah bojh tale na phaṭe. 9us ne apnā taḵẖt nazroṅ se chhupā kar apnā bādal us par chhā jāne diyā. 10us ne pānī kī satah par dāirā banāyā jo raushnī aur aṅdhere ke darmiyān hadd ban gayā.
11āsmān ke satūn laraz uṭhe. us kī dhamkī par vah dahshatzadā hue. 12apnī qudrat se allāh ne samundar ko thamā diyā, apnī hikmat se rahab ajhdahe ko ṭukṛe ṭukṛe kar diyā. 13us ke rūh ne āsmān ko sāf kiyā, us ke hāth ne farār hone vāle sāṁp ko chhed ḍālā. 14lekin aise kām us kī rāhoṅ ke kināre par hī kie jāte haiṅ. jo kuchh ham us ke bāre meṅ sunte haiṅ vah dhīmī dhīmī āvāz se hamāre kān tak pahuṅchtā hai. to phir kaun us kī qudrat kī kaṛaktī āvāz samajh saktā hai?”