Ayyūb 5

allāh kī tādīb taslīm kar

¹beshak āvāz de, lekin kaun javāb degā? koī nahīṅ! muqaddasīn meṅ se tū kis kī taraf rujū kar saktā hai? ²kyūṅki ahamaq kī raṅjīdgī use mār ḍāltī, sādālauh kī sargarmī use maut ke ghāṭ utār detī hai. ³maiṅ ne ḵẖud ek ahamaq ko jaṛ pakaṛte dekhā, lekin maiṅ ne fauran hī us ke ghar par lānat bhejī. ⁴us ke farzand najāt se dūr rahate. unheṅ shahar ke darvāze meṅ rauṅdā jātā hai, aur bachāne vālā koī nahīṅ. ⁵bhūke us kī fasal khā jāte, kāṅṭedār bāṛoṅ meṅ mahfūz māl bhī chhīn lete haiṅ. piyāse afrād hāṁpte hue us kī daulat ke pīchhe paṛ jāte haiṅ. ⁶kyūṅki burāī ḵẖāk se nahīṅ nikaltī aur dukh-dard miṭṭī se nahīṅ phūṭtā ⁷balki insān ḵẖud is kā bāis hai, dukh-dard us kī virāsat meṅ hī pāyā jātā hai. yah itnā yaqīnī hai jitnā yah ki āg kī chiṅgāriyāṅ ūpar kī taraf uṛtī haiṅ.

⁸lekin agar maiṅ terī jagah hotā to allāh se darayāft kartā, use hī apnā muāmalā pesh kartā. ⁹vahī itne azīm kām kartā hai ki koī un kī tah tak nahīṅ pahuṅch saktā, itne mojize ki koī unheṅ gin nahīṅ saktā. ¹⁰vahī rū-e-zamīn ko bārish atā kartā, khule maidān par pānī barsā detā hai. ¹¹pastahāloṅ ko vah sarfarāz kartā aur mātam karne vāloṅ ko uṭhā kar mahfūz maqām par rakh detā hai. ¹²vah chālākoṅ ke mansūbe toṛ detā hai tāki un ke hāth nākām raheṅ. ¹³vah dānishmandoṅ ko un kī apnī chālākī ke phaṅde meṅ phaṅsā detā hai to hoshyāroṅ kī sāzisheṅ achānak hī ḵẖatm ho jātī haiṅ. ¹⁴din ke vaqt un par aṅdherā chhā jātā, aur dopahar ke vaqt bhī vah ṭaṭol ṭaṭol kar phirte haiṅ. ¹⁵allāh zarūratmandoṅ ko un ke muṅh kī talvār aur zabardast ke qabze se bachā letā hai. ¹⁶yūṅ pastahāloṅ ko ummīd dī jātī aur nāinsāfī kā muṅh band kiyā jātā hai.

¹⁷mubārak hai vah insān jis kī malāmat allāh kartā hai! chunāṅche qādir-e-mutlaq kī tādīb ko haqīr na jān. ¹⁸kyūṅki vah zaḵẖmī kartā lekin marham-paṭṭī bhī lagā detā hai, vah zarb lagātā lekin apne hāthoṅ se shifā bhī baḵẖshtā hai. ¹⁹vah tujhe chhah musībatoṅ se chhuṛāegā, aur agar is ke bād bhī koī āe to tujhe nuqsān nahīṅ pahuṅchegā. ²⁰agar kāl paṛe to vah fidyā de kar tujhe maut se bachāegā, jaṅg meṅ tujhe talvār kī zad meṅ āne nahīṅ degā. ²¹tū zabān ke koṛoṅ se mahfūz rahegā, aur jab tabāhī āe to ḍarne kī zarūrat nahīṅ hogī. ²²tū tabāhī aur kāl kī haṅsī uṛāegā, zamīn ke vahashī jānvaroṅ se ḵẖauf nahīṅ khāegā. ²³kyūṅki terā khule maidān ke pattharoṅ ke sāth ahd hogā, is liye us ke jaṅglī jānvar tere sāth salāmatī se zindagī guzāreṅge. ²⁴tū jān legā ki terā ḵẖaimā mahfūz hai. jab tū apne ghar kā muāinā kare to mālūm hogā ki kuchh gum nahīṅ huā. ²⁵tū dekhegā ki terī aulād baṛhtī jāegī, tere farzand zamīn par ghās kī tarah phailte jāeṅge. ²⁶tū vaqt par jamāshudā pūloṅ kī tarah umrrasīdā ho kar qabr meṅ utregā.

²⁷ham ne tahqīq karke mālūm kiyā hai ki aisā hī hai. chunāṅche hamārī bāt sun kar use apnā le!”