Ayyūb 9
ayyūb kā javāb : sālis ke baġair maiṅ rāstbāz nahīṅ ṭhahar saktā
1ayyūb ne javāb de kar kahā,
2“maiṅ ḵẖūb jāntā hūṅ ki terī bāt durust hai. lekin allāh ke huzūr insān kis tarah rāstbāz ṭhahar saktā hai? 3agar vah adālat meṅ allāh ke sāth laṛnā chāhe to us ke hazār savālāt par ek kā bhī javāb nahīṅ de sakegā. 4allāh kā dil dānishmand aur us kī qudrat azīm hai. kaun kabhī us se bahs-mubāhasā karke kāmyāb rahā hai?
5allāh pahāṛoṅ ko khiskā detā hai, aur unheṅ patā hī nahīṅ chaltā. vah ġusse meṅ ā kar unheṅ ulṭā detā hai. 6vah zamīn ko hilā detā hai to vah laraz kar apnī jagah se haṭ jātī hai, us ke bunyādī satūn kāṁp uṭhte haiṅ. 7vah sūraj ko hukm detā hai to tulū nahīṅ hotā, sitāroṅ par muhar lagātā hai to un kī chamak-damak band ho jātī hai.
8allāh hī āsmān ko ḵẖaime kī tarah tān detā, vahī samundarī ajhdahe kī pīṭh ko pāoṅ tale kuchal detā hai. 9vahī dubb-e-akbar, jauze, ḵẖoshā-e-parvīn aur junūbī sitāroṅ ke jhurmaṭoṅ kā ḵẖāliq hai. 10vah itne azīm kām kartā hai ki koī un kī tah tak nahīṅ pahuṅch saktā, itne mojize kartā hai ki koī unheṅ gin nahīṅ saktā. 11jab vah mere sāmne se guzre to maiṅ use nahīṅ dekhtā, jab vah mere qarīb se phire to mujhe mālūm nahīṅ hotā. 12agar vah kuchh chhīn le to kaun use rokegā? kaun us se kahegā, ‘tū kyā kar rahā hai?’ 13allāh to apnā ġazab nāzil karne se bāz nahīṅ ātā. us ke rob tale rahab ajhdahe ke madadgār bhī dabak gae.
14to phir maiṅ kis tarah use javāb dūṅ, kis tarah us se bāt karne ke munāsib alfāz chun lūṅ? 15agar maiṅ haq par hotā bhī to apnā difā na kar saktā. is muḵẖālif se maiṅ iltijā karne ke ilāvā aur kuchh nahīṅ kar saktā. 16agar vah merī chīḵẖoṅ kā javāb detā bhī to mujhe yaqīn na ātā ki vah merī bāt par dhyān degā.
17thoṛī sī ġaltī ke javāb meṅ vah mujhe pāsh pāsh kartā, bilāvajah mujhe bār bār zaḵẖmī kartā hai. 18vah mujhe sāṅs bhī nahīṅ lene detā balki kaṛve zahar se ser kar detā hai. 19jahāṅ tāqat kī bāt hai to vahī qavī hai, jahāṅ insāf kī bāt hai to kaun use peshī ke liye bulā saktā hai? 20go maiṅ begunāh hūṅ to bhī merā apnā muṅh mujhe qusūrvār ṭhaharāegā, go beilzām hūṅ to bhī vah mujhe mujrim qarār degā.
21jo kuchh bhī ho, maiṅ beilzām hūṅ! maiṅ apnī jān kī parvā hī nahīṅ kartā, apnī zindagī haqīr jāntā hūṅ. 22ḵẖair, ek hī bāt hai, is liye maiṅ kahatā hūṅ, ‘allāh beilzām aur bedīn donoṅ ko hī halāk kar detā hai.’ 23jab kabhī achānak koī āfat insān ko maut ke ghāṭ utāre to allāh begunāh kī pareshānī par haṅstā hai. 24agar koī mulk bedīn ke havāle kiyā jāe to allāh us ke qāziyoṅ kī āṅkheṅ band kar detā hai. agar yah us kī taraf se nahīṅ to phir kis kī taraf se hai?
25mere din dauṛne vāle ādmī se kahīṅ ziyādā tezī se bīt gae, ḵẖushī dekhe baġair bhāg nikle haiṅ. 26vah sarkaṅḍe ke baharī jahāzoṅ kī tarah guzar gae haiṅ, us uqāb kī tarah jo apne shikār par jhapaṭṭā mārtā hai. 27agar maiṅ kahūṅ, ‘āo maiṅ apnī āheṅ bhūl jāūṅ, apne chihare kī udāsī dūr karke ḵẖushī kā izhār karūṅ’ 28to phir bhī maiṅ un tamām takālīf se ḍartā hūṅ jo mujhe bardāsht karnī haiṅ. kyūṅki maiṅ jāntā hūṅ ki tū mujhe begunāh nahīṅ ṭhaharātā.
29jo kuchh bhī ho mujhe qusūrvār hī qarār diyā gayā hai, chunāṅche is kā kyā fāidā ki maiṅ bemānī tag-o-dau meṅ masrūf rahūṅ? 30go maiṅ sābun se nahā lūṅ aur apne hāth soḍe [a] lafzī matlab : qaliyāb, lāī (laye). se dho lūṅ 31tāham tū mujhe gaṛhe kī kīchaṛ meṅ yūṅ dhaṅsne detā hai ki mujhe apne kapṛoṅ se ghin ātī hai.
32allāh to mujh jaisā insān nahīṅ ki maiṅ javāb meṅ us se kahūṅ, ‘āo ham adālat meṅ jā kar ek dūsre kā muqāblā kareṅ.’ 33kāsh hamāre darmiyān sālis ho jo ham donoṅ par hāth rakhe, 34jo merī pīṭh par se allāh kā ḍaṅḍā haṭāe tāki us kā ḵẖauf mujhe dahshatzadā na kare. 35tab maiṅ allāh se ḵẖauf khāe baġair boltā, kyūṅki fitrī taur par maiṅ aisā nahīṅ hūṅ.