Ayyūb 37

¹yah soch kar merā dil laraz kar apnī jagah se uchhal paṛtā hai. ²suneṅ aur us kī ġazabnāk āvāz par ġaur kareṅ, us ġurrātī āvāz par jo us ke muṅh se nikaltī hai. ³āsmān tale har maqām par balki zamīn kī intihā tak vah apnī bijlī chamakne detā hai. ⁴is ke bād kaṛaktī āvāz sunāī detī, allāh kī robdār āvāz garaj uṭhtī hai. aur jab us kī āvāz sunāī detī hai to vah bijliyoṅ ko nahīṅ roktā.

⁵allāh anokhe tarīqe se apnī āvāz garajne detā hai. sāth sāth vah aise azīm kām kartā hai jo hamārī samajh se bāhar haiṅ. ⁶kyūṅki vah barf ko farmātā hai, ‘zamīn par paṛ jā’ aur mūslādhār bārish ko, ‘apnā pūrā zor dikhā.’ ⁷yūṅ vah har insān ko us ke ghar meṅ rahane par majbūr kartā hai tāki sab jān leṅ ki allāh kām meṅ masrūf hai. ⁸tab jaṅglī jānvar bhī apne bhaṭoṅ meṅ chhup jāte, apne gharoṅ meṅ panāh lete haiṅ.

⁹tūfān apne kamre se nikal ātā, shimālī havā mulk meṅ ṭhaṅḍ phailā detī hai. ¹⁰allāh phūṅk mārtā to pānī jam jātā, us kī satah dūr dūr tak munjamid ho jātī hai. ¹¹allāh bādloṅ ko namī se bojhal karke un ke zarīe dūr tak apnī bijlī chamkātā hai. ¹²us kī hidāyat par vah maṅḍalāte hue us kā har hukm takmīl tak pahuṅchāte haiṅ. ¹³yūṅ vah unheṅ logoṅ kī tarbiyat karne, apnī zamīn ko barkat dene yā apnī shafqat dikhāne ke liye bhej detā hai.

¹⁴ai ayyūb, merī is bāt par dhyān deṅ, ruk kar allāh ke azīm kāmoṅ par ġaur kareṅ. ¹⁵kyā āp ko mālūm hai ki allāh apne kāmoṅ ko kaise tartīb detā hai, ki vah apne bādloṅ se bijlī kis tarah chamakne detā hai? ¹⁶kyā āp bādloṅ kī naqal-o-harkat jānte haiṅ? kyā āp ko us ke anokhe kāmoṅ kī samajh ātī hai jo kāmil ilm rakhtā hai? ¹⁷jab zamīn junūbī lū kī zad meṅ ā kar chup ho jātī aur āp ke kapṛe tapne lagte haiṅ ¹⁸to kyā āp allāh ke sāth mil kar āsmān ko ṭhoṅk ṭhoṅk kar pītal ke āīne kī mānind saḵẖt banā sakte haiṅ? hargiz nahīṅ!

¹⁹hameṅ batāeṅ ki allāh se kyā kaheṅ! afsos, aṅdhere ke bāis ham apne ḵẖayālāt ko tartīb nahīṅ de sakte. ²⁰agar maiṅ apnī bāt pesh karūṅ to kyā use kuchh mālūm ho jāegā jis kā pahale ilm na thā? kyā koī bhī kuchh bayān kar saktā hai jo use pahale mālūm na ho? kabhī nahīṅ! ²¹ek vaqt dhūp nazar nahīṅ ātī aur bādal zamīn par sāyā ḍālte haiṅ, phir havā chalne lagtī aur mausam sāf ho jātā hai. ²²shimāl se sunaharī chamak qarīb ātī aur allāh robdār shān-o-shaukat se ghirā huā ā pahuṅchtā hai. ²³ham to qādir-e-mutlaq tak nahīṅ pahuṅch sakte. us kī qudrat ālā aur rāstī zorāvar hai, vah kabhī insāf kā ḵẖūn nahīṅ kartā. ²⁴is liye ādamzād us se ḍarte aur dil ke dānishmand us kā ḵẖauf mānte haiṅ.”