Luke 2

Lūqā 2

īsā kī paidāish

¹un ayyām meṅ rom ke shahanshāh augustus ne farmān jārī kiyā ki pūrī saltanat kī mardumashumārī kī jāe. ²yah pahalī mardumashumārī us vaqt huī jab kūriniyus shām kā gavarnar thā. ³har kisī ko apne vatnī shahar meṅ jānā paṛā tāki vahāṅ rajisṭar meṅ apnā nām darj karvāe.

⁴chunāṅche yūsuf galīl ke shahar nāsrat se ravānā ho kar yahūdiyā ke shahar bait-laham pahuṅchā. vajah yah thī ki vah dāūd bādshāh ke gharāne aur nasal se thā, aur bait-laham dāūd kā shahar thā. ⁵chunāṅche vah apne nām ko rajisṭar meṅ darj karvāne ke liye vahāṅ gayā. us kī maṅgetar mariyam bhī sāth thī. us vaqt vah ummīd se thī. ⁶jab vah vahāṅ ṭhahare hue the to bacche ko janm dene kā vaqt ā pahuṅchā. ⁷beṭā paidā huā. yah mariyam kā pahalā bacchā thā. us ne use kapṛoṅ ^[a] lafzī tarjumā : potṛoṅ meṅ lapeṭ kar ek charnī meṅ liṭā diyā, kyūṅki unheṅ sarāy meṅ rahane kī jagah nahīṅ milī thī.

charvāhoṅ ko ḵẖushḵẖabarī

⁸us rāt kuchh charvāhe qarīb ke khule maidān meṅ apne revṛoṅ kī paharādārī kar rahe the. ⁹achānak rabb kā ek farishtā un par zāhir huā, aur un ke ird-gird rabb kā jalāl chamkā. yah dekh kar vah saḵẖt ḍar gae. ¹⁰lekin farishte ne un se kahā, “ḍaro mat! dekho maiṅ tum ko baṛī ḵẖushī kī ḵẖabar detā hūṅ jo tamām logoṅ ke liye hogī. ¹¹āj hī dāūd ke shahar meṅ tumhāre liye najātadihandā paidā huā hai yānī masīh ḵẖudāvand. ¹²aur tum use is nishān se pahachān loge, tum ek shīraḵẖwār bacche ko kapṛoṅ meṅ lipṭā huā pāoge. vah charnī meṅ paṛā huā hogā.”

¹³achānak āsmānī lashkaroṅ ke beshumār farishte us farishte ke sāth zāhir hue jo allāh kī hamd-o-sanā karke kah rahe the,

¹⁴“āsmān kī bulandiyoṅ par allāh kī izzat-o-jalāl, zamīn par un logoṅ kī salāmatī jo use manzūr haiṅ.”

¹⁵farishte unheṅ chhoṛ kar āsmān par vāpas chale gae to charvāhe āpas meṅ kahane lage, “āo, ham bait-laham jā kar yah bāt dekheṅ jo huī hai aur jo rabb ne ham par zāhir kī hai.”

¹⁶vah bhāg kar bait-laham pahuṅche. vahāṅ unheṅ mariyam aur yūsuf mile aur sāth hī chhoṭā bacchā jo charnī meṅ paṛā huā thā. ¹⁷yah dekh kar unhoṅ ne sab kuchh bayān kiyā jo unheṅ is bacche ke bāre meṅ batāyā gayā thā. ¹⁸jis ne bhī un kī bāt sunī vah hairatzadā huā. ¹⁹lekin mariyam ko yah tamām bāteṅ yād rahīṅ aur vah apne dil meṅ un par ġaur kartī rahī. ²⁰phir charvāhe lauṭ gae aur chalte chalte un tamām bātoṅ ke liye allāh kī tāzīm-o-tārīf karte rahe jo unhoṅ ne sunī aur dekhī thīṅ, kyūṅki sab kuchh vaisā hī pāyā thā jaisā farishte ne unheṅ batāyā thā.

bacche kā nām īsā rakhā jātā hai

²¹āṭh din ke bād bacche kā ḵẖatnā karvāne kā vaqt ā gayā. us kā nām īsā rakhā gayā, yānī vahī nām jo farishte ne mariyam ko us ke hāmilā hone se pahale batāyā thā.

īsā ko bait-ul-muqaddas meṅ pesh kiyā jātā hai

²²jab mūsā kī sharīat ke mutābiq tahārat ke din pūre hue tab vah bacche ko yarūshalam le gae tāki use rabb ke huzūr pesh kiyā jāe, ²³jaise rabb kī sharīat meṅ likhā hai, “har pahalauṭhe ko rabb ke liye maḵẖsūs-o-muqaddas karnā hai.” ²⁴sāth hī unhoṅ ne mariyam kī tahārat kī rasm ke liye vah qurbānī pesh kī jo rabb kī sharīat bayān kartī hai, yānī “do qumriyāṅ yā do javān kabūtar.”

