Ayyūb 28
hikmat kahāṅ pāī jātī hai?
1yaqīnan chāṅdī kī kāneṅ hotī haiṅ aur aisī jagaheṅ jahāṅ sonā ḵẖālis kiyā jātā hai. 2lohā zamīn se nikālā jātā aur log patthar pighlā kar tāṁbā banā lete haiṅ. 3insān aṅdhere ko ḵẖatm karke zamīn kī gaharī gaharī jagahoṅ tak kacchī dhāt kā khoj lagātā hai, ḵẖwāh vah kitne aṅdhere meṅ kyūṅ na ho. 4ek ajnabī qaum suraṅg lagātī hai. jab rassoṅ se laṭke hue kām karte aur insānoṅ se dūr kān meṅ jhūmte haiṅ to zamīn par guzarne vāloṅ ko un kī yād hī nahīṅ rahatī. 5zamīn kī satah par ḵẖurāk paidā hotī hai jabki us kī gaharāiyāṅ yūṅ tabdīl ho jātī haiṅ jaise us meṅ āg lagī ho. 6pattharoṅ se saṅg-e-lājvard nikālā jātā hai jis meṅ sone ke zarre bhī pāe jāte haiṅ.
7yah aise rāste haiṅ jo koī bhī shikārī parindā nahīṅ jāntā, jo kisī bhī bāz ne nahīṅ dekhā. 8jaṅgal ke robdār jānvaroṅ meṅ se koī bhī in rāhoṅ par nahīṅ chalā, kisī bhī sherbabar ne in par qadam nahīṅ rakhā. 9insān saṅg-e-chaqmāq par hāth lagā kar pahāṛoṅ ko jaṛ se ulṭā detā hai. 10vah patthar meṅ suraṅg lagā kar har qism kī qīmtī chīz dekh letā 11aur zamīnadoz nadiyoṅ ko band karke poshīdā chīzeṅ raushnī meṅ lātā hai.
12lekin hikmat kahāṅ pāī jātī hai, samajh kahāṅ se miltī hai? 13insān us tak jāne vālī rāh nahīṅ jāntā, kyūṅki use mulk-e-hayāt meṅ pāyā nahīṅ jātā. 14samundar kahatā hai, ‘hikmat mere pās nahīṅ hai,’ aur us kī gaharāiyāṅ bayān kartī haiṅ, ‘yahāṅ bhī nahīṅ hai.’
15hikmat ko na ḵẖālis sone, na chāṅdī se ḵẖarīdā jā saktā hai. 16use pāne ke liye na ofīr kā sonā, na beshaqīmat aqīq-e-ahmar [a] charanelian yā saṅg-e-lājvard [b] lapis lazuli kāfī haiṅ. 17sonā aur shīshā us kā muqāblā nahīṅ kar sakte, na vah sone ke zevrāt ke ivz mil saktī hai. 18us kī nisbat mūṅgā aur billaur kī kyā qadar hai? hikmat se bharī thailī motiyoṅ se kahīṅ ziyādā qīmtī hai. 19ethopiyā kā zabarjad [c] peridot us kā muqāblā nahīṅ kar saktā, use ḵẖālis sone ke liye ḵẖarīdā nahīṅ jā saktā.
20hikmat kahāṅ se ātī, samajh kahāṅ se mil saktī hai? 21vah tamām jāndāroṅ se poshīdā rahatī balki parindoṅ se bhī chhupī rahatī hai. 22pātāl aur maut us ke bāre meṅ kahate haiṅ, ‘ham ne us ke bāre meṅ sirf afwāheṅ sunī haiṅ.’
23lekin allāh us tak jāne vālī rāh ko jāntā hai, use mālūm hai ki kahāṅ mil saktī hai. 24kyūṅki usī ne zamīn kī hudūd tak dekhā, āsmān tale sab kuchh par nazar ḍālī 25tāki havā kā vazan muqarrar kare aur pānī kī paimāish karke us kī hudūd mut’ayyin kare. 26usī ne bārish ke liye farmān jārī kiyā aur bādal kī kaṛaktī bijlī ke liye rāstā tayyār kiyā. 27usī vaqt us ne hikmat ko dekh kar us kī jāṅch-paṛtāl kī. us ne use qāim bhī kiyā aur us kī tah tak tahqīq bhī kī. 28insān se us ne kahā, ‘suno, allāh kā ḵẖauf mānnā hī hikmat aur burāī se dūr rahanā hī samajh hai’.”