Ayyūb 34

allāh har ek ko munāsib ajr detā hai

¹phir ilīhū ne bāt jārī rakh kar kahā,

²“ai dānishmando, mere alfāz suneṅ! ai ālimo, mujh par kān dhareṅ! ³kyūṅki kān yūṅ alfāz kī jāṅch-paṛtāl kartā hai jis tarah zabān ḵẖurāk ko chakh letī hai. ⁴āeṅ, ham apne liye vah kuchh chun leṅ jo durust hai, āpas meṅ jān leṅ ki kyā kuchh acchhā hai. ⁵ayyūb ne kahā hai, ‘go maiṅ begunāh hūṅ to bhī allāh ne mujhe mere huqūq se maharūm kar rakhā hai. ⁶jo faislā mere bāre meṅ kiyā gayā hai use maiṅ jhūṭ qarār detā hūṅ. go maiṅ bequsūr hūṅ to bhī tīr ne mujhe yūṅ zaḵẖmī kar diyā ki us kā ilāj mumkin hī nahīṅ.’ ⁷ab mujhe batāeṅ, kyā koī ayyūb jaisā burā hai? vah to kufr kī bāteṅ pānī kī tarah pīte, ⁸badkāroṅ kī sohbat meṅ chalte aur bedīnoṅ ke sāth apnā vaqt guzārte haiṅ. ⁹kyūṅki vah dāvā karte haiṅ ki allāh se lutf’andoz honā insān ke liye befāidā hai.

¹⁰chunāṅche ai samajhdār mardo, merī bāt suneṅ! yah kaise ho saktā hai ki allāh sharīr kām kare? yah to mumkin hī nahīṅ ki qādir-e-mutlaq nāinsāfī kare. ¹¹yaqīnan vah insān ko us ke āmāl kā munāsib ajr de kar us par vah kuchh lātā hai jis kā taqāzā us kā chāl-chalan kartā hai. ¹²yaqīnan allāh bedīn harkateṅ nahīṅ kartā, qādir-e-mutlaq insāf kā ḵẖūn nahīṅ kartā. ¹³kis ne zamīn ko allāh ke havāle kiyā? kis ne use pūrī duniyā par iḵẖtiyār diyā? koī nahīṅ! ¹⁴agar vah kabhī irādā kare ki apnī rūh aur apnā dam insān se vāpas le ¹⁵to tamām log dam chhoṛ kar dubārā ḵẖāk ho jāeṅge.

¹⁶ai ayyūb, agar āp ko samajh hai to suneṅ, merī bātoṅ par dhyān deṅ. ¹⁷jo insāf se nafrat kare kyā vah hukūmat kar saktā hai? kyā āp use mujrim ṭhaharānā chāhate haiṅ jo rāstbāz aur qādir-e-mutlaq hai, ¹⁸jo bādshāh se kah saktā hai, ‘ai badam’āsh!’ aur shurfā se, ‘ai bedīno!’? ¹⁹vah to na raīsoṅ kī jānibdārī kartā, na uhdedāroṅ ko pastahāloṅ par tarjīh detā hai, kyūṅki sab hī ko us ke hāthoṅ ne banāyā hai. ²⁰vah pal bhar meṅ, ādhī rāt hī mar jāte haiṅ. shurfā ko hilāyā jātā hai to vah kūch kar jāte haiṅ, tāqatavaroṅ ko baġair kisī tag-o-dau ke haṭāyā jātā hai.

²¹kyūṅki allāh kī āṅkheṅ insān kī rāhoṅ par lagī rahatī haiṅ, ādamzād kā har qadam use nazar ātā hai. ²²kahīṅ itnī tārīkī yā ghanā aṅdherā nahīṅ hotā ki badkār us meṅ chhup sake. ²³aur allāh kisī bhī insān ko us vaqt se āgāh nahīṅ kartā jab use ilāhī taḵẖt-e-adālat ke sāmne ānā hai. ²⁴use tahqīqāt kī zarūrat hī nahīṅ balki vah zorāvaroṅ ko pāsh pāsh karke dūsroṅ ko un kī jagah khaṛā kar detā hai. ²⁵vah to un kī harkatoṅ se vāqif hai aur unheṅ rāt ke vaqt yūṅ tah-o-bālā kar saktā hai ki chūr chūr ho jāeṅ. ²⁶un kī bedīnī ke javāb meṅ vah unheṅ sab kī nazroṅ ke sāmne paṭaḵẖ detā hai. ²⁷us kī pairvī se haṭne aur us kī rāhoṅ kā lihāz na karne kā yahī natījā hai. ²⁸kyūṅki un kī harkatoṅ ke bāis pastahāloṅ kī chīḵẖeṅ allāh ke sāmne aur musībatazadoṅ kī iltijāeṅ us ke kān tak pahuṅchīṅ. ²⁹lekin agar vah ḵẖāmosh bhī rahe to kaun use mujrim qarār de saktā hai? agar vah apne chihare ko chhupāe rakhe to kaun use dekh saktā hai? vah to qaum par balki har fard par hukūmat kartā hai ³⁰tāki sharīr hukūmat na kareṅ aur qaum phaṅs na jāe.

³¹behatar hai ki āp allāh se kaheṅ, ‘mujhe ġalat rāh par lāyā gayā hai, āindā maiṅ dubārā burā kām nahīṅ karūṅgā. ³²jo kuchh mujhe nazar nahīṅ ātā vah mujhe sikhā, agar mujh se nāinsāfī huī hai to āindā aisā nahīṅ karūṅgā.’ ³³kyā allāh ko āp ko vah ajr denā chāhie jo āp kī nazar meṅ munāsib hai, go āp ne use radd kar diyā hai? lāzim hai ki āp ḵẖud hī faislā kareṅ, na ki maiṅ. lekin zarā vah kuchh pesh kareṅ jo kuchh āp sahīh samajhte haiṅ. ³⁴samajhdār log balki har dānishmand jo merī bāt sune faramāegā, ³⁵‘ayyūb ilm ke sāth bāt nahīṅ kar rahā, us ke alfāz faham se ḵẖālī haiṅ. ³⁶kāsh ayyūb kī pūrī jāṅch-paṛtāl kī jāe, kyūṅki vah sharīroṅ ke se javāb pesh kartā, ³⁷vah apne gunāh meṅ izāfā karke hamāre rū-ba-rū apne jurm par shak ḍāltā aur allāh par mut’addid ilzāmāt lagātā hai’.”