Zabūr 102
siyyūn kī bahālī ke liye duā (taubā kā pāṅchvāṅ zabūr)
1musībatzadā kī duā, us vaqt jab vah niḍhāl ho kar rabb ke sāmne apnī āh-o-zārī uṅḍel detā hai.
ai rabb, merī duā sun! madad ke liye merī āheṅ tere huzūr pahuṅcheṅ.
2jab maiṅ musībat meṅ hūṅ to apnā chiharā mujh se chhupāe na rakh balki apnā kān merī taraf jhukā. jab maiṅ pukārūṅ to jald hī merī sun.
3kyūṅki mere din dhueṅ kī tarah ġāib ho rahe haiṅ, merī haḍḍiyāṅ koiloṅ kī tarah dahak rahī haiṅ.
4merā dil ghās kī tarah jhulas kar sūkh gayā hai, aur maiṅ roṭī khānā bhī bhūl gayā hūṅ.
5āh-o-zārī karte karte merā jism sukaṛ gayā hai, jild aur haḍḍiyāṅ hī rah gaī haiṅ.
6maiṅ registān meṅ dashtī ullū aur khaṅḍarāt meṅ chhoṭe ullū kī mānind hūṅ.
7maiṅ bistar par jāgtā rahatā hūṅ, chhat par tanhā parinde kī mānind hūṅ.
8din bhar mere dushman mujhe lān-tān karte haiṅ. jo merā mazāq uṛāte haiṅ vah merā nām le kar lānat karte haiṅ.
9rākh merī roṭī hai, aur jo kuchh pītā hūṅ us meṅ mere āṅsū mile hote haiṅ.
10kyūṅki mujh par terī lānat aur terā ġazab nāzil huā hai. tū ne mujhe uṭhā kar zamīn par paṭaḵẖ diyā hai.
11mere din shām ke ḍhalne vāle sāy kī mānind haiṅ. maiṅ ghās kī tarah sūkh rahā hūṅ.
12lekin tū ai rabb abad tak taḵẖtnashīn hai, terā nām pusht-dar-pusht qāim rahatā hai.
13ab ā, koh-e-siyyūn par raham kar. kyūṅki us par meharbānī karne kā vaqt ā gayā hai, muqarrarā vaqt ā gayā hai.
14kyūṅki tere ḵẖādimoṅ ko us kā ek ek patthar piyārā hai, aur vah us ke malbe par taras khāte haiṅ.
15tab hī qaumeṅ rabb ke nām se ḍareṅgī, aur duniyā ke tamām bādshāh tere jalāl kā ḵẖauf khāeṅge.
16kyūṅki rabb siyyūn ko az sar-e-nau tāmīr karegā, vah apne pūre jalāl ke sāth zāhir ho jāegā.
17muflisoṅ kī duā par vah dhyān degā aur un kī faryādoṅ ko haqīr nahīṅ jānegā.
18āne vālī nasal ke liye yah qalamband ho jāe tāki jo qaum abhī paidā nahīṅ huī vah rabb kī sitāish kare.
19kyūṅki rabb ne apne maqdis kī bulandiyoṅ se jhāṅkā hai, us ne āsmān se zamīn par nazar ḍālī hai
20tāki qaidiyoṅ kī āh-o-zārī sune aur marne vāloṅ kī zanjīreṅ khole.
21kyūṅki us kī marzī hai ki vah koh-e-siyyūn par rabb ke nām kā elān kareṅ aur yarūshalam meṅ us kī sitāish kareṅ,
22ki qaumeṅ aur saltanateṅ mil kar jamā ho jāeṅ aur rabb kī ibādat kareṅ.
23rāste meṅ hī allāh ne merī tāqat toṛ kar mere din muḵẖtasar kar die haiṅ.
24maiṅ bolā, “ai mere ḵẖudā, mujhe zindoṅ ke mulk se dūr na kar, merī zindagī to adhūrī rah gaī hai. lekin tere sāl pusht-dar-pusht qāim rahate haiṅ.
25tū ne qadīm zamāne meṅ zamīn kī bunyād rakhī, aur tere hī hāthoṅ ne āsmānoṅ ko banāyā.
26yah to tabāh ho jāeṅge, lekin tū qāim rahegā. yah sab kapṛe kī tarah ghis phaṭ jāeṅge. tū unheṅ purāne libās kī tarah badal degā, aur vah jāte raheṅge.
27lekin tū vahī kā vahī rahatā hai, aur terī zindagī kabhī ḵẖatm nahīṅ hotī.
28tere ḵẖādimoṅ ke farzand tere huzūr baste raheṅge, aur un kī aulād tere sāmne qāim rahegī.”