Mīkāh 5

najātadihandā kī ummīd

¹ai shahar jis par hamlā ho rahā hai, ab apne āp ko chhurī se zaḵẖmī kar, kyūṅki hamārā muhāsarā ho rahā hai. dushman lāṭhī se isrāīl ke hukmarān ke gāl par māregā.

²lekin tū, ai bait-laham ifrātā, jo yahūdāh ke dīgar ḵẖāndānoṅ kī nisbat chhoṭā hai, tujh meṅ se vah niklegā jo isrāīl kā hukmarān hogā aur jo qadīm zamāne balki azal se sādir huā hai. ³lekin jab tak hāmilā aurat use janm na de, us vaqt tak rabb apnī qaum ko dushman ke havāle chhoṛegā. lekin phir us ke bhāiyoṅ kā bachā huā hissā isrāīliyoṅ ke pās vāpas āegā.

⁴yah hukmarān khaṛe ho kar rabb kī quvvat ke sāth apne revaṛ kī gallābānī karegā. use rabb apne ḵẖudā ke nām kā azīm iḵẖtiyār hāsil hogā. tab qaum salāmatī se basegī, kyūṅki us kī azmat duniyā kī intihā tak phailegī. ⁵vahī salāmatī kā mambā hogā. jab asūr kī fauj hamāre mulk meṅ dāḵẖil ho kar hamāre mahaloṅ meṅ ghus āe to ham us ke ḵẖilāf sāt charvāhe aur āṭh raīs khaṛe kareṅge ⁶jo talvār se mulk-e-asūr kī gallābānī kareṅge, hāṅ talvār ko miyān se khaiṅch kar namrūd ke mulk par hukūmat kareṅge. yūṅ hukmarān hameṅ asūr se bachāegā jab yah hamāre mulk aur hamārī sarhadd meṅ ghus āegā.

⁷tab yāqūb ke jitne log bach kar mut’addid aqvām ke bīch meṅ raheṅge vah rabb kī bhejī huī os yā hariyālī par paṛne vālī bārish kī mānind hoṅge yānī aisī chīzoṅ kī mānind jo na kisī insān ke intizār meṅ rahatī, na kisī insān ke hukm par paṛtī haiṅ. ⁸yāqūb ke jitne log bach kar mut’addid aqvām ke bīch meṅ raheṅge vah jaṅglī jānvaroṅ ke darmiyān sherbabar aur bheṛ-bakriyoṅ ke bīch meṅ javān sher kī mānind hoṅge yānī aise jānvar kī mānind jo jahāṅ se bhī guzre jānvaroṅ ko rauṅd kar phāṛ letā hai. us ke hāth se koī bachā nahīṅ saktā. ⁹terā hāth tere tamām muḵẖālifoṅ par fatah pāegā, tere tamām dushman nest-o-nābūd ho jāeṅge.

rabb isrāīl ke butoṅ ko ḵẖatm karegā

¹⁰rabb farmātā hai, “us din maiṅ tere ghoṛoṅ ko nest aur tere rathoṅ ko nābūd karūṅgā. ¹¹maiṅ tere mulk ke shaharoṅ ko ḵẖāk meṅ milā kar tere tamām qilaoṅ ko girā dūṅgā. ¹²terī jādūgrī ko maiṅ miṭā ḍālūṅgā, qismat kā hāl batāne vāle tere bīch meṅ nahīṅ raheṅge. ¹³tere but aur tere maḵẖsūs satūnoṅ ko maiṅ yūṅ tabāh karūṅgā ki tū āindā apne hāth kī banāī huī chīzoṅ kī pūjā nahīṅ karegā. ¹⁴tere asīrat devī ke khambe maiṅ ukhāṛ kar tere shaharoṅ ko mismār karūṅgā. ¹⁵us vaqt maiṅ baṛe ġusse se un qaumoṅ se intiqām lūṅgā jinhoṅ ne merī nahīṅ sunī.”