Ayyūb 27

maiṅ bequsūr hūṅ

¹phir ayyūb ne apnī bāt jārī rakhī,

²“allāh kī hayāt kī qasam jis ne merā insāf karne se inkār kiyā, qādir-e-mutlaq kī qasam jis ne merī zindagī talḵẖ kar dī hai, ³mere jīte jī, hāṅ jab tak allāh kā dam merī nāk meṅ hai ⁴mere hoṅṭ jhūṭ nahīṅ boleṅge, merī zabān dhokā bayān nahīṅ karegī. ⁵maiṅ kabhī taslīm nahīṅ karūṅgā ki tumhārī bāt durust hai. maiṅ beilzām hūṅ aur marte dam tak is ke ulaṭ nahīṅ kahūṅgā. ⁶maiṅ isrār kartā hūṅ ki rāstbāz hūṅ aur is se kabhī bāz nahīṅ āūṅgā. merā dil mere kisī bhī din ke bāre meṅ mujhe malāmat nahīṅ kartā.

⁷allāh kare ki mere dushman ke sāth vahī sulūk kiyā jāe jo bedīnoṅ ke sāth kiyā jāegā, ki mere muḵẖālif kā vah anjām ho jo badkāroṅ ko pesh āegā. ⁸kyūṅki us vaqt sharīr kī kyā ummīd rahegī jab use is zindagī se munqate kiyā jāegā, jab allāh us kī jān us se talab karegā? ⁹kyā allāh us kī chīḵẖeṅ sunegā jab vah musībat meṅ phaṅs kar madad ke liye pukāregā? ¹⁰yā kyā vah qādir-e-mutlaq se lutf’andoz hogā aur har vaqt allāh ko pukāregā?

¹¹ab maiṅ tumheṅ allāh kī qudrat ke bāre meṅ tālīm dūṅgā, qādir-e-mutlaq kā irādā tum se nahīṅ chhupāūṅgā. ¹²dekho, tum sab ne is kā mushāhadā kiyā hai. to phir is qism kī bātil bāteṅ kyūṅ karte ho?

bedīn zindā nahīṅ rahegā

¹³bedīn allāh se kyā ajr pāegā, zālim ko qādir-e-mutlaq se mīrās meṅ kyā milegā? ¹⁴go us ke bacche mut’addid hoṅ, lekin āḵẖirkār vah talvār kī zad meṅ āeṅge. us kī aulād bhūkī rahegī. ¹⁵jo bach jāeṅ unheṅ muhalak bīmārī se qabr meṅ pahuṅchāyā jāegā, aur un kī bevāeṅ mātam nahīṅ kar pāeṅgī. ¹⁶beshak vah ḵẖāk kī tarah chāṅdī kā ḍher lagāe aur miṭṭī kī tarah nafīs kapṛoṅ kā todā ikaṭṭhā kare, ¹⁷lekin jo kapṛe vah jamā kare unheṅ rāstbāz pahan legā, aur jo chāṅdī vah ikaṭṭhī kare use bequsūr taqsīm karegā. ¹⁸jo ghar bedīn banā le vah ghoṅsle kī mānind hai, us ārizī jhoṁpṛī kī mānind jo chaukīdār apne liye banā letā hai. ¹⁹vah amīr hālat meṅ so jātā hai, lekin āḵẖirī dafā. jab apnī āṅkheṅ khol letā to tamām daulat jātī rahī hai. ²⁰us par haulnāk vāqiāt kā sailāb ṭūṭ paṛtā, use rāt ke vaqt āṅdhī chhīn letī hai. ²¹mashriqī lū use uṛā le jātī, use uṭhā kar us ke maqām se dūr phaiṅk detī hai. ²²berahamī se vah us par yūṅ jhapaṭṭā mārtī rahatī hai ki use bār bār bhāgnā paṛtā hai. ²³vah tāliyāṅ bajā kar apnī hiqārat kā izhār kartī, apnī jagah se āvāze kastī hai.