Nahamiyāh 1
nahamiyāh yarūshalam ke liye duā kartā hai
1zail meṅ nahamiyāh bin hakaliyāh kī riporṭ darj hai.
maiṅ artaḵẖshastā bādshāh kī hukūmat ke 20veṅ sāl kislev ke mahīne meṅ sosan ke qilae meṅ thā 2ki ek din merā bhāī hanānī mujh se milne āyā. us ke sāth yahūdāh ke chand ek ādmī the. maiṅ ne un se pūchhā, “jo yahūdī bach kar jilāvatanī se yahūdāh vāpas gae haiṅ un kā kyā hāl hai? aur yarūshalam shahar kā kyā hāl hai?” 3unhoṅ ne javāb diyā, “jo yahūdī bach kar jilāvatanī se yahūdāh vāpas gae haiṅ un kā bahut burā aur zillat’āmez hāl hai. yarūshalam kī fasīl ab tak zamīnabos hai, aur us ke tamām darvāze rākh ho gae haiṅ.”
4yah sun kar maiṅ baiṭh kar rone lagā. kaī din maiṅ rozā rakh kar mātam kartā aur āsmān ke ḵẖudā se duā kartā rahā,
5“ai rabb, āsmān ke ḵẖudā, tū kitnā azīm aur mahīb ḵẖudā hai! jo tujhe piyār aur tere ahkām kī pairvī karte haiṅ un ke sāth tū apnā ahd qāim rakhtā aur un par meharbānī kartā hai. 6merī bāt sun kar dhyān de ki terā ḵẖādim kis tarah tujh se iltimās kar rahā hai. din rāt maiṅ isrāīliyoṅ ke liye jo tere ḵẖādim haiṅ duā kartā hūṅ. maiṅ iqrār kartā hūṅ ki ham ne terā gunāh kiyā hai. is meṅ maiṅ aur mere bāp kā gharānā bhī shāmil hai. 7ham ne tere ḵẖilāf nihāyat sharīr qadam uṭhāe haiṅ, kyūṅki jo ahkām aur hidāyāt tū ne apne ḵẖādim mūsā ko dī thīṅ ham un ke tābe na rahe. 8lekin ab vah kuchh yād kar jo tū ne apne ḵẖādim ko farmāyā, ‘agar tum bevafā ho jāo to maiṅ tumheṅ muḵẖtalif qaumoṅ meṅ muntashir kar dūṅgā, 9lekin agar tum mere pās vāpas ā kar dubārā mere ahkām ke tābe ho jāo to maiṅ tumheṅ tumhāre vatan meṅ vāpas lāūṅgā, ḵẖwāh tum zamīn kī intihā tak kyūṅ na pahuṅch gae ho. maiṅ tumheṅ us jagah vāpas lāūṅgā jise maiṅ ne chun liyā hai tāki merā nām vahāṅ sukūnat kare.’ 10ai rabb, yah log to tere apne ḵẖādim haiṅ, terī apnī qaum jise tū ne apnī azīm qudrat aur qavī hāth se fidyā de kar chhuṛāyā hai. 11ai rabb, apne ḵẖādim aur un tamām ḵẖādimoṅ kī iltimās sun jo pūre dil se tere nām kā ḵẖauf mānte haiṅ. jab terā ḵẖādim āj shahanshāh ke pās hogā to use kāmyābī atā kar. baḵẖsh de ki vah mujh par raham kare.”
maiṅ ne yah is liye kahā ki maiṅ shahanshāh kā sāqī thā.