Ayyūb 36

allāh kitnā azīm hai

¹ilīhū ne apnī bāt jārī rakhī,

²“thoṛī der ke liye sabr karke mujhe is kī tashrīh karne deṅ, kyūṅki mazīd bahut kuchh hai jo allāh ke haq meṅ kahanā hai. ³maiṅ dūr dūr tak phirūṅgā tāki vah ilm hāsil karūṅ jis se mere ḵẖāliq kī rāstī sābit ho jāe. ⁴yaqīnan jo kuchh maiṅ kahūṅgā vah farebdih nahīṅ hogā. ek aisā ādmī āp ke sāmne khaṛā hai jis ne ḵẖulūsdilī se apnā ilm hāsil kiyā hai.

⁵go allāh azīm qudrat kā mālik hai tāham vah ḵẖulūsdiloṅ ko radd nahīṅ kartā. ⁶vah bedīn ko ziyādā der tak jīne nahīṅ detā, lekin musībatazadoṅ kā insāf kartā hai. ⁷vah apnī āṅkhoṅ ko rāstbāzoṅ se nahīṅ phertā balki unheṅ bādshāhoṅ ke sāth taḵẖtnashīn karke bulandiyoṅ par sarfarāz kartā hai.

⁸phir agar unheṅ zanjīroṅ meṅ jakṛā jāe, unheṅ musībat ke rassoṅ meṅ giriftār kiyā jāe ⁹to vah un par zāhir kartā hai ki un se kyā kuchh sarzad huā hai, vah unheṅ un ke jarāim pesh karke unheṅ dikhātā hai ki un kā takabbur kā ravayyā hai. ¹⁰vah un ke kānoṅ ko tarbiyat ke liye khol kar unheṅ hukm detā hai ki apnī nāinsāfī se bāz ā kar vāpas āo. ¹¹agar vah mān kar us kī ḵẖidmat karne lageṅ to phir vah jīte jī apne din ḵẖushhālī meṅ aur apne sāl sukūn se guzāreṅge. ¹²lekin agar na māneṅ to unheṅ daryā-e-maut ko ubūr karnā paṛegā, vah ilm se maharūm rah kar mar jāeṅge.

¹³bedīn apnī harkatoṅ se apne āp par ilāhī ġazab lāte haiṅ. allāh unheṅ bāṅdh bhī le, lekin vah madad ke liye nahīṅ pukārte. ¹⁴javānī meṅ hī un kī jān nikal jātī, un kī zindagī muqaddas farishtoṅ ke hāthoṅ ḵẖatm ho jātī hai. ¹⁵lekin allāh musībatzadā ko us kī musībat ke zarīe najāt detā, us par hone vāle zulm kī mārifat us kā kān khol detā hai.

¹⁶vah āp ko bhī musībat ke muṅh se nikalne kī tarġīb dilā kar ek aisī khulī jagah par lānā chāhatā hai jahāṅ rukāvaṭ nahīṅ hai, jahāṅ āp kī mez umdā khānoṅ se bharī rahegī. ¹⁷lekin is vaqt āp adālat kā vah piyālā pī kar ser ho gae haiṅ jo bedīnoṅ ke nasīb meṅ hai, is vaqt adālat aur insāf ne āp ko apnī saḵẖt girift meṅ le liyā hai. ¹⁸ḵẖabardār ki yah bāt āp ko kufr bakne par na uksāe, aisā na ho ki tāvān kī baṛī raqam āp ko ġalat rāh par le jāe. ¹⁹kyā āp kī daulat āp kā difā karke āp ko musībat se bachāegī? yā kyā āp kī sirtoṛ koshisheṅ yah sar’anjām de saktī haiṅ? hargiz nahīṅ! ²⁰rāt kī ārzū na kareṅ, us vaqt kī jab qaumeṅ jahāṅ bhī hoṅ nest-o-nābūd ho jātī haiṅ. ²¹ḵẖabardār raheṅ ki nāinsāfī kī taraf rujū na kareṅ, kyūṅki āp ko isī liye musībat se āzmāyā jā rahā hai.

²²allāh apnī qudrat meṅ sarfarāz hai. kaun us jaisā ustād hai? ²³kis ne muqarrar kiyā ki use kis rāh par chalnā hai? kaun kah saktā hai, ‘tū ne ġalat kām kiyā’? koī nahīṅ! ²⁴us ke kām kī tamjīd karnā na bhūleṅ, us sāre kām kī jis kī logoṅ ne apne gītoṅ meṅ hamd-o-sanā kī hai. ²⁵har shaḵẖs ne yah kām dekh liyā, insān ne dūr dūr se us kā mulāhazā kiyā hai.

²⁶allāh azīm hai aur ham use nahīṅ jānte, us ke sāloṅ kī tādād mālūm nahīṅ kar sakte. ²⁷kyūṅki vah pānī ke qatre ūpar khaiṅch kar dhund se bārish nikāl letā hai, ²⁸vah bārish jo bādal zamīn par barsā dete aur jis kī bauchhāṛeṅ insān par paṛtī haiṅ. ²⁹kaun samajh saktā hai ki bādal kis tarah chhā jāte, ki allāh ke maskan se bijliyāṅ kis tarah kaṛaktī haiṅ? ³⁰vah apne ird-gird raushnī phailā kar samundar kī jaṛoṅ tak sab kuchh raushan kartā hai. ³¹yūṅ vah bādloṅ se qaumoṅ kī parvarish kartā, unheṅ kasrat kī ḵẖurāk muhayyā kartā hai. ³²vah apnī muṭṭhiyoṅ ko bādal kī bijliyoṅ se bhar kar hukm detā hai ki kyā chīz apnā nishānā banāeṅ. ³³us ke bādloṅ kī garajtī āvāz us ke ġazab kā elān kartī, nāinsāfī par us ke shadīd qahar ko zāhir kartī hai.