Ayyūb 6
ayyūb kā javāb : sābit karo ki mujh se kyā ġaltī huī hai
1tab ayyūb ne javāb de kar kahā,
2“kāsh merī raṅjīdgī kā vazan kiyā jā sake aur merī musībat tarāzū meṅ tolī jā sake! 3kyūṅki vah samundar kī ret se ziyādā bhārī ho gaī hai. isī liye merī bāteṅ betukī sī lag rahī haiṅ. 4kyūṅki qādir-e-mutlaq ke tīr mujh meṅ gaṛ gae haiṅ, merī rūh un kā zahar pī rahī hai. hāṅ, allāh ke haulnāk hamle mere ḵẖilāf saf’ārā haiṅ. 5kyā jaṅglī gadhā ḍhīnchūṅ ḍhīnchūṅ kartā hai jab use ghās dastayāb ho? yā kyā bail ḍakrātā hai jab use chārā hāsil ho? 6kyā phīkā khānā namak ke baġair khāyā jātā, yā aṅḍe kī saphedī [a] yā ḵẖatmī kā ras. meṅ zāiqā hai? 7aisī chīz ko maiṅ chhūtā bhī nahīṅ, aisī ḵẖurāk se mujhe ghin hī ātī hai.
8kāsh merī guzārish pūrī ho jāe, allāh merī ārzū pūrī kare! 9kāsh vah mujhe kuchal dene ke liye tayyār ho jāe, vah apnā hāth baṛhā kar mujhe halāk kare. 10phir mujhe kam az kam tasallī hotī balki maiṅ mustaqil dard ke māre pech-o-tāb khāne ke bāvujūd ḵẖushī manātā ki maiṅ ne quddūs ḵẖudā ke farmānoṅ kā inkār nahīṅ kiyā.
11merī itnī tāqat nahīṅ ki mazīd intizār karūṅ, merā kyā acchhā anjām hai ki sabr karūṅ? 12kyā maiṅ pattharoṅ jaisā tāqatvar hūṅ? kyā merā jism pītal jaisā mazbūt hai? 13nahīṅ, mujh se har sahārā chhīn liyā gayā hai, mere sāth aisā sulūk huā hai ki kāmyābī kā imkān hī nahīṅ rahā.
14jo apne dost par meharbānī karne se inkār kare vah allāh kā ḵẖauf tark kartā hai. 15mere bhāiyoṅ ne vādī kī un nadiyoṅ jaisī bevafāī kī hai jo barsāt ke mausam meṅ apne kināroṅ se bāhar ā jātī haiṅ. 16us vaqt vah barf se bhar kar gadlī ho jātī haiṅ, 17lekin urūj tak pahuṅchte hī vah sūkh jātī, taptī garmī meṅ ojhal ho jātī haiṅ. 18tab qāfile apnī rāhoṅ se haṭ jāte haiṅ tāki pānī mil jāe, lekin befāidā. vah registān pā kar tabāh ho jāte haiṅ. 19taimā ke qāfile is pānī kī talāsh meṅ rahate, sabā ke safar karne vāle tājir us par ummīd rakhte haiṅ, 20lekin besūd. jis par unhoṅ ne etimād kiyā vah unheṅ māyūs kar detā hai. jab vahāṅ pahuṅchte haiṅ to sharmindā ho jāte haiṅ.
21tum bhī itne hī bekār sābit hue ho. tum haulnāk bāt dekh kar dahshatzadā ho gae ho. 22kyā maiṅ ne kahā, ‘mujhe tuhfā de do, apnī daulat meṅ se merī ḵẖātir rishvat do, 23mujhe dushman ke hāth se chhuṛāo, fidyā de kar zālim ke qabze se bachāo’?
24mujhe sāf hidāyat do to maiṅ mān kar ḵẖāmosh ho jāūṅgā. mujhe batāo ki kis bāt meṅ mujh se ġaltī huī hai. 25sīdhī rāh kī bāteṅ kitnī taklīfdih ho saktī haiṅ! lekin tumhārī malāmat se mujhe kis qism kī tarbiyat hāsil hogī? 26kyā tum samajhte ho ki ḵẖālī alfāz muāmale ko hal kareṅge, go tum māyūsī meṅ mubtalā ādmī kī bāt nazar’andāz karte ho? 27kyā tum yatīm ke liye bhī qur’ā ḍālte, apne dost ke liye bhī saudābāzī karte ho?
28lekin ab ḵẖud faislā karo, mujh par nazar ḍāl kar soch lo. allāh kī qasam, maiṅ tumhāre rū-ba-rū jhūṭ nahīṅ boltā. 29apnī ġaltī taslīm karo tāki nāinsāfī na ho. apnī ġaltī mān lo, kyūṅki ab tak maiṅ haq par hūṅ. 30kyā merī zabān jhūṭ boltī hai? kyā maiṅ farebdih bāteṅ pahachān nahīṅ saktā