Ayyūb 38
allāh kā javāb
1phir allāh ḵẖud ayyūb se hamkalām huā. tūfān meṅ se us ne use javāb diyā,
2“yah kaun hai jo samajh se ḵẖālī bāteṅ karne se mere mansūbe ke sahīh matlab par pardā ḍāltā hai? 3mard kī tarah kamarbastā ho jā! maiṅ tujh se savāl kartā hūṅ, aur tū mujhe tālīm de.
4tū kahāṅ thā jab maiṅ ne zamīn kī bunyād rakhī? agar tujhe is kā ilm ho to mujhe batā! 5kis ne us kī lambāī aur chauṛāī muqarrar kī? kyā tujhe mālūm hai? kis ne nāp kar us kī paimāish kī? 6us ke satūn kis chīz par lagāe gae? kis ne us ke kone kā bunyādī patthar rakhā, 7us vaqt jab subah ke sitāre mil kar shādiyānā bajā rahe, tamām farishte ḵẖushī ke nāre lagā rahe the?
8jab samundar raham se phūṭ niklā to kis ne darvāze band karke us par qābū pāyā? 9us vaqt maiṅ ne bādloṅ ko us kā libās banāyā aur use ghane aṅdhere meṅ yūṅ lapeṭā jis tarah nauzād ko potṛoṅ meṅ lapeṭā jātā hai. 10us kī hudūd muqarrar karke maiṅ ne use rokne ke darvāze aur kuṅḍe lagāe. 11maiṅ bolā, ‘tujhe yahāṅ tak ānā hai, is se āge na baṛhnā, terī robdār laharoṅ ko yahīṅ ruknā hai.’
12kyā tū ne kabhī subah ko hukm diyā yā use tulū hone kī jagah dikhāī 13tāki vah zamīn ke kināroṅ ko pakaṛ kar bedīnoṅ ko us se jhāṛ de? 14us kī raushnī meṅ zamīn yūṅ tashkīl pātī hai jis tarah miṭṭī jis par muhar lagāī jāe. sab kuchh raṅgdār libās pahane nazar ātā hai. 15tab bedīnoṅ kī raushnī rokī jātī, un kā uṭhāyā huā bāzū toṛā jātā hai.
16kyā tū samundar ke sarchashmoṅ tak pahuṅch kar us kī gaharāiyoṅ meṅ se guzrā hai? 17kyā maut ke darvāze tujh par zāhir hue, tujhe ghane aṅdhere ke darvāze nazar āe haiṅ? 18kyā tujhe zamīn ke vasī maidānoṅ kī pūrī samajh āī hai? mujhe batā agar yah sab kuchh jāntā hai!
19raushnī ke mambā tak le jāne vālā rāstā kahāṅ hai? aṅdhere kī rihāishgāh kahāṅ hai? 20kyā tū unheṅ un ke maqāmoṅ tak pahuṅchā saktā hai? kyā tū un ke gharoṅ tak le jāne vālī rāhoṅ se vāqif hai? 21beshak tū is kā ilm rakhtā hai, kyūṅki tū us vaqt janm le chukā thā jab yah paidā hue. tū to qadīm zamāne se hī zindā hai!
22kyā tū vahāṅ tak pahuṅch gayā hai jahāṅ barf ke zaḵẖīre jamā hote haiṅ? kyā tū ne oloṅ ke godāmoṅ ko dekh liyā hai? 23maiṅ unheṅ musībat ke vaqt ke liye mahfūz rakhtā hūṅ, aise dinoṅ ke liye jab laṛāī aur jaṅg chhiṛ jāe. 24mujhe batā, us jagah tak kis tarah pahuṅchnā hai jahāṅ raushnī taqsīm hotī hai, yā us jagah jahāṅ se mashriqī havā nikal kar zamīn par bikhar jātī hai?
25kis ne mūslādhār bārish ke liye rāstā aur garajte tūfān ke liye rāh banāī 26tāki insān se ḵẖālī zamīn aur ġair’ābād registān kī ābpāshī ho jāe, 27tāki vīrān-o-sunsān biyābān kī piyās bujh jāe aur us se hariyālī phūṭ nikle? 28kyā bārish kā bāp hai? kaun shabnam ke qatroṅ kā vālid hai?
29barf kis māṅ ke peṭ se paidā huī? jo pālā āsmān se ā kar zamīn par paṛtā hai kis ne use janm diyā? 30jab pānī patthar kī tarah saḵẖt ho jāe balki gahare samundar kī satah bhī jam jāe to kaun yah sar’anjām detā hai? 31kyā tū ḵẖoshā-e-parvīn ko bāṅdh saktā yā jauze kī zanjīroṅ ko khol saktā hai? 32kyā tū karvā saktā hai ki sitāroṅ ke muḵẖtalif jhurmaṭ un ke muqarrarā auqāt ke mutābiq nikal āeṅ? kyā tū dubb-e-akbar kī us ke bacchoṅ samet qiyādat karne ke qābil hai? 33kyā tū āsmān ke qavānīn jāntā yā us kī zamīn par hukūmat mut’ayyin kartā hai?
34kyā jab tū buland āvāz se bādloṅ ko hukm de to vah tujh par mūslādhār bārish barsāte haiṅ? 35kyā tū bādal kī bijlī zamīn par bhej saktā hai? kyā vah tere pās ā kar kahatī hai, ‘maiṅ ḵẖidmat ke liye hāzir hūṅ’? 36kis ne misr ke laqlaq ko hikmat dī, murġ ko samajh atā kī? 37kis ko itnī dānāī hāsil hai ki vah bādloṅ ko gin sake? kaun āsmān ke in ghaṛoṅ ko us vaqt uṅḍel saktā hai 38jab miṭṭī ḍhāle hue lohe kī tarah saḵẖt ho jāe aur ḍhele ek dūsre ke sāth chipak jāeṅ? koī nahīṅ!
39kyā tū hī shernī ke liye shikār kartā yā sheroṅ ko ser kartā hai 40jab vah apnī chhupne kī jagahoṅ meṅ dabak jāeṅ yā guṅjān jaṅgal meṅ kahīṅ tāk lagāe baiṭhe hoṅ? 41kaun kavve ko ḵẖurāk muhayyā kartā hai jab us ke bacche bhūk ke bāis allāh ko āvāz deṅ aur māre māre phireṅ