Ayyūb 33

allāh kaī tarīqoṅ se insān se hamkalām hotā hai

¹ai ayyūb, merī taqrīr suneṅ, merī tamām bātoṅ par kān dhareṅ! ²ab maiṅ apnā muṅh khol detā hūṅ, merī zabān boltī hai. ³mere alfāz sīdhī rāh par chalne vāle dil se ubhar āte haiṅ, mere hoṅṭ diyānatdārī se vah kuchh bayān karte haiṅ jo maiṅ jāntā hūṅ. ⁴allāh ke rūh ne mujhe banāyā, qādir-e-mutlaq ke dam ne mujhe zindagī baḵẖshī.

⁵agar āp is qābil hoṅ to mujhe javāb deṅ aur apnī bāteṅ tartīt se pesh karke merā muqāblā kareṅ. ⁶allāh kī nazar meṅ maiṅ to āp ke barābar hūṅ, mujhe bhī miṭṭī se le kar tashkīl diyā gayā hai. ⁷chunāṅche mujhe āp ke liye dahshat kā bāis nahīṅ honā chāhie, merī taraf se āp par bhārī bojh nahīṅ āegā.

⁸āp ne mere sunte hī kahā balki āp ke alfāz abhī tak mere kānoṅ meṅ gūṅj rahe haiṅ, ⁹‘maiṅ pāk hūṅ, mujh se jurm sarzad nahīṅ huā, maiṅ begunāh hūṅ, merā koī qusūr nahīṅ. ¹⁰to bhī allāh mujh se jhagaṛne ke mavāqe ḍhūṅḍtā aur mujhe apnā dushman samajhtā hai. ¹¹vah mere pāoṅ ko kāṭh meṅ ḍāl kar merī tamām rāhoṅ kī paharādārī kartā hai.’

¹²lekin āp kī yah bāt durust nahīṅ, kyūṅki allāh insān se ālā hai. ¹³āp us se jhagaṛ kar kyūṅ kahate haiṅ, ‘vah merī kisī bhī bāt kā javāb nahīṅ detā’? ¹⁴shāyad insān ko allāh nazar na āe, lekin vah zarūr kabhī is tarīqe, kabhī us tarīqe se us se hamkalām hotā hai.

¹⁵kabhī vah ḵẖwāb yā rāt kī royā meṅ us se bāt kartā hai. jab log bistar par leṭ kar gaharī nīṅd so jāte haiṅ ¹⁶to allāh un ke kān khol kar apnī nasīhatoṅ se unheṅ dahshatzadā kar detā hai. ¹⁷yūṅ vah insān ko ġalat kām karne aur maġrūr hone se bāz rakh kar ¹⁸us kī jān gaṛhe meṅ utarne aur daryā-e-maut ko ubūr karne se rok detā hai.

¹⁹kabhī allāh insān ko bistar par dard ke zarīe tarbiyat detā hai. tab us kī haḍḍiyoṅ meṅ lagātār jaṅg hotī hai. ²⁰us kī jān ko ḵẖurāk se ghin ātī balki use lazīztarīn khāne se bhī nafrat hotī hai. ²¹us kā gosht-post sukaṛ kar ġāib ho jātā hai jabki jo haḍḍiyāṅ pahale chhupī huī thīṅ vah numāyāṅ taur par nazar ātī haiṅ. ²²us kī jān gaṛhe ke qarīb, us kī zindagī halāk karne vāloṅ ke nazdīk pahuṅchtī hai.

²³lekin agar koī farishtā, hazāroṅ meṅ se koī sālis us ke pās ho jo insān ko sīdhī rāh dikhāe ²⁴aur us par taras khā kar kahe, ‘use gaṛhe meṅ utarne se chhuṛā, mujhe fidyā mil gayā hai, ²⁵ab us kā jism javānī kī nisbat ziyādā tar-o-tāzā ho jāe aur vah dubārā javānī kī sī tāqat pāe’ ²⁶to phir vah shaḵẖs allāh se iltijā karegā, aur allāh us par meharbān hogā. tab vah baṛī ḵẖushī se allāh kā chiharā taktā rahegā. isī tarah allāh insān kī rāstbāzī bahāl kartā hai.

²⁷aisā shaḵẖs logoṅ ke sāmne gāegā aur kahegā, ‘maiṅ ne gunāh karke sīdhī rāh ṭeṛhī-meṛhī kar dī, aur mujhe koī fāidā na huā. ²⁸lekin us ne fidyā de kar merī jān ko maut ke gaṛhe meṅ utarne se chhuṛāyā. ab merī zindagī nūr se lutf’andoz hogī.’

²⁹allāh insān ke sāth yah sab kuchh do chār martabā kartā hai ³⁰tāki us kī jān gaṛhe se vāpas āe aur vah zindagī ke nūr se raushan ho jāe.

³¹ai ayyūb, dhyān se merī bāt suneṅ, ḵẖāmosh ho jāeṅ tāki maiṅ bāt karūṅ. ³²agar āp javāb meṅ kuchh batānā chāheṅ to batāeṅ. boleṅ, kyūṅki maiṅ āp ko rāstbāz ṭhaharāne kī ārzū rakhtā hūṅ. ³³lekin agar āp kuchh bayān nahīṅ kar sakte to merī suneṅ, chup raheṅ tāki maiṅ āp ko hikmat kī tālīm dūṅ.”