²⁵us vaqt yarūshalam meṅ ek ādmī banām shamāūn rahatā thā. vah rāstbāz aur ḵẖudātaras thā aur is intizār meṅ thā ki masīh ā kar isrāīl ko sukūn baḵẖshe. rūh-ul-quds us par thā, ²⁶aur us ne us par yah bāt zāhir kī thī ki vah jīte jī rabb ke masīh ko dekhegā. ²⁷us din rūh-ul-quds ne use taharīk dī ki vah bait-ul-muqaddas meṅ jāe. chunāṅche jab mariyam aur yūsuf bacche ko rabb kī sharīat ke mutābiq pesh karne ke liye bait-ul-muqaddas meṅ āe ²⁸to shamāūn maujūd thā. us ne bacche ko apne bāzūoṅ meṅ le kar allāh kī hamd-o-sanā karte hue kahā,

²⁹“ai āqā, ab tū apne bande ko ijāzat detā hai

ki vah salāmatī se rihalat kar jāe, jis tarah tū ne farmāyā hai.

³⁰kyūṅki maiṅ ne apnī āṅkhoṅ se terī us najāt kā mushāhadā kar liyā hai

³¹jo tū ne tamām qaumoṅ kī maujūdgī meṅ tayyār kī hai.

³²yah ek aisī raushnī hai jis se ġairyahūdiyoṅ kī āṅkheṅ khul jāeṅgī

aur terī qaum isrāīl ko jalāl hāsil hogā.”

³³bacche ke māṅ-bāp apne beṭe ke bāre meṅ in alfāz par hairān hue. ³⁴shamāūn ne unheṅ barkat dī aur mariyam se kahā, “yah bacchā muqarrar huā hai ki isrāīl ke bahut se log is se ṭhokar khā kar gir jāeṅ, lekin bahut se is se apne pāoṅ par khaṛe bhī ho jāeṅge. go yah allāh kī taraf se ek ishārā hai to bhī is kī muḵẖālafat kī jāegī. ³⁵yūṅ bahutoṅ ke dilī ḵẖayālāt zāhir ho jāeṅge. is silsile meṅ talvār terī jān meṅ se bhī guzar jāegī.”

³⁶vahāṅ bait-ul-muqaddas meṅ ek umrrasīdā nabiyā bhī thī jis kā nām hannāh thā. vah fanūel kī beṭī aur āshar ke qabīle se thī. shādī ke sāt sāl bād us kā shauhar mar gayā thā. ³⁷ab vah bevā kī haisiyat se 84 sāl kī ho chukī thī. vah kabhī bait-ul-muqaddas ko nahīṅ chhoṛtī thī, balki din rāt allāh ko sijdā kartī, rozā rakhtī aur duā kartī thī. ³⁸us vaqt vah mariyam aur yūsuf ke pās ā kar allāh kī tamjīd karne lagī. sāth sāth vah har ek ko jo is intizār meṅ thā ki allāh fidyā de kar yarūshalam ko chhuṛāe, bacche ke bāre meṅ batātī rahī.

vah nāsrat vāpas chale jāte haiṅ

³⁹jab īsā ke vālidain ne rabb kī sharīat meṅ darj tamām farāiz adā kar liye to vah galīl meṅ apne shahar nāsrat ko lauṭ gae. ⁴⁰vahāṅ bacchā parvān chaṛhā aur taqviyat pātā gayā. vah hikmat-o-dānāī se māmūr thā, aur allāh kā fazl us par thā.

bārah sāl kī umr meṅ bait-ul-muqaddas meṅ

⁴¹īsā ke vālidain har sāl fasah kī īd ke liye yarūshalam jāyā karte the. ⁴²us sāl bhī vah māmūl ke mutābiq īd ke liye gae jab īsā bārah sāl kā thā. ⁴³īd ke iḵẖtitām par vah nāsrat vāpas jāne lage, lekin īsā yarūshalam meṅ rah gayā. pahale us ke vālidain ko mālūm na thā, ⁴⁴kyūṅki vah samajhte the ki vah qāfile meṅ kahīṅ maujūd hai. lekin chalte chalte pahalā din guzar gayā aur vah ab tak nazar na āyā thā. is par vālidain use apne rishtedāroṅ aur azīzoṅ meṅ ḍhūṅḍne lage. ⁴⁵jab vah vahāṅ na milā to mariyam aur yūsuf yarūshalam vāpas gae aur vahāṅ ḍhūṅḍne lage. ⁴⁶tīn din ke bād vah āḵẖirkār bait-ul-muqaddas meṅ pahuṅche. vahāṅ īsā dīnī ustādoṅ ke darmiyān baiṭhā un kī bāteṅ sun rahā aur un se savālāt pūchh rahā thā. ⁴⁷jis ne bhī us kī bāteṅ sunīṅ vah us kī samajh aur javāboṅ se daṅg rah gayā. ⁴⁸use dekh kar us ke vālidain ghabrā gae. us kī māṅ ne kahā, “beṭā, tū ne hamāre sāth yah kyūṅ kiyā? terā bāp aur maiṅ tujhe ḍhūṅḍte ḍhūṅḍte shadīd kofat kā shikār hue.”

⁴⁹īsā ne javāb diyā, “āp ko mujhe talāsh karne kī kyā zarūrat thī? kyā āp ko mālūm na thā ki mujhe apne bāp ke ghar meṅ honā zarūr hai?” ⁵⁰lekin vah us kī bāt na samjhe.

⁵¹phir vah un ke sāth ravānā ho kar nāsrat vāpas āyā aur un ke tābe rahā. lekin us kī māṅ ne yah tamām bāteṅ apne dil meṅ mahfūz rakheṅ. ⁵²yūṅ īsā javān huā. us kī samajh aur hikmat baṛhtī gaī, aur use allāh aur insān kī maqbūliyat hāsil thī.