Ayyūb 35

apne āp ko rāstbāz mat ṭhaharānā

¹phir ilīhū ne apnī bāt jārī rakhī,

²“āp kahate haiṅ, ‘maiṅ allāh se ziyādā rāstbāz hūṅ.’ kyā āp yah bāt durust samajhte haiṅ ³yā yah ki ‘mujhe kyā fāidā hai, gunāh na karne se mujhe kyā nafā hotā hai?’ ⁴maiṅ āp ko aur sāthī dostoṅ ko is kā javāb batātā hūṅ.

⁵apnī nigāh āsmān kī taraf uṭhāeṅ, bulandiyoṅ ke bādloṅ par ġaur kareṅ. ⁶agar āp ne gunāh kiyā to allāh ko kyā nuqsān pahuṅchā hai? go āp se mut’addid jarāim bhī sarzad hue hoṅ tāham vah mut’assir nahīṅ hogā. ⁷rāstbāz zindagī guzārne se āp use kyā de sakte haiṅ? āp ke hāthoṅ se allāh ko kyā hāsil ho saktā hai? kuchh bhī nahīṅ! ⁸āp ke hamjins insān hī āp kī bedīnī se mut’assir hote haiṅ, aur ādamzād hī āp kī rāstbāzī se fāidā uṭhāte haiṅ.

⁹jab logoṅ par saḵẖt zulm hotā hai to vah chīḵẖte chillāte aur baṛoṅ kī ziyādtī ke bāis madad ke liye āvāz dete haiṅ. ¹⁰lekin koī nahīṅ kahatā, ‘allāh, merā ḵẖāliq kahāṅ hai? vah kahāṅ hai jo rāt ke daurān naġme atā kartā, ¹¹jo hameṅ zamīn par chalne vāle jānvaroṅ kī nisbat ziyādā tālīm detā, hameṅ parindoṅ se ziyādā dānishmand banātā hai?’ ¹²un kī chīḵẖoṅ ke bāvujūd allāh javāb nahīṅ detā, kyūṅki vah ghamaṅḍī aur bure haiṅ.

¹³yaqīnan allāh aisī bātil faryād nahīṅ suntā, qādir-e-mutlaq us par dhyān hī nahīṅ detā. ¹⁴to phir vah āp par kyūṅ tavajjuh de jab āp dāvā karte haiṅ, ‘maiṅ use nahīṅ dekh saktā,’ aur ‘merā muāmalā us ke sāmne hī hai, maiṅ ab tak us kā intizār kar rahā hūṅ’? ¹⁵vah āp kī kyūṅ sune jab āp kahate haiṅ, ‘allāh kā ġazab kabhī sazā nahīṅ detā, use burāī kī parvā hī nahīṅ’? ¹⁶jab ayyūb muṅh kholtā hai to bemānī bāteṅ nikaltī haiṅ. jo mut’addid alfāz vah pesh kartā hai vah ilm se ḵẖālī haiṅ.”