Ayyūb 31
merī āḵẖirī bāt : maiṅ begunāh hūṅ
1maiṅ ne apnī āṅkhoṅ se ahd bāṅdhā hai. to phir maiṅ kis tarah kisī kuṅvārī par nazar ḍāl saktā hūṅ? 2kyūṅki insān ko āsmān par rahane vāle ḵẖudā kī taraf se kyā nasīb hai, use bulandiyoṅ par basne vāle qādir-e-mutlaq se kyā virāsat pānā hai? 3kyā aisā nahīṅ hai ki nārāst shaḵẖs ke liye āfat aur badkār ke liye tabāhī muqarrar hai? 4merī rāheṅ to allāh ko nazar ātī haiṅ, vah merā har qadam gin letā hai.
5na maiṅ kabhī dhoke se chalā, na mere pāoṅ ne kabhī fareb dene ke liye phurtī kī. agar is meṅ zarā bhī shak ho 6to allāh mujhe insāf ke tarāzū meṅ tol le, allāh merī beilzām hālat mālūm kare. 7agar mere qadam sahīh rāh se haṭ gae, merī āṅkheṅ mere dil ko ġalat rāh par le gaīṅ yā mere hāth dāġdār hue 8to phir jo bīj maiṅ ne boyā us kī paidāvār koī aur khāe, jo fasleṅ maiṅ ne lagāīṅ unheṅ ukhāṛā jāe.
9agar merā dil kisī aurat se nājāiz tālluqāt rakhne par uksāyā gayā aur maiṅ is maqsad se apne paṛosī ke darvāze par tāk lagāe baiṭhā 10to phir allāh kare ki merī bīvī kisī aur ādmī kī gandum pīse, ki koī aur us par jhuk jāe. 11kyūṅki aisī harkat sharmanāk hotī, aisā jurm sazā ke lāiq hotā hai. 12aise gunāh kī āg pātāl tak sab kuchh bhasm kar detī hai. agar vah mujh se sarzad hotā to merī tamām fasal jaṛoṅ tak rākh kar detā.
13agar merā naukar-naukrāniyoṅ ke sāth jhagṛā thā aur maiṅ ne un kā haq mārā 14to maiṅ kyā karūṅ jab allāh adālat meṅ khaṛā ho jāe? jab vah merī pūchhgichh kare to maiṅ use kyā javāb dūṅ? 15kyūṅki jis ne mujhe merī māṅ ke peṭ meṅ banāyā us ne unheṅ bhī banāyā. ek hī ne unheṅ bhī aur mujhe bhī raham meṅ tashkīl diyā.
16kyā maiṅ ne pastahāloṅ kī zarūriyāt pūrī karne se inkār kiyā yā bevā kī āṅkhoṅ ko bujhne diyā? hargiz nahīṅ! 17kyā maiṅ ne apnī roṭī akele hī khāī aur yatīm ko us meṅ sharīk na kiyā? 18hargiz nahīṅ, balki apnī javānī se le kar maiṅ ne us kā bāp ban kar us kī parvarish kī, apnī paidāish se hī bevā kī rāhanumāī kī. 19jab kabhī maiṅ ne dekhā ki koī kapṛoṅ kī kamī ke bāis halāk ho rahā hai, ki kisī ġarīb ke pās kambal tak nahīṅ 20to maiṅ ne use apnī bheṛoṅ kī kuchh ūn dī tāki vah garm ho sake. aise log mujhe duā dete the. 21maiṅ ne kabhī bhī yatīmoṅ ke ḵẖilāf hāth nahīṅ uṭhāyā, us vaqt bhī nahīṅ jab shahar ke darvāze meṅ baiṭhe buzurg mere haq meṅ the. 22agar aisā na thā to allāh kare ki merā shānā kaṅdhe se nikal kar gir jāe, ki merā bāzū joṛ se phāṛā jāe! 23aisī harkateṅ mere liye nāmumkin thīṅ, kyūṅki agar maiṅ aisā kartā to maiṅ allāh se dahshat khātā rahatā, maiṅ us se ḍar ke māre qāim na rah saktā.
24kyā maiṅ ne sone par apnā pūrā bharosā rakhā yā ḵẖālis sone se kahā, ‘tujh par hī merā etimād hai’? hargiz nahīṅ! 25kyā maiṅ is liye ḵẖush thā ki merī daulat ziyādā hai aur mere hāth ne bahut kuchh hāsil kiyā hai? hargiz nahīṅ! 26kyā sūraj kī chamak-damak aur chāṅd kī purvaqār ravish dekh kar 27mere dil ko kabhī chupke se ġalat rāh par lāyā gayā? kyā maiṅ ne kabhī un kā ehatirām kiyā? [a] lafzī tarjumā : hāth se unheṅ bosā diyā. 28hargiz nahīṅ, kyūṅki yah bhī sazā ke lāiq jurm hai. agar maiṅ aisā kartā to bulandiyoṅ par rahane vāle ḵẖudā kā inkār kartā.
29kyā maiṅ kabhī ḵẖush huā jab mujh se nafrat karne vālā tabāh huā? kyā maiṅ bāġ bāġ huā jab us par musībat āī? hargiz nahīṅ! 30maiṅ ne apne muṅh ko ijāzat na dī ki gunāh karke us kī jān par lānat bheje. 31balki mere ḵẖaime ke ādmiyoṅ ko taslīm karnā paṛā, ‘koī nahīṅ hai jo ayyūb ke gosht se ser na huā.’ 32ajnabī ko bāhar galī meṅ rāt guzārnī nahīṅ paṛtī thī balki merā darvāzā musāfiroṅ ke liye khulā rahatā thā. 33kyā maiṅ ne kabhī ādam kī tarah apnā gunāh chhupā kar apnā qusūr dil meṅ poshīdā rakhā, 34is liye ki hujūm se ḍartā aur apne rishtedāroṅ se dahshat khātā thā? hargiz nahīṅ! maiṅ ne kabhī bhī aisā kām na kiyā jis ke bāis mujhe ḍar ke māre chup rahanā paṛtā aur ghar se nikal nahīṅ saktā thā.
35kāsh koī merī sune! dekho, yahāṅ merī bāt par mere dastaḵẖat haiṅ, ab qādir-e-mutlaq mujhe javāb de. kāsh mere muḵẖālif likh kar mujhe vah ilzāmāt batāeṅ jo unhoṅ ne mujh par lagāe haiṅ! 36agar ilzāmāt kā kāġaz miltā to maiṅ use uṭhā kar apne kaṅdhe par rakhtā, use pagṛī kī tarah apne sar par bāṅdh letā. 37maiṅ allāh ko apne qadmoṅ kā pūrā hisāb-kitāb de kar raīs kī tarah us ke qarīb pahuṅchtā.
38kyā merī zamīn ne madad ke liye pukār kar mujh par ilzām lagāyā hai? kyā us kī reghārayāṅ mere sabab se mil kar ro paṛī haiṅ? 39kyā maiṅ ne us kī paidāvār ajr die baġair khāī, us par mehanat-mashaqqat karne vāloṅ ke liye āheṅ bharne kā bāis ban gayā? hargiz nahīṅ! 40agar maiṅ is meṅ qusūrvār ṭhaharūṅ to gandum ke bajāy ḵẖārdār jhāṛiyāṅ aur jau ke bajāy dhatūrā [b] ek badabūdār paudā. uge.” yūṅ ayyūb kī bāteṅ iḵẖtitām ko pahuṅch gaīṅ.