Ayyūb 42

ayyūb kī āḵẖirī bāt

¹tab ayyūb ne javāb meṅ rabb se kahā,

²“maiṅ ne jān liyā hai ki tū sab kuchh kar pātā hai, ki terā koī bhī mansūbā rokā nahīṅ jā saktā. ³tū ne farmāyā, ‘yah kaun hai jo samajh se ḵẖālī bāteṅ karne se mere mansūbe ke sahīh matlab par pardā ḍāltā hai?’ yaqīnan maiṅ ne aisī bāteṅ bayān kīṅ jo merī samajh se bāhar haiṅ, aisī bāteṅ jo itnī anokhī haiṅ ki maiṅ un kā ilm rakh hī nahīṅ saktā. ⁴tū ne farmāyā, ‘sun merī bāt to maiṅ bolūṅgā. maiṅ tujh se savāl kartā hūṅ, aur tū mujhe tālīm de.’ ⁵pahale maiṅ ne tere bāre meṅ sirf sunā thā, lekin ab merī apnī āṅkhoṅ ne tujhe dekhā hai. ⁶is liye maiṅ apnī bāteṅ mustarad kartā, apne āp par ḵẖāk aur rākh ḍāl kar taubā kartā hūṅ.”

ayyūb apne dostoṅ kī shafāat kartā hai

⁷ayyūb se yah tamām bāteṅ kahane ke bād rabb ilīfaz temānī se hamkalām huā, “maiṅ tujh se aur tere do dostoṅ se ġusse hūṅ, kyūṅki go mere bande ayyūb ne mere bāre meṅ durust bāteṅ kīṅ magar tum ne aisā nahīṅ kiyā. ⁸chunāṅche ab sāt javān bail aur sāt meṅḍhe le kar mere bande ayyūb ke pās jāo aur apnī ḵẖātir bhasm hone vālī qurbānī pesh karo. lāzim hai ki ayyūb tumhārī shafāat kare, varnā maiṅ tumheṅ tumhārī hamāqat kā pūrā ajr dūṅgā. lekin us kī shafāat par maiṅ tumheṅ muāf karūṅgā, kyūṅki mere bande ayyūb ne mere bāre meṅ vah kuchh bayān kiyā jo sahīh hai jabki tum ne aisā nahīṅ kiyā.”

⁹ilīfaz temānī, bildad sūḵẖī aur zūfar nāmātī ne vah kuchh kiyā jo rabb ne unheṅ karne ko kahā thā to rabb ne ayyūb kī sunī.

¹⁰aur jab ayyūb ne dostoṅ kī shafāat kī to rabb ne use itnī barkat dī ki āḵẖirkār use pahale kī nisbat dugnī daulat hāsil huī. ¹¹tab us ke tamām bhāī-bahaneṅ aur purāne jānne vāle us ke pās āe aur ghar meṅ us ke sāth khānā khā kar us āfat par afsos kiyā jo rabb ayyūb par lāyā thā. har ek ne use tasallī de kar use ek sikkā aur sone kā ek chhallā de diyā.

¹²ab se rabb ne ayyūb ko pahale kī nisbat kahīṅ ziyādā barkat dī. use 14,000 bakriyāṅ, 6,000 ūṅṭ, bailoṅ kī 1,000 joṛiyāṅ aur 1,000 gadhiyāṅ hāsil huīṅ. ¹³nīz, us ke mazīd sāt beṭe aur tīn beṭiyāṅ paidā huīṅ. ¹⁴us ne beṭiyoṅ ke yah nām rakhe : pahalī kā nām yamīmā, dūsrī kā qasīah aur tīsrī kā qaran-happūk. ¹⁵tamām mulk meṅ ayyūb kī beṭiyoṅ jaisī ḵẖūbsūrat ḵẖavātīn pāī nahīṅ jātī thīṅ. ayyūb ne unheṅ bhī mīrās meṅ milkiyat dī, aisī milkiyat jo un ke bhāiyoṅ ke darmiyān hī thī.

¹⁶ayyūb mazīd 140 sāl zindā rahā, is liye vah apnī aulād ko chauthī pusht tak dekh sakā. ¹⁷phir vah darāz zindagī se āsūdā ho kar intiqāl kar gayā.