Ayyūb 29

kāsh merī zindagī pahale kī tarah ho

¹ayyūb ne apnī bāt jārī rakh kar kahā,

²“kāsh maiṅ dubārā māzī ke vah din guzār sakūṅ jab allāh merī dekh-bhāl kartā thā, ³jab us kī shamā mere sar ke ūpar chamaktī rahī aur maiṅ us kī raushnī kī madad se aṅdhere meṅ chaltā thā. ⁴us vaqt merī javānī urūj par thī aur merā ḵẖaimā allāh ke sāy meṅ rahatā thā. ⁵qādir-e-mutlaq mere sāth thā, aur maiṅ apne beṭoṅ se ghirā rahatā thā. ⁶kasrat ke bāis mere qadam dahī se dhoe rahate aur chaṭān se tel kī nadiyāṅ phūṭ kar nikaltī thīṅ.

⁷jab kabhī maiṅ shahar ke darvāze se nikal kar chauk meṅ apnī kursī par baiṭh jātā ⁸to javān ādmī mujhe dekh kar pīchhe haṭ kar chhup jāte, buzurg uṭh kar khaṛe rahate, ⁹raīs bolne se bāz ā kar muṅh par hāth rakhte, ¹⁰shurfā kī āvāz dab jātī aur un kī zabān tālū se chipak jātī thī.

¹¹jis kān ne merī bāteṅ sunīṅ us ne mujhe mubārak kahā, jis āṅkh ne mujhe dekhā us ne mere haq meṅ gavāhī dī. ¹²kyūṅki jo musībat meṅ ā kar āvāz detā use maiṅ bachātā, besahārā yatīm ko chhuṭkārā detā thā. ¹³tabāh hone vāle mujhe barkat dete the. mere bāis bevāoṅ ke diloṅ se ḵẖushī ke nāre ubhar āte the. ¹⁴maiṅ rāstbāzī se mulabbas aur rāstbāzī mujh se mulabbas rahatī thī, insāf merā choġā aur pagṛī thā.

¹⁵aṅdhoṅ ke liye maiṅ āṅkheṅ, laṅgaṛoṅ ke liye pāoṅ banā rahatā thā. ¹⁶maiṅ ġarīboṅ kā bāp thā, aur jab kabhī ajnabī ko muqaddmā laṛnā paṛā to maiṅ ġaur se us ke muāmale kā muāinā kartā thā tāki us kā haq mārā na jāe. ¹⁷maiṅ ne bedīn kā jabṛā toṛ kar us ke dāṅtoṅ meṅ se shikār chhuṛāyā.

¹⁸us vaqt merā ḵẖayāl thā, ‘maiṅ apne hī ghar meṅ vafāt pāūṅgā, sīmurġ kī tarah apnī zindagī ke dinoṅ meṅ izāfā karūṅgā. ¹⁹merī jaṛeṅ pānī tak phailī aur merī shāḵẖeṅ os se tar raheṅgī. ²⁰merī izzat har vaqt tāzā rahegī, aur mere hāth kī kamān ko naī taqviyat miltī rahegī.’

²¹log merī sun kar ḵẖāmoshī se mere mashvaroṅ ke intizār meṅ rahate the. ²²mere bāt karne par vah javāb meṅ kuchh na kahate balki mere alfāz halkī sī būṅdā-bāṅdī kī tarah un par ṭapakte rahate. ²³jis tarah insān shiddat se bārish ke intizār meṅ rahatā hai usī tarah vah mere intizār meṅ rahate the. vah muṅh pasār kar bahār kī bārish kī tarah mere alfāz ko jazab kar lete the. ²⁴jab maiṅ un se bāt karte vaqt muskurātā to unheṅ yaqīn nahīṅ ātā thā, merī un par meharbānī un ke nazdīk nihāyat qīmtī thī. ²⁵maiṅ un kī rāh un ke liye chun kar un kī qiyādat kartā, un ke darmiyān yūṅ bastā thā jis tarah bādshāh apne dastoṅ ke darmiyān. maiṅ us kī mānind thā jo mātam karne vāloṅ ko tasallī detā hai.