Ayyūb 30
mujhe radd kiyā gayā hai
1lekin ab vah merā mazāq uṛāte haiṅ, hālāṅki un kī umr mujh se kam hai aur maiṅ un ke bāpoṅ ko apnī bheṛ-bakriyoṅ kī dekh-bhāl karne vāle kuttoṅ ke sāth kām par lagāne ke bhī lāiq nahīṅ samajhtā thā. 2mere liye un ke hāthoṅ kī madad kā kyā fāidā thā? un kī pūrī tāqat to jātī rahī thī. 3ḵẖurāk kī kamī aur shadīd bhūk ke māre vah ḵẖushk zamīn kī thoṛī bahut paidāvār katar katar kar khāte haiṅ. har vaqt vah tabāhī aur vīrānī ke dāman meṅ rahate haiṅ. 4vah jhāṛiyoṅ se ḵẖatmī kā phal toṛ kar khāte, jhāṛiyoṅ [a] yānī jhāṛī banām baroom, sīṅk qism kī jhāṛī jis ke phūl zard hote haiṅ. kī jaṛeṅ āg tāpne ke liye ikaṭṭhī karte haiṅ. 5unheṅ ābādiyoṅ se ḵẖārij kiyā gayā hai, aur log ‘chor chor’ chillā kar unheṅ bhagā dete haiṅ. 6unheṅ ghāṭiyoṅ kī ḍhalānoṅ par basnā paṛtā, vah zamīn ke ġāroṅ meṅ aur pattharoṅ ke darmiyān hī rahate haiṅ. 7jhāṛiyoṅ ke darmiyān vah āvāzeṅ dete aur mil kar ūṅṭakaṭāroṅ tale dabak jāte haiṅ. 8in kamīne aur benām logoṅ ko mār mār kar mulk se bhagā diyā gayā hai.
9aur ab maiṅ in hī kā nishānā ban gayā hūṅ. apne gītoṅ meṅ vah merā mazāq uṛāte haiṅ, merī burī hālat un ke liye mazhakāḵẖez misāl ban gaī hai. 10vah ghin khā kar mujh se dūr rahate aur mere muṅh par thūkne se nahīṅ rukte. 11chūṅki allāh ne merī kamān kī tāṅt khol kar merī rusvāī kī hai, is liye vah merī maujūdgī meṅ belagām ho gae haiṅ. 12mere dahane hāth hujūm khaṛe ho kar mujhe ṭhokar khilāte aur merī fasīl ke sāth miṭṭī ke ḍher lagāte haiṅ tāki us meṅ raḵẖnā ḍāl kar mujhe tabāh kareṅ. 13vah merī qil’ābandiyāṅ ḍhā kar mujhe ḵẖāk meṅ milāne meṅ kāmyāb ho jāte haiṅ. kisī aur kī madad darkār hī nahīṅ. 14vah raḵẖne meṅ dāḵẖil hote aur jauq-dar-jauq tabāhashudā fasīl meṅ se guzar kar āge baṛhte haiṅ. 15haulnāk vāqiāt mere ḵẖilāf khaṛe ho gae haiṅ, aur vah tez havā kī tarah mere vaqār ko uṛā le jā rahe haiṅ. merī salāmatī bādal kī tarah ojhal ho gaī hai.
16aur ab merī jān nikal rahī hai, maiṅ musībat ke dinoṅ ke qābū meṅ ā gayā hūṅ. 17rāt ko merī haḍḍiyoṅ ko chhedā jātā hai, katarne vālā dard mujhe kabhī nahīṅ chhoṛtā. 18allāh baṛe zor se merā kapṛā pakaṛ kar girībān kī tarah mujhe apnī saḵẖt girift meṅ rakhtā hai. 19us ne mujhe kīchaṛ meṅ phaiṅk diyā hai, aur dekhne meṅ maiṅ ḵẖāk aur miṭṭī hī ban gayā hūṅ. 20maiṅ tujhe pukārtā, lekin tū javāb nahīṅ detā. maiṅ khaṛā ho jātā, lekin tū mujhe ghūrtā hī rahatā hai. 21tū mere sāth apnā sulūk badal kar mujh par zulm karne lagā, apne hāth ke pūre zor se mujhe satāne lagā hai. 22tū mujhe uṛā kar havā par savār hone detā, garajte tūfān meṅ ghulne detā hai. 23hāṅ, ab maiṅ jāntā hūṅ ki tū mujhe maut ke havāle karegā, us ghar meṅ pahuṅchāegā jahāṅ ek din tamām jāndār jamā ho jāte haiṅ.
24yaqīnan maiṅ ne kabhī bhī apnā hāth kisī zarūratmand ke ḵẖilāf nahīṅ uṭhāyā jab us ne apnī musībat meṅ āvāz dī. 25balki jab kisī kā burā hāl thā to maiṅ hamdardī se rone lagā, ġarīboṅ kī hālat dekh kar merā dil ġam khāne lagā. 26tāham mujh par musībat āī, agarchi maiṅ bhalāī kī ummīd rakh saktā thā. mujh par ghanā aṅdherā chhā gayā, hālāṅki maiṅ raushnī kī tavaqqo kar saktā thā. 27mere andar sab kuchh muztarib hai aur kabhī ārām nahīṅ kar saktā, merā vāstā taklīfdih dinoṅ se paṛtā hai. 28maiṅ mātmī libās meṅ phirtā hūṅ aur koī mujhe tasallī nahīṅ detā, hālāṅki maiṅ jamāat meṅ khaṛe ho kar madad ke liye āvāz detā hūṅ. 29maiṅ gīdṛoṅ kā bhāī aur uqābī ullūoṅ kā sāthī ban gayā hūṅ. 30merī jild kālī ho gaī, merī haḍḍiyāṅ taptī garmī ke sabab se jhulas gaī haiṅ. 31ab merā sarod sirf mātam karne aur merī bāṅsrī sirf rone vāloṅ ke liye istemāl hotī hai.