Ayyūb 4

ilīfaz kā etirāz : insān allāh ke huzūr rāst nahīṅ ṭhahar saktā

¹yah kuchh sun kar ilīfaz temānī ne javāb diyā,

²“kyā tujh se bāt karne kā koī fāidā hai? tū to yah bardāsht nahīṅ kar saktā. lekin dūsrī taraf kaun apne alfāz rok saktā hai? ³zarā soch le, tū ne ḵẖud bahutoṅ ko tarbiyat dī, kaī logoṅ ke thakemānde hāthoṅ ko taqviyat dī hai. ⁴tere alfāz ne ṭhokar khāne vāle ko dubārā khaṛā kiyā, ḍagmagāte hue ghuṭne tū ne mazbūt kie. ⁵lekin ab jab musībat tujh par ā gaī to tū use bardāsht nahīṅ kar saktā, ab jab ḵẖud us kī zad meṅ ā gayā to tere roṅgṭe khaṛe ho gae haiṅ. ⁶kyā terā etimād is par munhasir nahīṅ hai ki tū allāh kā ḵẖauf māne, terī ummīd is par nahīṅ ki tū beilzām rāhoṅ par chale?

⁷soch le, kyā kabhī koī begunāh halāk huā hai? hargiz nahīṅ! jo sīdhī rāh par chalte haiṅ vah kabhī rū-e-zamīn par se miṭ nahīṅ gae. ⁸jahāṅ tak maiṅ ne dekhā, jo nāinsāfī kā hal chalāe aur nuqsān kā bīj boe vah is kī fasal kāṭtā hai. ⁹aise log allāh kī ek phūṅk se tabāh, us ke qahar ke ek jhoṅke se halāk ho jāte haiṅ. ¹⁰sherbabar kī dahāṛeṅ ḵẖāmosh ho gaīṅ, javān sher ke dāṅt jhaṛ gae haiṅ. ¹¹shikār na milne kī vajah se sher halāk ho jātā aur shernī ke bacche parāgandā ho jāte haiṅ.

¹²ek bār ek bāt chorī-chhupe mere pās pahuṅchī, us ke chand alfāz mere kān tak pahuṅch gae. ¹³rāt ko aisī royāeṅ pesh āīṅ jo us vaqt dekhī jātī haiṅ jab insān gaharī nīṅd soyā hotā hai. in se maiṅ pareshānakun ḵẖayālāt meṅ mubtalā huā. ¹⁴mujh par dahshat aur tharatharāhaṭ ġālib āī, merī tamām haḍḍiyāṅ laraz uṭhīṅ. ¹⁵phir mere chihare ke sāmne se havā kā jhoṅkā guzar gayā aur mere tamām roṅgṭe khaṛe ho gae. ¹⁶ek hastī mere sāmne khaṛī huī jise maiṅ pahachān na sakā, ek shakl merī āṅkhoṅ ke sāmne dikhāī dī. vah ḵẖāmoshī thī, phir ek āvāz ne farmāyā, ¹⁷‘kyā insān allāh ke huzūr rāstbāz ṭhahar saktā hai, kyā insān apne ḵẖāliq ke sāmne pāk-sāf ṭhahar saktā hai?’ ¹⁸dekh, allāh apne ḵẖādimoṅ par bharosā nahīṅ kartā, apne farishtoṅ ko vah ahamaq ṭhaharātā hai. ¹⁹to phir vah insān par kyūṅ bharosā rakhe jo miṭṭī ke ghar meṅ rahatā, aise makān meṅ jis kī bunyād ḵẖāk par hī rakhī gaī hai. use pataṅge kī tarah kuchlā jātā hai. ²⁰subah ko vah zindā hai lekin shām tak pāsh pāsh ho jātā, abad tak halāk ho jātā hai, aur koī bhī dhyān nahīṅ detā. ²¹us ke ḵẖaime ke rasse ḍhīle karo to vah hikmat hāsil kie baġair intiqāl kar jātā hai.